Numera Nuarin-tas alupas 31.
Nuarin-tas alupas 31.
1 Er atoraliak itai u nup u Mitian um atgei Belam. 13 Et ehniv a Moses vai ilpu atimi alupas mika eris imialep ilpu takata ara. 19 Intas alep par ago adicinadicin ilpu eucsupo im ilpu aheca ura im naga ura. 25 Er atiakoai niji itai eris atoraliak. 48 Era ispara tup ahtai niji itai imi Ihova ara.
1IS tas a Ihova ehele Moses, um ika,
2Aru nedo has u nup u Mitian vai nup Isreel: ja uhpu apitac um ati euc ehele ilpu retpom.
3Is tas a Moses ehele nup Isreel, um ika, Erumu yecrei ra va nedoa hal caua, um apan, um ati nedoa vai nup u Mitian, va etpu aru a Ihova irai up u Mitian.
4Akumu abraig pan natimi inyi wun dausant u nedoa aijaua irai iji ahaiji up Isreel.
5Eris ikni natimi is wun dausant irai iji ahaiji up Isreel, eris twelv dausant ara eris yecrei ra va nedoa.
6Is abraig pan ra u nedoa a Moses, natimi is wun dausant irai iji ahaiji ra, is abraig pan ra, im Finehas inhal u Eliesar natimi ahlap u nedoa aien, im niji itai itap, intoho eraigko marom, mika eri ahlai.
7Eris ago nedoa ara vai nup u Mitian, is idivaig is asaig a Ihova ehele Moses; eris lep atgei ilpu atamaig asega ara.
8Eris lep atgei ilpu atimarid Mitian ara pan irai ra sji ehki eris atgei ra; nan, Irai, im Rikem, im Sur, im Hur, im Riba, ilpu atimarid Mitian is faiv: eris lep atgei Belam inhal u Bior ara an nedoa.
9Eris lucsei ilpu takata Mitian asega a nup Isreel, im ilpu hal ura, mika eri ilpu aheca ura ara, um lep atoraliak kurimatau asega ura, im siip asega ura, im inpadiaig asega ura.
10Eris ahli niji maliyum asega ura ara eris amen iran ara, im niji imnim atimi asega ura.
11Eris lucsei impadiaig asega ara, im naga asega eris atoraliak an nedoa, im natimi, im niji itai eklim edo irai pece.
12Eris imiapan ilpu aheca ara, im inpadiaig, im naga eris atoraliak an nedoa, ehele Moses, im Eliesar, im nup Isreel asega, an nuarin amen ura irai uarin marara Moab, u nofowai Jortan ubutpotet pan Jeriko.
13Eris ahes an nuarin amen ura a Moses, im Eliesar natimi ahlap, im ilpu atimi alupas asega u atimi, um apan itac par aubilid ra.
14Is edemda a Moses vai ilpu atimi alupas u ilpu eucsupo, nikavaig, ilpu atimi alupas irai iji dausant, im ilpu atimi alupas irai iji huntret, eris ahes an nedoa ara.
15Is ahodai ra a Moses, um ika, Et echamecha, akis imiatamaig ilpu takata asega aijaua?
16Eris ika ara sji igki eri imipalea intas o Ihova a nup Isreel vai intas o Belam, um ago nedo o Pior, is lep ucjum pam inmas ira atimi u Ihova vaig.
17Va nitai inigki akumu atgei ilpu halav atamaig asega aijaua, um atgei ilpu takata asega eris ato natamaig ara, um amen ehele ra.
18Jam imiatumumoh ilpu atahig asega imi caua eris eti ato natamaig ara, um eti amen ehele ra.
19Akumu amen itac aijaua va nuarin amen u atimi: el is atgei tah natimi tah, el is lep atcei pan tah natmas tah, akumu yiri caua aijaua im lep ilpu aheca unyimia an nadiat dirt im nadiat sevend.
20Akumu lep yiri napelumai asega unyimia aijaua, im niji itai asega er ago ira arasi itai eklim edo irai pece, im nap asega irai umri anin, im niji itai asega er ago irai cai.
21Is ika a Eliesar natimi ahlap ehele ilpu eucsupo eris apan u nedoa ara, Intas alep u Ihova nigki is asaig ehele Moses aien;
22Akumu ahen colt an cap aijaua, im silver, im bras, im aiurn, im tin, im let,
23im niji itai asega inyi eti cas incap, etpu upene: uhmu lep ago upene an wai er ago adicinadicin itai vaig: akumu lep atise an wai nitai iji igki asega etpu cas incap.
