Levitikus Nuarin-tas alupas 26.
Nuarin-tas alupas 26.
1 Intas alep vai niji atmasimai. 2 Vai nadiat im neom itap. 3 Intas acis yi alwai vai ra era apos niji tas alep u Atua ara. 14 Intas ahlaijaig va ra era imipalea niji tas alep u Atua ara. 40 Et ika a Atua yi imiehva ra sji ig era adumoij an liinmopora ara.
1AKUMU jim ago tah natmasimai imi caua aijaua, um jim aduwi imi caua tah nalmuitai, um jim aduwi tah nalmui atimi irai hat an pece unyimia, mika aki atpuse aijaua an nuhup ura: ek idim acaiji nedo inigki ainyak Ihova Atua unyimia.
2Akumu apos nadiat atumop unyak aijaua, um ago nedo ecen vai neom itap unyak: et uce intas alep unyak Ihova.
3El eka imiaiji intas unyak aijaua, um apos intas alep unyak, um ago;
4ekpu alupai caua incopda ainyak an nopan tau upene o un, etpu upene nohwai itai an nobohtan, etpu oho upene niji cai an pece.
5Akupu auud korn aijaua um yetpan an nopan iyehki eka ahtaijiraig nohwai vaine aijaua, akupu lep ahtaijiraig nohwai vaine aijaua um yetpan an nopan iyehki eka ahwaig upsiitai aijaua: akupu hag alupas aijaua um geije, um amen upene an pece unyimia.
6Ekpu ika ainyak eri amen igpa an pece unyimia, akupu asjeuc aijaua, um eti imtitaig tah natimi: ekpu ika ainyak inyi idim tiih an pece unyimia niji itai eklim edo irai pece has, im lep inig, inyi eti eteuc nedoa an pece unyimia.
7Akupu ahau ilpu atimi tak atimi iramia aijaua, erupu emesmas ara an nedoa an nuhup unyimia.
8Erupu ahau atimi et wun huntret natimi et faiv iramia, erupu esjilid ira atimi et wun dausant natimi et wun huntret iramia: erupu emesmas a ilpu atimi tak atimi iramia an nedoa an nuhup unyimia.
9Ekpu aktaktai upene vai caua ainyak, um ika aki asvalav aijaua, um ahinag; ekpu lep ati aktit intas etipup unyak ehelemia ainyak.
10Akupu caig niji itai hegaig itu aijaua, um imialau ijo niji itai hegaig itu, mika aki ati nitai caig tup pam eteuc.
11Ekpu ati neom atga unyak ehelemia ainyak: inyi eti amcel vai caua inliinmopok ainyak.
12Ekpu atga sjipe ehelemia ainyak; ekpu Atua unyimia ainyak, akupu lep ilpu atimi unyak aijaua.
13Ek Atua unyimia ainyak Ihova, kis iknipagki caua an pece Ijipt ainyak, mika aki jim ilpu aheca ura aijaua eti leh nimtan; ek mun asvi nitai arore an nitai ahelwei unyimia ainyak, um ika aki atga atoh aijaua.
14Ja el eka eti atahaijeg nyak aijaua, um eti imiaiji intas alep iji igki asega;
15el eka imipalea intas unyak aijaua, ka el et amcel vaig intas alep unyak inliinmopomia, mika aki eti imiaiji intas alep asega unyak aijaua, jam auahas intas etipup unyak:
16ekpu lep ago nedo inigki vai caua ainyak; nikavaig, ekpu ika ainyak aki imtitaig alupas aijaua, um arici, um ehri alupas, etpu apat nesganimtamia vaig, um ohocred inliinmopomia: akupu ahwaig upsiitai unyimia aijaua ja etpu takitai, erupu idim caig a ilpu atimi tak atimi iramia.
17Ekpu aat iramia ainyak, uhpu atgei caua an nuhup u ilpu atimi iramia: erupu esjilid iramia natimi iji ig era amcel vai caua ara; akupu aha aijaua etu wit eti ahau caua tah.
18El eka eti atahaijeg nyak aijaua va nitai iji igki asega, ekpu lep eceseven aru iramia ainyak va nedo has unyimia.
19Ekpu lep asvi nemda u inliinmopomia ijinies ainyak; ekpu ika ainyak yi idivaig aiurn nauanohatag unyimia, um idivaig bras inpece unyimia:
20etpu takitai nemda im nauritai unyimia: etpu lep eti ohwai itai inpece unyimia; etpu lep eti oho niji cai an pece unyimia.
21El eka imiisjisitai ehelek aijaua, um eti atahaijeg nyak; ekpu aketo ainyak um eceseven imiapam nohocred ehelemia et idivaig nedo has unyimia.
22Ekpu lep ika ainyak eri apam ehelemia niji itai eklim edo irai pece aleg, eri atoraliak ilpu hal unyimia, um auahas niji itai eklim edo irai pece auata upene unyimia, akupu eti elpat aijaua vai ra; etpu ahyuahyu niji efalaig unyimia.
23Ja el eka eti adumoij irai efalaig has unyimia aijaua vai nyak va nitai iji igki unyak, jam imiisjisitai ehelek;
24ekpu lep imiisjisitai ehelemia ainyak, um aketo um lep eceseven aru iramia va nedo has unyimia.
