Numera Nuarin-tas alupas 28.
Nuarin-tas alupas 28.
1 Er idim ika eri ahlap irai iji itai ahlap. 3 Nitai ahlap atnamud irai iji adiat. 9 Nitai ahlap an nadiat atumop, 11 irai iji upyi het, 16 an nasjapicnaig va nahtaregdei atimi, 26 an nadiat an hupnai itai.
1IS tas a Ihova ehele Moses, um ika,
2Namu tas ehele nup Isreel aiek, um ika ehele ra, Akumu aminjinaig aijaua um ahlap vai nyak an nopan upene eris ati, an nitai ahlap unyak, im nitai caig uri nitai ahlap unyak er ago an cap, nitai auanipin upene vai nyak.
3Namu ika ehele ra aiek, Nitai ahlap nigki er ago an cap, akumu ahlap vai Ihova aijaua; nikavaig, inhakli siip inyi ero et eteuc inmesese iran et ethi, um ti nitai has iran, irai iji adiat, par itai ahlap atnamud irai iji mesese.
4Namu ahlap aiek an hakli siip inyi ethi an nuhialeg, im lep an hakli siip inyi ethi an jupura;
5im lep omer inyi ethi irai flaur par itai ahlap an nitai caig, er aplamod pelaig an nahaijin ford irai hin an narakei mat.
6Nitai ahlap atnamud nigki irai iji mesese, eris tas alep vaig an lolan nedoon Saine, nitai ahlap atnamud vai Ihova, im nitai auanipin upene.
7Im nahaijin ford irai hin pan irai hakli siip yi ethi nitai ahlap umnyi: uhmu atladwi nide vaine vai Ihova an nuarin itap par itai ahlap umnyi.
8Namu lep ahlap aiek an hakli siip inyi eche an jupura: um lep ahlap an nitai ahlap an nitai caig im nitai ahlap umnyi et idivaig an nuhialeg, nitai ahlap er ago an cap, par itai auanipin upene vai Ihova.
9Im lep inhakli siip inyi ero an nadiat atumop, et eteuc inmesese et ethi ira rau, um ti nitai has ira rau, im lep omer inyi ero irai flaur er ago pelaig an narakei par itai ahlap an nitai caig, im lep nitai ahlap umnyi:
10nitai ahlap atnamud nigki irai iji adiat atumop asega, pan irai itai ahlap atnamud irai iji mesese, im nitai ahlap umnyi.
11Akumu lep ahlap vai Ihova aijaua an nitai ahlap atnamud an nupyi het unyimia; kurimatau takuras inyi ero, im siip atamaig inyi ethi; im inhakli siip inyi seven et eteuc inmesese et ethi ira ra um ti nitai has ira ra;
12im omer inyi eseij irai flaur par itai ahlap an nitai caig, er aplamod pelaig an narakei, pan irai kurimatau atamaig inyi ethi; im omer inyi ero irai flaur par itai ahlap an nitai caig, er aplamod pelaig an narakei, pan irai siip atamaig inyi ethi;
13im omer inyi ethi irai flaur er aplamod pelaig an narakei, par itai ahlap an nitai caig pan irai inhakli siip inyi ethi; par itai ahlap atnamud auanipin upene, nitai ahlap vai Ihova er ago an cap.
14Im nitai ahlap umnyi ura; inyi nahaijin hin irai nide vaine pan irai kurimatau atamaig inyi ethi, im nuarin dirt irai hin pan irai siip atamaig inyi ethi, im nuarin ford irai hin pan irai inhakli siip inyi ethi: nitai ahlap nigki irai iji mohoc asega irai iji mesese.
15Uhmu ahlap vai Ihova an hakli nanin inyi ethi par itai ahlap va nedo has, pan irai itai ahlap atnamud irai iji adiat, im nitai ahlap umnyi.
16Uhmu asjapicnaig va nahtaregdei atimi u Ihova an nadiat fortiind an mohoc uhup.
17Uhmu lep asjapicnaig um hag an nadiat fortiind an mohoc inig: uhmu caig nareto et ti leven iran ira adiat inyi seven.
18Inyi itap nasjapicnaig u atimi an nadiat uhup; akumu jim ago tah nauritai iran aijaua:
19ja akumu ahlap aijaua an nitai ahlap er ago an cap, par itai ahlap atnamud vai Ihova; kurimatau atamaig takuras inyi ero, im siip atamaig inyi ethi, im inhakli siip inyi seven et eteuc inmesese et ethi ira ra: inyi ti nitai has iran vai caua:
20inyi flaur er aplamod pelaig an narakei nitai ahlap ura an nitai caig: akumu ahlap aijaua irai omer inyi eseij pan irai kurimatau atamaig inyi ethi, im omer inyi ero pan irai siip atamaig inyi ethi;
21uhmu ahlap irai omer inyi ethi pan irai inhakli siip inyi ethi, um yetpan irai inhakli siip inyi seven:
22im lep nanin inyi ethi par itai ahlap va nedo has, nitai adahpoi nedo has unyimia.
23Akumu ahlap aijaua irai itai iji igki, im lep nitai ahlap atnamud an nuhialeg, inyi itai ahlap atnamud irai iji mesese nigki.
24Akumu ahlap aijaua inyi uce irai iji adiat ira adiat inyi seven, an nitai caig an nitai ahlap er ago an cap, nitai auanipin upene vai Ihova: uhmu idim ahlap iran im lep nitai ahlap atnamud irai iji mesese, im nitai ahlap umnyi.
25Inyi itap nasjapicnaig unyimia an nadiat sevend; akumu jim ago nauritai u naheca iran aijaua.
26Inyi lep itap nasjapicnaig unyimia an nadiat vai inhupnai itai, aku wit imiapam nitai ahlap mat an nitai caig vai Ihova, etu wit ti pan itac niji wiik unyimia; akumu jim ago nauritai u naheca iran aijaua,
27ja akumu ahlap aijaua an nitai ahlap atnamud, par auanipin upene vai Ihova; kurimatau atamaig takuras inyi ero, im siip atamaig inyi ethi, im inhakli siip inyi seven et eteuc inmesese et ethi ira ra;
28im nitai ahlap an nitai caig irai flaur er aplamod pelaig an narakei, omer inyi eseij pan irai kurimatau atamaig inyi ethi, im omer inyi ero pan irai siip atamaig inyi ethi,
29omer inyi ethi pan irai inhakli siip inyi ethi, um yetpan irai inhakli siip inyi seven;
30im inhakli nanin inyi ethi par itai ahlap vai caua.
31Akumu ahlap iran aijaua, im lep nitai ahlap atnamud irai iji mesese, im nitai ahlap an nitai caig, im nitai ahlap umnyi, etmu jim eteuc tah nitai has ira ra vai caua.
Currently Selected:
Numera Nuarin-tas alupas 28.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)