24Akumu lep yiri apelumai unyimia aijaua an nadiat sevend, akupu lep upene aijaua, ja akumu apitac aijaua um apan an nuarin amen u atimi.
25Is tas a Ihova ehele Moses, um ika,
26Namu lep esvi niji itai eris atoraliak an nedoa, nikavaig, natimi im niji itai eklim edo irai pece, aiek, im Elieser natimi ahlap, im ilpu atimi alupas u atimi:
27um atiakoai niji itai eris atoraliak an nedoa inyi ero niji iran; yi ethi imi ilpu eucsupo, im lep yi ethi imi atimi asega:
28erumu lep ikni vai Ihova nahaiji itai ura a ilpu atimi apan u nedoa; nikavaig, tah yi ethi irai iji faiv huntret atimi, im kurimatau, im togke, im siip:
29lucsei an nahaijin ura, um alupai Eliesar natimi ahlap, nitai ahlap asjaig jipe vai Ihova.
30Namu lep lucsei nahaijin fiftied an nahaijin u nup Isreel aiek, nikavaig, natimi, im kurimatau, im togke, im siip, im niji itai eklim edo irai pece asega, um ikni ehele ilpu mapoi Livai, era aminjinaig neom itap u Ihova ara.
31Erus ago a Moses im Eliesar natimi ahlap, is idivaig is asaig a Ihova ehele Moses.
32Nitai eris atoraliak an nedoa ji igki, nikavaig, nahaijin niji itai umumoh is eled iran yehki, eris atoraliak a ilpu eucsupo, nikavaig, siip is siks huntret im sevente faiv dausant (675.000),
33im kurimatau is sevente tu dausant (72,000),
34im togke is sikste wun dausant (61,000),
35im natimi is dirte tu dausant (32,000), nikavaig, ilpu atahig asega eris eti ato natamaig ara, um eti amen ehele ra.
36Nahaijin u ilpu atimi apan u nedoa nigki, nikavaig, siip is dri huntret im dirte seven dausant im faiv huntret (337,500):
37im siip eris ikni imi Ihova is siks huntret im sevente faiv (675).
38Im kurimatau is dirte siks dausant (36,000); ja eris ikni imi Ihova sevente tu (72).
39Im togke is dirte faiv dausant im faiv huntret (35,500); ja eris ikni imi Ihova is sikste wun (61).
40Im natimi is sikstiin dausant (16,000); ja eris ikni imi Ihova natimi is dirte tu (32).
41Is ikni nahaijin u Ihova a Moses ehele Eliesar natimi ahlap, par itai ahlap asjaig jipe, et idivaig is asaig a Ihova ehele Moses.
42Im lep nahaijin u nup Isreel is lucsei a Moses ehele ilpu atimi ago nedoa,
43nahaijin imi atimi nigki, nikavaig, siip is dri huntret im dirte seven dausant im faiv huntret (337,500),
44im kurimatau is dirte siks dausant (36,000),
45im togke is dirte dausant im faiv huntret (30,500),
46im natimi is sikstiin dausant (16,000);
47is leh is ethi irai iji fifte a Moses an nahaijin u nup isreel ira atimi, im niji itai eklim edo irai pece, um ikni ehele ilpu mapoi Livai, eris aminjinaig neom itap u Ihova ara; et idivaig is asaig a Ihova ehele Moses.
48Eris apan ehele Moses a ilpu atimi alupas irai iji dausant im ilpu atimi alupas irai iji huntret:
49eris ika ehele Moses ara, Ak natimi alupas, ecris esvi ilpu eucsupo apol irama aijama, ja et eti tiih tah irama.
50Va nitai inigki ecra mun imiapam naaurinig vai Ihova aijama asega, nikavaig, nipjiitai irai colt, im natau colt, im nethado, im rig, im inteijeug, im nitaahnaig colt, par adahpoi nedo has unyima an nuhup u Ihova.
51Erus lucsei colt ura a Moses im Eliesar natimi ahlap, nikavaig, niji itai yecrei asega marom.
52Is sikel is sikstiin dausant im seven huntret im fifte (16,750) colt asega u ilpu atimi alupas irai iji dausant, im ilpu atimi alupas irai iji huntret, eris ikni vai Ihova ara.
53(Eris lucsei naga eris atoraliak an nedoa a ilpu eucsupo asega imi ra.)
54Erus lucsei colt u ilpu atimi alupas irai iji dausant im lep irai iji huntret a Moses im Eliesar natimi ahlap, um imiapan anliin neom er asjapicnaig o un, nitai imiehva vai nup Isreel an nuhup u Ihova.
Currently Selected:
Numera Nuarin-tas alupas 31.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)