Levitikus Nuarin-tas alupas 4.
Nuarin-tas alupas 4.
1 Nitai ahlap va nedo has er eti ato vaig, 3 va natimi ahlap, 13 va nup Isreel asega, 22 va natimi alupas, Ti vaig tah tup natimi.
1IS tas a Ihova ehele Moses, um ika,
2Namu tas ehele nup Isreel aiek, um ika, El et ago nedo has tah natimi, vaig tah intas alep o Ihova, va neti ato o un, um ago tah nedo inig et eti upene nago vaig:
3el et lep ago nedo has a natimi ahlap inig eris aspi yin, um imiahnag atimi; etmu imiapam ehele Ihova tah kurimatau atamaig takuras aien, et ti nitai has iran, par itai ahlap va nedo has o un.
4Etmu imiapam kurimatau iyehki aien an neucse neom er asjapicnaig o un an nuhup u Ihova; etmu lep ati nikman an nidjini kurimatau aien, um atgei kurimatau an nuhup u Ihova.
5Etmu leh inja irai kurimatau iyehki a natimi ahlap inig eris aspi yin, um imiapan an neom er asjapicnaig o un:
6etmu ahtaijuli nupsikman an ja iran a natimi ahlap, um eceseven ohan ja an nuhup u Ihova, u natcai apelumai an nuarin itap.
7Etmu atijai tah inja iran a natimi ahlap irai ipat an natau uri nitai auanipin upene an nuhup u Ihova, et amen anliin neom er asjapicnaig o un; ja uhmu atladwi se inja asega irai kurimatau iyehki an nohuun natau uri niji itai ahlap atnamud, et amen an neucse neom er asjapicnaig o un.
8Etmu atipagki nagako asega aien irai kurimatau iyehki, mika yi itai ahlap va nedo has; etmu atipagki nilvahilva et adahpoi nauitin aien, im nagako asega irai auitin,
9im nohwanispeheg et ero, im nagako iran, et amen an nijihgan, im inhadin et amen an mopon, im lep nohwanispeheg et ero,
10et idivaig eris atipagki irai kurimatau atamaig iyehki er ahlap iran va nigpa: etmu atnamud a natimi ahlap an natau uri nitai ahlap atnamud.
11Uhmu imiapan itac an nuarin amen iran natimi narasi kurimatau iyehki, im nemihtan asega, im nidjinin, im nikman ehro, im neduon ehro, im nauitin, im nohok o un, nohun asega marom,
12an nuarin lah, nuarin inig er ethan nohpa iran, um atnamud ira cai an cap: uhmu atnamud an nuarin inig er ethan nohpa iran.
13El era ago nedo has a nup Isreel asega, va neti ato ura, el et lep adenaig va atimi nitai iyehki; el era lep ago tah nedo inig ara vaig tah intas alep u Ihova et eti upene nago vaig, um amen nedo has ira ra;
14uhu wit ato nedo has inig eris ago ara, erumu ahlap irai kurimatau atamaig et ethi natimi asega va nedo has ura, um imiapam an nuhup u neom er asjapicnaig o un.
15Erumu ikni ikmara an nidjini kurimatau iyehki an nuhup u Ihova a ilpu atimi alupas u atimi: uhmu lep atgei kurimatau an nuhup u Ihova.
16Etmu imiapam tah inja irai kurimatau iyehki a natimi ahlap, eris aspi yin an neom er asjapicnaig o un:
17etmu ahtaijuli nupsikman an ja iran a natimi ahlap, um eceseven ohan ja iran an nuhup u Ihova, u natcai apelumai.
18Etmu lep atijai inja iran aien irai ipat an natau et amen an nuhup u Ihova, anliin neom er asjapicnaig o un, jam atladwi se inja asega an nohuun natau uri nitai ahlap atnamud, et amen an neucse neom er asjapicnaig o un.
19Etmu lep atipagki nagako asega iran aien, um atnamud an natau.
20Etmu ago irai kurimatau atamaig inig aien, et idivaig is ago irai kurimatau atamaig iyehki aien, eris ahlap iran va nedo has: etmu lep ahlap va nedo has ura a natimi ahlap, ja uhpu eti aru ira ra.
21Etmu imiapan itac kurimatau atamaig aien an nuarin amen iran natimi, um atnamud, et idivaig is atnamud kurimatau atamaig iyehki uhup aien: nitai ahlap nigki va nedo has u atimi.
22El et ago nedo has tah natimi alupas, vaig tah intas alep u Ihova Atua o un, va neti ato o un, um ago tah nedo inig et eti upene nago vaig, um amen nedo has iran;
23el et lep ato nedo has o un aien is ago aien; etmu imiapam nitai ahlap o un aien, inhaklin nanin atamaig et ti nitai has iran:
24etmu ati nikman aien an nidjini nanin iyehki, um atgei an nuarin er atgei nitai ahlap atnamud iran an nuhup u Ihova: nitai ahlap va nedo has nigki.
25Etmu leh inja irai itai ahlap va nedo has an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja iran an nohuun natau uri nitai ahlap atnamud.
26Etmu atnamud nagako asega iran aien an natau, et idivaig nagako irai iji itai ahlap va nigpa: etmu lep ahlap va nedo has o un a natimi ahlap, ja uhpu eti aru iran.
27El et ago nedo has tah tup natimi, vaig tah intas alep o Ihova, va neti ato o un, um ago tah nedo inig et eti upene nago vaig, um amen nedo has iran;
28el et lep ato nedo has o un aien is ago aien; etmu imiapam nitai ahlap o un aien, inhaklin nanin atahig et ti nitai has nau, va nedo has o un is ago aien.
29Etmu ati nikman aien an nidjini nitai ahlap va nedo has o un, um atgei nitai ahlap va nedo has o un an nuarin er atgei nitai ahlap atnamud iran.
30Etmu leh inja nan an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja asega iran an nohuun natau.
31Etmu atipagki nagako asega iran aien, et idivaig er atipagki nagako irai itai ahlap va nigpa; etmu lep atnamud a natimi ahlap an natau mika yi itai auanipin upene vai Ihova; etmu ahlap va nedo has o un a natimi ahlap, ja uhpu eti aru iran.
32Ja el et imiapam inhakli siip aien par itai ahlap va nedo has, etmu imiapam natahig aien et ti nitai has iran.
33Etmu ati nikman aien an nidjini nitai ahlap va nedo has o un, um atgei mika yi itai ahlap va nedo has an nuarin inig er atgei nitai ahlap atnamud iran.
34Etmu leh tah inja an nitai ahlap va nedo has an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja asega iran an nohuun natau:
35etmu atipagki nagako asega iran aien, et idivaig er atipagki nagako an hakli siip er ahlap iran va nigpa; etmu atnamud an natau a natimi ahlap, et idivaig niji itai ahlap er ago vai Ihova an cap: etmu ahlap va nedo has o un a natimi ahlap, ja uhpu eti aru iran.
Currently Selected:
Levitikus Nuarin-tas alupas 4.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)