Rud Nuarin-tas alupas 3.
Nuarin-tas alupas 3.
1 Et esege imi Rud a Neomai, 5 mika yi asjeuc aien an neduei Boas. 8 Et ika a Boas et atimi ehpan iran aien. 14 Et alupai yin nitai tup ahtai barle aien um adcijai yin.
1IS tas ehelen a Neomai risi natamnyu un, um ika, Ak inhal unyak, et upene mika ki ahilek nitai atumop vai euc ainyak, va apu amen upene aiek.
2Et idim natimi ehpan iraijau a Boas, as amen ehele ilpu aheca atahig o un aiek. Et ahre barle aien an nepig inpig an nuarin auud korn iran.
3Namu ereuc aiek, um aspi euc, um aso euc an napelumai unyum, um asuol, um apan an nuarin auud korn iran: etu wit hag ehni a natimi iyehki um umwig, namu aniv euc ehelen aiek.
4Etu wit asjeuc aien, namu asjaaicnaig an nuarin inig aiek inyi asjeuc iran aien, ja par apan um atipagki napelumai an neduon, um asjeuc; etpu asuptecnaig ehelum aien nitai inig napu ago aiek.
5Is ika ehelen aien, Ekpu ago nitai iji igki asega ainyak an asaig ehelek aiek.
6Is asuol aien u nuarin auud korn iran, um ago nedo asega iyehki is asaig ehelen a risi natamnyu un.
7Is hag a Boas um umwig, is lep imiacitak inliinmopon aien, ja is par apan aien um asjeuc u nilpun niji irai barle: is eklim apan aien, um atipagki napelumai an neduon, um lep asjeuc.
8Is wat ijihgan nepig, is ahidaig pan yin a natimi iyehki, um imiali, is wat ecet intakata is ethi aien nasjeuc vaig u neduon.
9Is ika aien, Aiek di aigki! Is ika aien, Ek Rud ainyak, naheca atahig unyum: ak natimi alupas unyak, namu ika aiek ki ehgam ainyak, nai idim atimi ehpan irak esjilid aiek.
10Is ika aien, Etmu aiheuc vai euc a Ihova, ak inhal unyak: et esjilid nedo upene unyum an nopan inig irai nedo unyum an nopan iyehki, as idim eti apitac irai ilpu takuras aiek, ilpu takuras tup atimi, ka ilpu takuras ikni itai.
11Ak inhal unyak, namu jim imtitaig aiek; ekpu ago nedo asega inigki vai euc ainyak na asaig ehelek aiek: era idim ato natimi asega an maliyum unyak, mika nai takata upene aiek.
12Et lep inveijec intas unyum mika, ek atimi ehpan iram esjilid ainyak: ja et eteuc natimi ehpan iram et ethi, et esjilid irak aien.
13Amen ki aiek an nepig inigki, et wat lahlah pan an nuhialeg, el et merit aien par ago nedo o natimi ehpan iram esjilid, et upene; etmu ago aien nedo o natimi ehpan iram esjilid: ja el et esjum aien par ago vai euc nedo o natimi ehpan iram esjilid, ekpu idim ago vai euc ainyak nedo o natimi ehpan iram esjilid, ek inveijec vai Ihova ainyak: namu asjeuc aiek um yetpan an nuhialeg.
14Is asjeuc u neduon aien, is um lahlah pan: is aiji aien is wat ehka va atimi par ato sjipe ra. Is ika aien, Uhmu jim ato mika et mun ham a intakata et ethi an nuarin auud korn iran inig.
15Is lep ika aien, Imiehio napelumai alupas unyum aiek, um asjiraig. Is asjiraig aien, is ecesiks asjaaicnaig irai barle aien, um ikni um atijai iran: is apan aien an maliyum.
16Is wat yetpan aien ehele risi natamnyu un, is ika aien, Ak inhal unyak, Et echamecha iran vai euc? Is asuptecnaig ehelen aien nedo asega is ago vai yin a natimi iyehki.
17Is ika aien, Et mun alupai nyak aien barle inigki er ecesiks asjaaicnaig iran an nipjinitai asjaaicnaig; is ika aien, Namu jim apan ehele risi natamnyu unyum aiek um ti nitai iram.
18Is ika aien, Namu eklim amen aiek, ak inhal unyak, um aitgaig par ato mika inyi echamecha vai nitai inigki: inyi upyi hup a natimi iyehki um ago ehni nitai inigki inpig, ja par atumop.
Currently Selected:
Rud Nuarin-tas alupas 3.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)