Josua Nuarin-tas alupas 4.
Nuarin-tas alupas 4.
1 Er ikni atimi et twelv mika eri lucsei inhat et twelv an nauinwai Jortan va nitai imiehva. 9 Eh ikni inhat et twelv et eche an nuarin juju Jortan. 10, 19 Era algaunyi Jortan natimi. 14 Et imiaridjai Josua a Atua. 20 Eh ikni inhat iji ehki et twelv Cilcal.
1ERIS algaunyi ehni Jortan natimi asega, ja is par tas a Ihova ehele Josua, um ika,
2Namu aniv natimi et twelv aiek ira atimi, natimi yi ethi an nelcau et ethi,
3um tas ehele ra, um ika, Akumu lucsei inhat inyi twelv aijaua juju irai Jortan, an nuarin iyehki era mun aiji aktit iran niji eduei ilpu atimi ahlap, um ahelwei, um ikni an nuarin amen unyimia, akupu asjeuc iran aijaua an nepig inigki.
4Is ahlaig a Josua va atimi is twelv iji ehki, is aniv ra aien irai up Isreel, natimi is ethi an nelcau is ethi:
5is tas ehele ra a Josua, um ika, Akumu algaunyi aijaua, um yetpan an nuarin juju irai Jortan an nuhup u nelcau u Ihova Atua unyimia, akumu lep lucsei inhat aijaua asega, um ahelwei, et idivaig niji elcau u nup Isreel:
6inyi itai asjaaicnaig imi caua nigki, eru wit ahodaig a ilpu hal unyimia an taka opan, um ika, Neveh hat iji igki unyimia?
7Akumu asuptecnaig ehele ra aijaua, um ika, Eris athasgi inwai Jortan an nuhup u nelcau is amen iran intas alep u Ihova; eris wat imialgaunyi Jortan, is athasgi inwai Jortan: inyi itai imiehva imi nup Isreel inhat iji igki irai iji mesese.
8Eris ago a nup Isreel is idivaig is asaig ehele ra a Josua, um lucsei inhat is twelv an nuarin juju Jortan, is idivaig is asaig a Ihova ehele Josua, is tup apapa pan irai iji elcau u nup Isreel, um imiapan an nuarin iyehki eris asjeuc iran ara, um ikni eahki.
9Is lep ikni inhat is twelv a Josua juju irai Jortan, an nuarin iyehki eris aiji iran niji eduei ilpu atimi ahlap, eris apos nelcau ara is amen iran intas alep: is amen eahki um imihum pam an nopan inig.
10Eris idim aiji juju irai Jortan a ilpu atimi ahlap eris apos nelcau ara, um imihum pan an nopan iyehki eris ago ehni niji itai asega is asaig a Ihova ehele Josua, mika yi asuptecnaig ehele atimi aien, is idivaig niji itai asega is asaig a Moses ehele Josua: eris auroauro natimi um algaunyi.
11Eris algaunyi ehni natimi asega, ja eris par algaunyi a ilpu atimi ahlap, um apos nelcau u Ihova, an nuhup u atimi asega.
12Eris atga um uhup irai up Isreel um apos nij va atimi, a ilpu mapoi Ruben, im ilpu mapoi Cat, im nahaiji ilpu mapoi Manasi, et idivaig is asaig ehele ra a Moses:
13eris algaunyi pan an nuarin marara Jeriko natimi is forte dausant, an nuhup u Ihova, um apos nij va atimi par ago nedoa.
14Is ati natimi alupas irai Josua a Ihova an nadiat iyehki an nuhup u nup Isreel asega; eris imtitai yin ara, is idivaig eris imtitai Moses ara, irai iji adiat asega is umoh aien.
15Is tas a Ihova ehele Josua, um ika,
16Namu asaig ehele ilpu atimi ahlap iji ig aiek, era apos nelcau ara et amen iran intas alep, mika eri ahes Jortan ara um aridjipam.
17Is tas a Josua ehele ilpu atimi ahlap, um ika, Akumu ahes Jortan aijaua um aridjipam.
18Eris wat ahes Jortan a ilpu atimi ahlap iji ig, eris apos nelcau ara is amen iran intas alep u Ihova, um aridjai, eris wat lep atise nugnya eduora an nobohtan mese a ilpu atimi ahlap, is lep adumoij inwai Jortan an nuarin o un, um atah an nahaijin im lep nahaijin, is idivaig itu.
19Eris ahes Jortan natimi, an nadiat tend an mohoc uhup, um atumop Cilcal, an nahaijin Jeriko an ridjai o un.
20Is ikni eahki Cilcal a Josua inhat is twelv iji ehki, eris lucsei Jortan ara.
21Is tas ehele nup Isreel aien, um ika, Eru wit ahodai etmara an taka opan a ilpu hal unyimia, um ika, Neveh hat iji igki!
22Akumu asuptecnaig ehele ilpu hal unyimia aijaua, um ika, Eris algaunyi Jortan inigki a nup Isreel an nobohtan mese.
23Is ika a Ihova Atua unyimia yi ame inwai Jortan an nuhup unyimia, um imihum pan an nopan iyehki akis algaunyi ehni aijaua, is idivaig is ago a Ihova Atua unyimia an Jap cop, is ika aien yi ame an nuhup uja um imihum pan an nopan iyehki intis algaunyi akaija:
24mika eri ato natimi asega an nobohtan mika et emda nikmai Ihova: va akupu imtitai Ihova Atua unyimia aijaua irai iji adiat.
Currently Selected:
Josua Nuarin-tas alupas 4.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)