Numera Nuarin-tas alupas 3.
Nuarin-tas alupas 3.
1 Ilpu halav atamaig u Eron. 5 Eh ikni ilpu mapoi Livai imi ilpu atimi ahlap va nauritai an neom itap, 11 mika eri isjeupigmoig inmeto asega. 14 Eh esvi ilpu mapoi Livai et idivaig ilpu eteuc ura. 21 Ilpu eteuc im nauritai im nisjipicnaig u ilpu mapoi Cerson, 27 u ilpu mapoi Kohad, 33 u ilpu mapoi Mererai. 38 Nuarin im nauritai u Moses im Eron. 40 Er atcijaig atimi inmeto vai ilpu mapoi Livai. 44 Er auarimtara era eled ara.
1ERIS ilpu hal u Eron im Moses ara sji igki, an nadiat iyehki is tas a Ihova ehele Moses an lolan nedoon Saine.
2Nidai ilpu hal u Eron ji igki; nan, Netab inmeto, im Abaihu, im Eliesar, im Idamar.
3Nidai ilpu hal u Eron ji igki, ilpu atimi ahlap eris aspi ra, is ikni ra aien par ago nauritai u ilpu atimi ahlap.
4Erus emesmas a Netab im Abaihu an nuhup u Ihova, erus wat imiapan incap is eche arau an nuhup u Ihova, an namasacen Saine, eris lep eti eteuc a ilpu hal urau: ja erus ago nauritai u ilpu atimi ahlap a Eliesar im Idamar an nuhup u Eron etmarau.
5Is tas a Ihova ehele Moses, um ika,
6Imiapam ilpu mapoi Livai ubutpotet, um ikni ra an nuhup u Eron natimi ahlap, va erupu aheca o un ara.
7Erumu aminjinaig niji itai o un ara, im niji itai u atimi asega, an nuhup u neom er asjapicnaig o un, um ago nauritai an neom itap.
8Erumu aminjinaig niji itai asega ara u neom er asjapicnaig o un, im niji itai u nup Isreel, um ago nauritai an neom itap.
9Namu ikni ilpu mapoi Livai aiek imi Eron im ilpu hal o un: er idim alupai yin ra irai up Isreel.
10Namu lep ikni Eron im ilpu hal o un aiek, mika eri ago nauritai u ilpu atimi ahlap ara: uhmu lep atgei natimi et eche et apan ubutpotet aien.
11Is tas a Ihova ehele Moses, um ika,
12Kis idim iknipagki ilpu mapoi Livai ainyak irai up Isreel par isjeupigmoig inmeto asega u nup Isreel: erumu idim unyak a ilpu mapoi Livai;
13era idim unyak inmeto asega; kis ika ainyak an nadiat iyehki kis auud inmeto asega ainyak an pece Ijipt, eri itap vai nyak inmeto asega u nup Isreel, natimi im niji itai eklim edo irai pece: erumu unyak ara: ek Ihova ainyak.
14Is tas a Ihova ehele Moses an namasacen Saine, um ika,
15Esvi ilpu mapoi Livai pan irai ilpu retpora: namu esvi ilpu atamaig asega aiek et eteuc inmohoc et ethi ira ra um eled.
16Is esvi ra a Moses vai intas o Ihova is asaig ehelen aien.
17Ehtaij hal u Livai ahtaij raigki im nidai ehtaij; nan, Cerson, im Kohad, im Mererai.
18Nidai ohwat hal u Cerson raigki irai ilpu eteuc ira ra; nan, Libnai, im Simeai.
19Im ilpu hal u Kohad irai ilpu eteuc ira ra; nan Amram, im Isehar, im Hibron, im Ussiel.
20Im ohwat hal u Mererai irai ilpu eteuc ira rau; nan, Melai, im Musai. Ilpu eteuc irai ilpu mapoi Livai ji igki irai ilpu retpora.
21Eris ahes ehele Cerson a nup u Libnai, im nup u Simeai: eris ilpu eteuc irai Cerson ara sji igki.
22Eris seven dausant im faiv huntret (7,500) a ilpu atamaig asega eris esvi ra ira ra, is eteuc inmohoc is ethi ira ra um eled.
23Erumu athai eom atga ura a ilpu mapoi Cerson an nahaijin neom itap an nahaijin an nete o un.
24Etmu atimi alupas u ilpu mapoi Cerson a Elaiasaf inhal u Leel.
25Niji itai aminjinaig u ilpu mapoi Cerson an neom er asjapicnaig o un ji igki; nikavaig, neom itap, im neom atga, im nitai adahpoi, im nitai atapin neucse neom er asjapicnaig o un,
26im napelumai atapin nokoro, im napelumai atapnes neucse nirahed ubutpotet pan u neom itap, um ubutpotet pan u natau, um arehed mihtag, im injaula urin par ago itai asega iran.
