Levitikus Nuarin-tas alupas 8.
Nuarin-tas alupas 8.
1 Et ikni Eron, im ilpu hed o un a Moses. 14 Nitai ahlap ura va nedo has. 18 Nitai ahlap ura er atnamud. 22 Nanin atamaig va nikni ra vaig. 31 Nuarin im nopan u nikni ra vaig.
1IS tas a Ihova ehele Moses, um ika,
2Namu leh Eron aiek im lep ilpu hal o un, im napelumai ura, im narakei aspi, im tah kurimatau atamaig uri nitai ahlap va nedo has, im siip atamaig inyi ero, im nareto et ti leven iran an cat;
3um asjapicnaig atimi asega an neucse neom er asjapicnaig o un.
4Is ago a Moses is idivaig is asaig ehelen a Ihova; eris asjapicnaig natimi an neucse neom er asjapicnaig o un.
5Is ika a Moses ehele atimi, Is asaig a Ihova mika eri ago nitai inigki.
6Is imiapam Eron im ilpu hal o un a Moses, um yiri ra an wai.
7Is aso Eron a Moses an napelumai uhup, um ahid nitai ahid imi yin, um aso yin an napelumai itac, um ati efot iran, um ahid nitai ahid esjilid uri efot imi yin, um aktit ipjin iran;
8um ati nitai adahpoi inriti Eron iran: is lep ati Urim im Dummim aien an nitai adahpoi inritin.
9Is lep adgaig incat adgaig an nidjinin aien; um ati colt apalapal an cat adgaig an nahaijin uhup, korona itap marom; is idivaig is asaig a Ihova ehele Moses.
10Is leh narakei aspi a Moses, um aspi neom atga im niji itai asega iran, mika yi itap.
11Is eceseven ohaig an natau aien, um aspi natau im niji itai asega iran, im lep nelcau ereuc iran im intapnes, mika yi itap.
12Is atladwi narakei aspi an nidjini Eron aien, um aspi yin, mika yi itap aien.
13Is imiapam ilpu hal u Eron a Moses, um aso ra ira apelumai uhup, um ahid nitai ahid imi ra um adgaig incat adgaig ura; is idivaig is asaig a Ihova ehele Moses.
14Is lep imiapam kurimatau atamaig aien uri nitai ahlap va nedo has: eris ikni ikmara an nidjini kurimatau uri nitai ahlap va nedo has a Eron im ilpu hal o un.
15Eris wat atgei; is leh inja iran a Moses, um ati irai ipat an natau an nupsikman, um arehed mihtag, um ago upene natau, um atladwi inja an nohuun natau, mika yi itap, va uhpu ahlap iran.
16Is leh nagako asega aien ira auitin, im inhadin et amen an mopon, im nohwanispeheg is ero, im nagako iran, is atnamud a Moses an natau.
17Ja is atipagki kurimatau aien, im narasin, im nohun, im nohok o un, an nuarin amen u atimi, um atnamud itac; is idivaig is asaig a Ihova ehele Moses.
18Is imiapam siip atamaig aien uri nitai ahlap atnamud: eris lep ikni ikmara an nidjini siip atamaig a Eron im ilpu hal o un.
19Eris wat atgei; is lep ohan ja an natau a Moses, um arehed mihtag.
20Is ehtoplecoplec siip atamaig aien; is lep atnamud nidjinin a Moses, im niji uarin, im nagako iran.
21Is yiri nauitin im nikman im neduon an wai aien; is lep atnamud siip atamaig asega a Moses an natau: is itai ahlap atnamud is auanipin upene, im nitai ahlap vai Ihova er ago an cap; is idivaig is asaig a Ihova ehele Moses.
22Is lep imiapam siip atamaig is eche aien, siip atamaig va nikni ra vaig: eris ikni ikmara an nidjinin a Eron im ilpu hal o un.
23Eris wat atgei; is leh inja iran a Moses, um ati an tikgai Eron an matan, im lep an nupsikman meto an matan, im lep an nupseduon meto an matan.
24Is lep imiapam ilpu hal u Eron a Moses, um ati inja an tikgara an matara, im lep irai upsikmara meto an matara, im lep irai upseduora meto an matara: is lep ohan ja an natau a Moses, um arehed mihtag.
25Is leh nagako iran aien, im nilauon, im nagako asega ira auitin, im inhadin et amen an mopon, im nohwanispeheg is ero, im nagako iran, im neuhlin an matan:
26is lep leh nareto apalapal is ethi aien is ti leven iran, an cat is amen iran nareto is ti leven iran an nuhup u Ihova, im nareto acreacre is ethi is amen narakei iran, im biskit is ethi, um ikni an nagako, im lep neuhlin an matan:
27is ikni asega aien irai ikmai Eron, im lep irai ikmai ilpu hal o un, um ohaig jipe mika yi itai ahlap ohaig jipe an nuhup u Ihova.
28Is iknipagki irai ikmara a Moses, um atnamud an natau an nitai ahlap atnamud: eris ikni itai iji igki, mika yi itai auanipin upene: nitai ahlap vai Ihova nigki er ago an cap.
29Is leh neduon ritin a Moses um ohaig jipe, mika yi itai ahlap ohaig jipe an nuhup u Ihova: is ohuun nuarin inig a Moses irai siip atamaig va nikni ra vaig; is idivaig is asaig a Ihova ehele Moses.
30Is leh tah narakei aspi a Moses, im tah inja an natau, um ohaig Eron iran, im napelumai o un, im ilpu hal o un, im napelumai u ilpu hal o un; mika yi itap a Eron, im napelumai o un, im ilpu hal o un, im napelumai ura.
31Is ika a Moses ehele Eron im ilpu hal o un, Akumu atho nohun aijaua an neucse neom er asjipicnaig o un: um caig eahki, um asipiaig an nareto et amen an cat va nikni caua vaig, et idivaig kis asaig ainyak, um ika, Erumu caig a Eron im ilpu hal o un.
32Akumu lep atnamud an cap aijaua nuarin nohun im nuari areto et eled.
33Akumu jim alau ijo aijaua an neucse neom er asjapicnaig o un ira adiat inyi seven, um imihum pan an nopan iyehki, etpu ti pan itac niji adiat u nitap unyimia: akumu itap ira adiat inyi seven aijaua.
34Et mun ago aien an nadiat inig, et idivaig is asaig a Ihova, um ahlap vai caua.
35Va nitai inigki akumu amen aijaua an neucse neom er asjapicnaig o un, irai iji adiat im niji epig ira adiat inyi seven, um imiaiji intas alep u Ihova, va aki jim emesmas aijaua: et um uce intas alep eris asaig ehelek.
36Eris ago nitai iji igki asega a Eron im ilpu hal o un is asaig a Ihova ehele Moses.
Currently Selected:
Levitikus Nuarin-tas alupas 8.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)