Josua Nuarin-tas alupas 7.
Nuarin-tas alupas 7.
1 Eh auud nup Isreel Eai. 6 Intas ehti u Josua. 10 Et asuptecnaig ehelen a Atua nauritai inig yi ago aien. 16 Eh leh Ekar an nitai asjaaicnaig. 19 Intas o un par asuptecnaig nedo o un. 22 Eh auahas yin im niji itai asega o un an niskanse Ekar.
1JA eris ago nedo has a nup Isreel vai itai itap: is lucsei itai itap a Ekar inhal u Karmai, inhal u Sabtai, inhal u Sira mapoi Juta: is edemda a Ihova vai nup Isreel.
2Is abrai atimi a Josua mika eri ahes Jeriko ara, um apan Eai, ubutpotet pan Bed-even, an nahaijin Bedel an ridjai o un, um ika ehele ra, Akumu aridjipan aijaua um almoi inpece. Eris aridjai ara um almoi Eai.
3Eris lep adumoij pan ehele Josua ara, um ika ehelen, Erumu jim aridjipan natimi asega; erumu aridjipan natimi inyi tu dausant ka dri dausant ache, um auud nup Eai; erumu jim ohocred um apan eahki natimi asega; eri eti elpat ara.
4Eris aridjipan eahki natimi is dri dausant ira ra: eris aha ara an nuhup u nup Eai.
5Eris atgei natimi is dirte siks ira ra a nup Eai: eris ahes an neucse nathatahau ara um ahau ra um yetpan Sebarim, um auud ra an nasuol vaig ura: va nitai inigki is ahga inliinmopoi atimi um idivan wai.
6Is ahpati napelumai o un a Josua, um atpuse an nobohtan an nuhup u nelcau u Ihova um yetpan an jupura, aien im ilpu atimi alupas u nup Isreel, um atijai inmah irai idjinira.
7Is ika a Josua, Awe! ak Ihova Atua unyima, as uri aiek par imialgauwaig atimi iji igki Jortan, um atcijaig cama pan irai up Emor, mika eri auahas cama? el is upene vai cama, el ecris amen aijama an nahaijin Jortan igcapan!
8Ak Ihova, inki asan he ainyak, era wat aha a nup Isreel vai ilpu atimi tak atimi ira ra!
9Erupu ato a nup u Kenan, im lep natimi asega an pece, um ahtag pam irama, um auahas ehni nidama an nobohtan: napu lep ago inhe aiek va nidam esjilid?
10Is tas a Ihova ehele Josua, um ika, Namu atidai aiek; na a uri aiek par atpuh an nesganimtam?
11Eris ago nedo has a nup Isreel, eris lep imipalea intas alep unyak ara kis asaig ehele ra ainyak: eris lucsei itai itap ara, um ehnegitai, um lep ateri, um idim ikni irai aga ura.
12Va nitai inigki is ehka vai nup Isreel natidai vaig an nuhup u ilpu atimi tak atimi ira ra, ja eris aha ara vai ilpu atimi tak atimi ira ra, vai intavaitap unyak vai ra: inki eti lep amen ehelemia ainyak, el eka eti iknipagki ehelemia aijaua niji itai itap.
13Namu atidai aiek, um yecrei atimi, um ika, Akumu yecrei caua aijaua vaig imraig: et ika a Ihova Atua u nup Isreel, Et amen ehelemia niji itai itap, ak nup Isreel: inyi ehka vai caua natidai vaig an nuhup u ilpu atimi tak atimi iramia, um imihum pan an nopan iyehki akupu iknipagki niji itai itap ehelemia aijaua.
14Va nitai inigki uhmu imiapam caua an nuhialeg et idivaig nup urai elcau unyimia: erumu apam a nup urai elcau iji ig et ehtai ra a Ihova, et idivaig ilpu eteuc ira ra; erumu lep apam a ilpu eteuc iji ig et ehtai ra a Ihova, et idivaig nup urai imnim ura; erumu lep apam a nup urai imnim iji ig et ehtai ra a Ihova, et idivaig natimi ira ra, athi um athi ehni.
15Uhmu atnamud an cap natimi inig im niji itai o un, et amen ehelen niji itai itap an nehtai yin vaig: vaig inig nikavaig, et mun imipalea intas etipup u Ihova aien, um lep ago nedo ahnag ehele nup Isreel.
16Is atidai a Josua an nuhihialeg, um imiapam nup Isreel irai elcau ura; eris ehtai ilpu mapoi Juta:
17is imiapan ilpu eteuc irai ilpu mapoi Juta aien; eris ehtai ilpu eteuc u Sira: is imiapan ilpu eteuc u Sira aien irai up urai imnim ura; eris ehtai nup urai imnim u Sabtai:
18is imiapan nup urai imnim u Sabtai aien ira atimi ura, athi um athi ehni; eris ehtai Ekar, inhal u Karmai, inhal u Sabtai, inhal u Sira, mapoi Juta.
19Is tas a Josua ehele Ekar, um ika, Ak inhal unyak, ek ugyi euc ainyak, mika an imiahpas Ihova Atua u nup Isreel aiek, um asuptecnaig ehelen; um lep asaig ehelek nedo unyum; jim ateri vai nyak.
20Is tas a Ekar ehele Josua, um ika, Kis idim ago nedo has ainyak vai Ihova Atua u nup Isreel, is idim uco nedo unyak:
21kis wat ecetai irai aga ainyak napelumai Babelon esjilid, im sikel irai silver is tu huntret, im inuari colt is ethi is sikel is fifte nopoc iran, is has irak ainyak, um lucsei, ja er adenaig an nobohtan juju an neom atga unyak, im lep silver ithan.
22Is abrai atimi a Josua, eris athut pan an neom atga o un ara; eris idim adenaig anliin neom atga o un, im lep silver ithan.
23Eris lucsei itai iji igki ara juju an neom atga o un, um imiapan ehele Josua, im lep nup Isreel asega, um ikni an nuhup u Ihova.
24Eris leh Ekar mapoi Sira a Josua, im nup Isreel asega, im silver, im napelumai, im inuari colt, im ilpu halav atamaig o un, im ilpu halav atahig o un, im kurimatau o un, im togke o un, im siip o un, im neom atga o un, im niji itai asega o un: eris imiapan ra ara an niskanse Ekar.
25Is tas a Josua, um ika, As a uri aiek par imiedohalav cama? etpu imiedohalav euc a Ihova an nadiat inigki. Eris asji yin irai hat a nup Isreel asega, um atnamud ra an cap, eris wat asji ehni ra ara irai hat.
26Eris atijai ijinies iran ara niji irai hat alupas, et lep amen an nopan inig. Is lep tiih nedemda esjilid u Ihova. Va nitai inigki eris anvi nidan nuarin iyehki par ika. Niskanse Ekar, um imihum pam an nopan inig.
Currently Selected:
Josua Nuarin-tas alupas 7.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)