25Ekpu ati nedoa vai caua ainyak, um aru nimipalea intas etipup unyak unyimia: aku wit asjapicnaig aijaua irai maliyum unyimia, ekpu ati inmas has iramia ainyak; uhpu lep atcijaig caua imi ilpu atimi tak atimi iramia.
26Eku wit auahas nitai asjiraig nohumia ainyak, erupu atho nitai caig unyimia a ilpu takata et ten an mun uum et ethi ache, wat lep alupai caua niji itai hegaig erupu asjaaicnaig iran ara: akupu caig aijaua, jam eti geije iran.
27Ja el eka eti atahaijeg nyak aijaua va nitai iji igki asega, jam imiisjisitai ehelek;
28ekpu lep imiisjisitai ehelemia ainyak, um atavaitap; ekpu idim eceseven aru iramia ainyak, ainyak marom, va nedo has unyimia.
29Akupu caig nohui ilpu halav atamaig unyimia aijaua, akupu lep caig nohui ilpu halav atahig unyimia aijaua.
30Ekpu auahas niji uarin ijinies u ilpu atmas unyimia ainyak, um acaldei niji almuitai unyimia, um erekhaig jai ohumia ijinies irai ohui atmasimai unyimia, etpu amcel vai caua inliinmopok ainyak.
31Ekpu ika ainyak yi ahyuahyu niji maliyum unyimia, um lep ika yi umaruma niji uarin itap unyimia, ekpu eti lep ahgei nipin niji itai auanipin upene unyimia ainyak.
32Ekpu ika ainyak yi umaruma inpece unyimia: va nitai inigki erupu imiali a ilpu atimi tak atimi iramia iji ig erupu amen ara an pece unyimia.
33Ekpu imiterimterim caua ainyak ehele nup urai iji pece apat, um ahau caua an nedoa: etpu umaruma inpece unyimia, um ahyuahyu niji maliyum unyimia.
34Etpu eteuc niji adiat atumop an pece unyimia an nopan iyehki asega etpu umaruma inpece, um lep amen aijaua an pece u ilpu atimi tak atimi iramia; etpu atumop inpece an nopan iyehki, etpu lep eteuc niji adiat atumop iran.
35Etpu atumop inpece an nopan iyehki asega etpu umaruma inpece; vaig inig nikavaig, akis wat amen iran aijaua, is eti atumop inpece irai mesese atumop iran.
36Im lep ra sji igki eri eled ara iramia um umumoh, ekpu ika ainyak yi auatialidi inliinmopora ara irai iji pece u ilpu atimi tak atimi ira ra; erupu aha ara van motjan nerin cai et ahlaadaig nimtinjap; erupu aha ara vaig, et idivaig tah et aha aien va nedoa; erupu eropropse ara etu wit eti ahau ra tah.
37Erupu eropropjai jipe ara, et idivaig ilpu atimi emesmas an nedoa, etu wit eti ahau ra tah: akupu eti emda aijaua par imiisjis emda ehele ilpu atimi tak atimi iramia.
38Akupu emesmas aijaua ehele nup urai iji pece apat, akupu emesmas ehni aijaua an pece u ilpu atimi tak atimi iramia.
39Im lep ra sji igki eri eled ara iramia um umumoh an pece u ilpu atimi tak atimi iramia, erupu arici ara um emesmas va nedo has ura; erupu lep arici ara va nedo has u ilpu retpora.
40Ja el era asuptecnaig nedo has ura ara, im nedo has u ilpu retpora, im nedo imipalea ura eris imipalea intas unyak vaig ara, um lep imiisjisitai vaig ehelek;
41im lep inig, el era asuptecnaig ara mika kis imiisjisitai ehele ra ainyak um imiapan ra an pece u ilpu atimi tak atimi ira ra; el et upoupo inliinmopora eti aperitome an nopan iyehki, el era lep ika ara et upene neruvaig nedo has ura:
42ekpu imiehva intas etipup unyak ainyak ehele Jekob, im lep intas etipup unyak ehele Aisak, ekpu lep imiehva intas etipup unyak ainyak ehele Ebraham.
43Ekpu lep imiehva inpece ainyak, inpece inig marom eris udei ara, is eteuc iran niji mesese atumop an nopan iyehki is wat umaruma, eris wat eti amen iran ara, um yetpan an nopan iyehki erupu ika ara et upene neruvaig nedo has ura: vaig inig nikavaig, eris imipalea intas unyak ara, is lep amcel van tas alep unyak inliinmopora ara.
44Ja etpu idim uce vai ra; eru wit amen an pece u ilpu atimi tak atimi ira ra ara, inki eti atcijai ra ainyak, um eti amcel vai ra, par auahas ehni ra, um auahas intas etipup unyak ehele ra: ek idim Atua ura ainyak Ihova.
45Ja ekpu imiehva intas etipup ehele ilpu retpora ainyak vai ra, ilpu retpora marom kis iknipagki ra ainyak an pece Ijipt an nuhup u nup urai iji pece apat, mika ki Atua ura ainyak: ek Ihova ainyak.
46Niji tas im niji tas alep im niji tas asuptecnaig ji igki, is asaig a Ihova ehele Moses an lolan nedoon Saine, ja is par asuptecnaig aien ehele nup Isreel.
Currently Selected:
Levitikus Nuarin-tas alupas 26.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)