27Eris ahes ehele Kohad a nup Amram, im nup Isehar, im nup u Hibron, im nup Ussiel: eris ilpu mapoi Kohad ara sji igki.
28Eris eet dausant im siks huntret (8,600) a ilpu atamaig asega is eteuc inmohoc is ethi ira ra um eled, eris aminjinaig itai an nuarin itap ara.
29Erumu athai eom atga ura a ilpu mapoi Kohad an nahaijin neom itap inig et ahes nuritoga iran.
30Etmu atimi alupas u ilpu mapoi Kohad a Elisafan inhal u Ussiel.
31Erumu aminjinaig nitai iji igki ara; nikavaig, nelcau, im nefata, im nitai atijai incap alahala iran, im natau et ero, im nipjiitai an nuarin itap er ago itai iran, im napelumai atapin, im niji itai asega er ago itai iran.
32Etmu esjilid a Eliesar inhal u Eron natimi ahlap irai ilpu atimi alupas u ilpu mapoi Livai, um aminjinai ra sji igki era aminjinaig itai an nuarin itap ara.
33Eris ahes ehele Mererai a nup u Melai, im nup u Musai: eris ilpu mapoi Mererai ara sji igki.
34Eris siks dausant im tu huntret (6,200) a ilpu atamaig asega eris esvi ra, is eteuc inmohoc is ethi ira ra um eled.
35Is atimi alupas u ilpu mapoi Mererai a Suriel inhal u Abiheel: erumu athai eom atga ura ara sji igki an nahaijin neom itap inig et ahes narutu iran.
36Erumu aminjinaig nuaricai uri neom itap a ilpu mapoi Mererai, im lep nakaukau urin, im nauicai aduwi urin, im niji itai ipjilai urin, im nipjiitai asega urin, im niji itai asega urin,
37im nauicai aduwi uri nokoro um arehed mihtag, im niji itai ipjilai urin, im niji pin urin, im niji jaula urin.
38Erumu athai eom atga ura an nuhup u neom itap a Moses, im Eron im ilpu hal o un, an nuhup u neom itap marom an nahaijin an ridjai o un, um aminjinaig nuarin itap vai nup Isreel; uhmu lep atgei natimi et eche inyi apan ubutpotet aien.
39Eris twente im tu dausant (22,000) ara asega erus esvi ra a Moses im Eron irai ilpu mapoi Livai asega, ilpu atamaig asega is eteuc inmohoc is ethi ira ra um eled.
40Is ika a Ihova ehele Moses, Esvi inmeto asega irai ilpu atamaig u nup Isreel et eteuc inmohoc is ethi ira ra um eled, esvi nidara asega.
41Ikni ilpu mapoi Livai imi nyak (ek Ihova ainyak), par asjeupigmoig immeto asega irai up Isreel; im lep niji itai eklim edo irai pece u ilpu mapoi Livai par asjeupigmoig inmeto irai iji itai eklim edo irai pece u nup Isreel.
42Is esvi inmeto asega irai up Isreel a Moses, is idivaig is asaig ehelen a Ihova.
43Eris twente tu dausant im tu huntret im sevente-dri (22,273) inmeto atamaig asega eris esvi nidara, is eteuc inmohoc is ethi ira ra um eled.
44Is tas a Ihova ehele Moses, um ika,
45Ikni ilpu mapoi Livai par asjeupigmoig inmeto asega irai up Isreel, im niji itai eklim edo irai pece u ilpu mapoi Livai par asjeupigmoig niji itai eklim edo irai pece ura; erumu unyak a ilpu mapoi Livai: ek Ihova ainyak.
46Nasjeupigmoig inmeto u nup Isreel ira atimi et tu huntret im sevente-dri (273), eris eled ara irai ilpu mapoi Livai nigki; nikavaig,
47namu lucsei sikel inyi faiv aiek vai ra athiathi, inyi idivaig sikel an nuarin itap: et tup apapa pan irai cira et twente sikel et ethi:
48namu alupai mune inig aiek, va uhpu asjeupigmoig iran ilpu atimi eled ira ra, imi Eron im ilpu hal o un.
49Is lucsei mune a Moses nasjeupigmoig ra eris eled ara irai ra sji ehki eris auanimtara a ilpu mapoi Livai:
50is lucsei mune aien irai inmeto o nup Isreel; is wun dausant dri huntret im sikste faiv (1,365) sikel, is idivaig sikel an nuarin itap:
51is alupai Eron im ilpu hal o un mune a Moses vai ra sji ehki eris ajeupigmoig ra, vai intas o Ihova, is idivaig is asaig a Ihova ehele Moses.
Currently Selected:
Numera Nuarin-tas alupas 3.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)