Tindinoowo 6

1Mi taykake bonanda goɗɗo na sori naange nge, de bonanda oon na teddani ɓii-Aadama: 2Na woodi mo Laamɗo hokki jawdi e danyal e darja faa huunde fuu nyakaay mo, ammaa Laamɗo hokkaay mo weltoraade ɗum, wo goɗɗo nawtortoo ɗum. Ɗum fuu wo ɗum ɓolum, wo bone mettinoowo ɓernde.

3Neɗɗo na waawi heɓude sukaaɓe hemre de juuta balɗe, ammaa no o juutiri balɗe fu, si o weltoraaki keɓal makko, o heɓaay uweede wooɗa fu, miɗo waawi wi'ude cukalel ngel rimdaaka e yonki na samti mo. 4Ngel warii ɓolum, ngel dilli e nimre, walaa fuu nanuɗo innde maggel. 5Ngel yi'aay naange, ngel anndaa fay gootum, de inngel ɓuri oon gorko heɓude fowtere, 6fay si o wuurnoo duuɓi ujunaaje sowre, nafataa si o weltoraaki nguurndam makko. Wanaa timmoode yimɓe fuu laatoto gootum naa?

7Ko neɗɗo tampanta fuu

wo faa hebbina hunnduko muuɗum,

de ko haarataa abada.

8Ɗume goodal jom hakkillo ɓurdi ngal puuyɗo?

Talka annduɗo no wondirta e yimɓe du,

nafaa oye heɓata?

9Halal maa ngal njogiɗaa

na ɓuri ko miilotoɗaa heɓude.

Ɗum du fuu wo ɗum ɓolum, wo riiwude henndu.

10Huunde fuu na woodi innde muuɗum,

ɓii-Aadama du na anndaa no wa'i.

Fay gooto suusataa haɓude e ɓurɗo ɗum semmbe.

11Si haalaaji keewii fu, ko nafataa du heewan.

Ɗume ɗum nafata ɓii-Aadama?

12Moy waawi anndude ko moƴƴani neɗɗo ley nyalakoy muuɗum ɓoloy kooy? Fuu wo paltotookoy hono ɗooki. Moy waawi hollude mo ko waroyta ley adunaaru sorunde naange caggal dillugol makko?

Currently Selected:

Tindinoowo 6: FBF

Highlight

Copy

Compare