Levitikus Nuarin-tas alupas 16.
Nuarin-tas alupas 16.
1 Intas alep va natimi esjilid an nahlap, et mat apan anliin nuarin itap esjilid aien. 11 Nitai ahlap va nedo has vai yin. 15 Nitai ahlap va nedo has va atimi. 20 Nanin inig er atcijaig. 29 Nasjapicnaig et ethi irai iji mesese mika eri ahlap vai nup Isreel.
1IS ti pan itac inmas o ohwat hal u Eron eris ahlap arau an nuhup u Ihova, um mas, ja is par tas a Ihova ehele Moses;
2is ika a Ihova ehele Moses, Namu asaig aiek ehele Eron etwam, mika yi jim apan aien an nuarin itap irai iji adiat, anliin natcai apelumai an nuhup u nitai atapnes an nelcau et amen intas alep iran; va yi jim mas aien: ekpu idim ehcohos an napat ainyak ijinies an nitai atapnes.
3Etmu ham a Eron an nuarin itap inyi uce: etmu imiapam kurimatau atamaig takuras aien uri nitai ahlap va nedo has, im siip atamaig uri nitai ahlap atnamud.
4Etmu aso yin aien an napelumai uhup et itap, im incetpon neduon, um ahid nitai ahid apelumai, um adgaig incat adgaig apelumai: napelumai itap ji igki; va nitai inigki etmu yiri nohun an wai aien, ja par aso yin iran.
5Etmu lucsei ehele nup Isreel aien inhakli nanin inyi ero, uri nitai ahlap va nedo has, im siip atamaig inyi ethi, uri nitai ahlap atnamud.
6Etmu leh kurimatau atamaig takuras o un a Eron, um ahlap iran vai yin, um adahpoi nedo has o un, im ilpu hal o un.
7Etmu lep leh nanin et ero erahki aien, um ikni an nuhup u Ihova an neucse neom er asjapicnaig o un.
8Etmu edaig niji itai asjaaicnaig an nanin erahki aien; nitai asjaaicnaig yi ethi vai Ihova, im lep yi ethi vai nanin eri atcijaig.
9Etmu leh nanin inig a Eron et yetpan iran nitai asjaaicnaig u Ihova, um ahlap iran nitai ahlap va nedo has.
10Ja uhmu ati an nuhup u Ihova nanin inig et umoh is yetpan iran nitai asjaaicnaig an nanin eri atcijaig, mika eri asa nigpa iran, ja par atcijaig mika yi atga o un, um apan an namasacen.
11Etmu lep leh kurimatau atamaig takuras a Eron nitai ahlap va nedo has o un, um ahlap vai yin, im ilpu hal o un, um atgei kurimatau atamaig takuras nitai ahlap va nedo has o un:
12etmu lep leh nipjinitai aien er atnamud nitai auanipin upene iran, um leh inhumla cap iran an natau an nuhup u Ihova, etmu lep ohua nikman ero an nitai auanipin upene eris ehtoplecoplec, um imiapan anliin natcai apelumai:
13etmu ati nitai auanipin upene an cap aien an nuhup u Ihova, va etpu ataluopni pam intapnes an nelcau, et amen intas alep iran nadran nitai auanipin upene, vai yi jim mas aien:
14etmu leh inja irai kurimatau iyehki aien, um ohaig an nupsikman an tapnes an ridjai o un; etmu eceseven ohan ja an nupsikman aien an nuhup u intapnes.
15Etmu lep atgei nanin uri nitai ahlap va nedo has aien va atimi, um imiapan inja iran anliin natcai apelumai, um ago an ja iran is idivaig is ago an ja irai kurimatau iyehki aien, um ohaig ijinies an tapnes, im lep an nuhup u intapnes:
16etmu ahlap aien va nuarin itap, vai inhas irai up Isreel, im nedo ahnag ura irai edo has asega ura: etmu lep ago inyi uce aien va neom er asjapicnaig o un, et amen ehele ra, an niblan edo has ura.
17Etmu jim amen tah natimi an neom er asjapicnaig o un, etu wit apan aien anliin neom, um ahlap an nuarin itap, um imihum pan an nopan iyehki, etpu alau ijo aien, um ahlap vai yin, im ilpu hal o un, im nup Isreel asega.
18Etmu alau ijo aien u natau an nuhup u Ihova um ahlap vaig; etmu leh inja irai kurimatau iyehki aien, im inja an nanin iyehki, um ati irai ipat an natau, um arehed mihtag.
19Etmu eceseven ohan ja iran an nupsikman aien, um ago adicinadicin, um ika yi upene va nedo has u nup Isreel.
20Etmu ahlap ehni aien vai nuarin itap, im neom er asjapicnaig o un, im lep natau, ja par imiapam nanin umoh:
21etmu ikni nikman ero a Eron an nidjini nanin umoh, um asuptecnaig iran nedo has asega u nup Isreel, im nedo ahnag asega ura an nedo has asega ura, um iknijai an nidjinin, um imiapan nanin an nikmai natimi ato itai an namasacen:
22etmu lep apos pan nedo has asega ura nanin an nuarin umaruma: etmu lep atcijaig nanin an namasacen aien.
23Etmu apan a Eron anliin neom er asjapicnaig o un, um iknipagki napelumai iji ehki is aso yin iran aien, is wat apan aien an nuarin itap, um udei eahki:
24etmu yiri nohun aien an wai an nuarin itap, um aso yin an napelumai o un, um alau ijo, um ahlap an nitai ahlap atnamud o un, im nitai ahlap atnamud va atimi, um asa nigpa vai yin, im lep va atimi.
25Ja etmu atnamud nagako an nitai ahlap va nedo has aien an natau.
26Etmu yiri napelumai o un aien is atcijaig nanin apos nedo has aien, um yiri nohun an wai, ja par apam an nuarin amen u atimi.
27Uhmu iknipagki an nuarin amen u atimi kurimatau atamaig uri nitai ahlap va nedo has, im nanin uri nitai ahlap va nedo has, eris imiapan inja iran par asa nigpa an nuarin itap; um atnamud itac narasirau an cap, im nohurau, im nohok urau.
28Etmu yiri napelumai o un aien et atnamud aien, um ereuc an wai, ja par apan an nuarin amen u atimi.
29Intas alep imi caua nigki irai iji mesese: nikavaig, akumu ehcerucai caua aijaua an nadiat tend an mohoc sevend, um jim ago tah nauritai iran, kit natimi an pece, ka natimi an taka pece et amen ehelemia aien:
30etmu ahlap vai caua a natimi ahlap an nadiat iyehki, um ago adicinadicin caua, mika aki upene aijaua va nedo has asega unyimia an nuhup u Ihova.
31Inyi adiat atumop imi caua: akumu lep ehcerucai caua aijaua vai intas alep irai iji mesese.
32Im natimi ahlap inig etpu aspi yin aien, um ati par ago nauritai u natimi ahlap, um isjeupigmoig etman, etmu ahlap aien um aso yin an napelumai yilyil o un, napelumai itap marom:
33etmu ahlap aien va nuarin itap, etmu lep ahlap aien va neom er asjapicnaig o un, im natau, etmu lep ahlap aien vai ilpu atimi ahlap, im lep va atimi asega.
34Intas alep imi caua nigki irai iji mesese, mika eri ecethi ahlap vai nup Isreel, va nedo has asega ura irai iji mesese. Is ago a Moses is idivaig is asaig ehelen a Ihova.
Currently Selected:
Levitikus Nuarin-tas alupas 16.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)