Numera Nuarin-tas alupas 21.
Nuarin-tas alupas 21.
1 Era auahas nup u Kenan a nup Isreel Horma. 4 Era asan tas ehti natimi, ja era ohocred, ara vai imyeuv acas. 7 Era wat ahidaig an liinmopora ara, er ago cehcehe ra an nimyeuv bras. 10 Niji atga acheiachei u nup Isreel. 21 Er auahas Saihon, 33 im lep Oc.
1IS atahaijeg a Erat natimarid u nup u Kenan, is amen aien an nuarin inig et ahes nuritoga iran, mika eris atga a nup Isreel an nefalaig iyehki eris atga iran a ilpu atimi ahilek inpece; is ago nedoa vai nup Isreel aien, um arop irai hal ra.
2Eris asan tas aktit a nup Isreel ehele Ihova, um ika, El et atcijaig nup igcaki aiek imi cama, ecrupu auahas ehni niji maliyum ura aijama.
3Is adai intas o nup Isreel a Ihova, um atcijaig nup u Kenan imi ra; eris auahas ehni ra ara im niji maliyum ura: is anvi nidan nuarin iyehki aien par ika Horma, (Nuarin eris auahas ehni).
4Eris ahes an nedoon Hor ara um atga an nefalaig u Injap cap, par ahparahed inpece Itom: is auatialidi alupas inliinmopoi atimi va nefalaig.
5Eris asan tas ehti natimi vai Atua, im lep Moses, um ika, Arus a uri aijaurau par iknipagki cama an pece Ijipt mika ecri emesmas aijama an namasacen? et ti nitai caig, um ti inwai; ecra lep esjum aijama va nitai caig eti ahgei inigki.
6Is abraig pan imyeuv acas a Ihova ehele atimi, eris aces atimi ara; eris lep emesmas a nup Isreel is ahinag.
7Eris apan natimi ehele Moses, um ika, Ecris ago nedo has aijama, ecris tas vai Ihova aijama, im lep vai euc; ugyi Ihova mika yi iknipagki imyeuv ehelema aien. Is ago nalaigaheni a Moses va atimi.
8Is ika a Ihova ehele Moses, Namu ago nalmui nimyeuv acas aiek, um atijai an nauincai: ja etu wit almoi tah eris aces yin, etpu umoh aien.
9Is ago nimyeuv bras a Moses, um atijai an nauincai; is wat aces tah natimi nimyeuv, is wat almoi nimyeuv bras aien, is umoh aien.
10Eris lep atga a nup Isreel, um atumop Obod.
11Eris lep ahes Obod ara um atga, um atumop Ije-abarim, an namasacen Moab an ridjai o un.
12Eris ahes eahki ara um atga, um atumop an niskanse Seret.
13Eris ahes eahki ara um atga, um atumop an nahaijin Amon itac, an namasacen an nehni vai inpece u nup Emor: et atga nofowai Amon an niblan pece Moab im Emor.
14Va nitai inigki eris aged an nitaasviitai va nedoa u Ihova, Nitai is ago a Ihova an Jap cap, im lep ui wai Amon,
15im lep u nofowai ui wai et asuol pan Ar, um asgeig pan an nahaijin pece Moab.
16Eris ahes eahki ara um yetpan Bier: nehpanwai nigki is tas vaig a Ihova ehele Moses, um ika, Asjapicnaig atimi aiek, ekpu alupai ra inwai ainyak.
17Eris acesaces nohranitai inigki a nup Isreel, um ika, Etmu ahlau ohua jai inwai; akumu acesaces nohranitai vaig aijaua:
18eris ucji nehpanwai a ilpu atimarid, eris ucji a ilpu atimi alupas u atimi vai intas u natimi tas alep irai iseuc ura. Eris ahes an namasacen ara um yetpan Matana:
19eris ahes Matana ara um yetpan Naheliel: eris ahes Naheliel ara um yetpan Bemod:
20eris ahes Bemod ara an niskanse iyehki et eteuc an pece Moab, um yetpan an lolan nedoon Pisca, et ehcatoh pan irai Jesimon.
21Eris abraig pan atimi ehele Saihon natimarid u nup Emor a nup Isreel, um ika,
22Ecrumu atga aijama an pece unyum: ecrupu eti ahidai cama aijama pan umamia, ka iraili okoro vaine unyimia; ecrupu eti umnyi inwai aijama iraili ehpai wai: ja ecrupu atga an nefalaig u natimarid aijama, um imihum pan an nopan iyehki ecrupu aipujaig inpece unyum aijama.
23Ja is acaiji nup Isreel a Saihon va eri jim atga ara an pece o un: is asjapicnaig ilpu dualep o un asega a Saihon, um apan par atapnes nup Isreel an namasacen: is yetpan Jehas aien, um ati nedoa vai nup Isreel.
24Eris auud yin a nup Isreel an nedoa, um ohuun inpece o un nahes vaig Amon um yetpan Jabok, um lep uhum pan inpece u nup Amon: ja is ehka nehni vai inpece u nup Amon.
25Eris atoraliak niji maliyum asega iji igki a nup Isreel: eris lep amen a nup Isreel irai iji maliyum u nup Emor; nikavaig, Hesbon im niji maliyum haklin asega iran.
26Is maliyum u Saihon natimarid u nup Emor Hesbon, is ago nedoa aien vai natimarid Moab itu acen, um atoraliak inpece asega o un um yetpan Amon.
27Va nitai inigki era ika a ilpu atimi tas ecsipece, Apam Hesbon, uhmu actaig imaliyum u Saihon um ago upene:
28Et mun ahes incap Hesbon, im nalaume u incap an maliyum u Saihon: et mun atnamud Ar an pece Moab, im lep ilpu atimi alupas irai iji uarin ijinies Amon.
29Kaiheuc vai caua, ak nup u Moab! erupu atiih a ilpu atimi u Kimos; is atcijaig ilpu halav atamaig o un aien, mika eri ilpu ohna ara, im ilpu halav atahig o un, mika uhpu imiapan ra ehele Saihon natimarid u nup Emor.
30Ecris asji ra aijama: era atiih a nup u Hesbon um yetpan Taibon, ecris uhpoditai aijama um yetpan Nofa, um lep yetpan Meteba.
31Eris amen a nup Isreel an pece u nup Emor.
32Is abra atimi a Moses par apan um almaijidjid Jaeser, eris atoraliak niji maliyum haklin iran ara, um ahlo nup Emor eris amen eahki ara.
33Eris ahidai ra ara um aridjai an nefalaig et yetpan Besan: is apan a Oc natimarid Besan, im lep ilpu dualep o un asega, um ati nedoa vai ra Etreai.
34Is ika a Ihova ehele Moses, Jim imtitai yin: ek mun ati yin ainyak an nikmam, im ilpu dualep o un asega, im inpece o un; napu ago nedo inig iran aiek as ago irai Saihon aiek natimarid u nup Emor, is amen Hesbon aien.
35Eris auud yin ara, im ilpu halav atamaig o un, im ilpu atimi o un asega, um eti imialep tah: eris ohuun inpece o un ara.
Currently Selected:
Numera Nuarin-tas alupas 21.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)