Josua Nuarin-tas alupas 14.
Nuarin-tas alupas 14.
1 Eri leh niji pece ura irai itai asjaaicnaig a nup urai elcau et nain im, nahaiji elcau. 6 Et leh Hibron a Keleb va naiheuc vai yin.
1ERIS ohuun inpece iji igki a nup Isreel an pece Kenan, eris ahaig jipe ira ra a Eliesar natimi ahlap, im Josua inhal u Nun, im ilpu atimi alupas esjilid irai iji elcau u nup Isreel.
2Eris ahaig inpece irai itai asjaaicnaig, irai elcau is nain im nahaijin, et idivaig is asaig a Ihova irai Moses.
3Is alupai nup an nelcau is ero im nup an nahaijin nelcau inpece ura a Moses an nahaijin Jortan igcapan: ja is eti alupai ilpu mapoi Livai tah inpece imi ra pan ira ra.
4Eris up urai elcau is ero a ilpu mapoi Josef, Manasi im Ifreem: eris lep eti alupai ilpu mapoi Livai tah nuarin eri ohuun ara an pece, niji maliyum ache par amen iran, im lep nobohtan arehed iran va niji itai eklim edo irai pece ura im niji itai ura.
5Eris ago a nup Isreel, is idivaig is asaig a Ihova ehele Moses, um ahaig inpece.
6Eris apan Cilcal ehele Josua a ilpu mapoi Juta: is tas ehelen a Keleb inhal u Jifunni nup u Kines, um ika, Na ato aiek nitai iyehki, is asaig a Ihova ehele Moses natimi u Atua vai nyak, im lep vai euc, Ketes-barnea.
7Is eteuc inmesese is forte irak an nopan iyehki, is abrai nyak a Moses naheca u Ihova, mika ki ahes Ketes-barnea ainyak um apan um almaijidjid inpece; kis lep imiapan intas ehelen ainyak is idivaig is amen an liinmopok.
8Ja eris auahas inliinmopoi atimi a ilpu etwak eris ahced nyak ara: ja kis apitac asega Ihova Atua unyak ainyak.
9Is tas emda a Moses an nadiat iyehki, um ika, Napu idim ohuun inpece iyehki aiek as atga iran! aiek, im lep ilpu mapom irai iji mesese, as apitac asega Ihova Atua unyak aiek.
10Is idim imiatumumoh nyak a Ihova irai mesese is forte im faiv, et idivaig is asaig aien, an nopan iyehki is asan tas inigki ehele Moses a Ihova, eris wat atga an namasacen a nup Isreel; et idim eteuc inmesese et eete im faiv irak an nadiat inigki.
11Ek lep emda ainyak an nadiat inigki, et idivaig kis emda ainyak an nopan iyehki is abrai nyak a Moses: et idivaig nemda unyak an nopan iyehki nemda unyak an nopan inig, par ago nedoa, im hal itai.
12Namu alupai nyak nedoon inigki aiek, is tas vaig a Ihova an nopan iyehki; as atahaijeg aiek an nopan iyehki mika eris amen eahki a nup Enak, um lep esjilid niji maliyum um eteuc nathatahau iran: el et amen ehelek a Ihova, ekpu emda ainyak par ahlo ra, et idivaig is asaig a Ihova.
13Is asan tas acis yi alwai Keleb inhal u Jefunni a Josua, um alupai yin Hibron mika yi ohuun aien.
14Is ohuun Hibron a Keleb inhal u Jefunni nup u Kines um imihum pam an nopan inig, va nedo o un, nikavaig, is apitac asega Ihova Atua u nup Isreel aien.
15Nidai Hibron itu acen Kirjad-arba; is atimi emda a Arba irai up Enak. Is atumop inpece va nedoa.
Currently Selected:
Josua Nuarin-tas alupas 14.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)