Eksotus Nuarin-tas alupas 7.
Nuarin-tas alupas 7.
1 Et ago emda inliinmopoi Moses a Atua mika yi apan ehele Fero. 7 Niji mesese irai Moses. 8 Et eteuc nimyeuv niseuc o un. 11 Era ago nitai imiali et idivaig nigki a ilpu atimi araces. 13 Er ago ipjin inliinmopoi Fero. 14 Intas o Atua imi Fero. 19 Et eteuc inja irai itai nofowai.
1IS ika a Ihova ehele Moses, Ek mun idim ati euc ainyak mika an Atua aiek imi Fero: etpu lep asuptecnaig intas unyum a Eron etwam.
2Namu asan tas asega iji igki aiek ek asaig ehelum ainyak: etmu lep asaig ehele Fero a Eron etwam, mika yi abraig pan nup Isreel aien an pece o un.
3Ekpu ago ipjin inliinmopoi Fero ainyak, um ago niji itai asjaaicnaig unyak inyi ahinag, im niji itai imiali unyak an pece Ijipt.
4Ja etpu eti atahaijeg intas unyimirau a Fero, mika ekpu ati nikmak ainyak an pece Ijipt, um iknipagki ilpu eucsupo unyak, im ilpu atimi unyak, nup Isreel marom, an pece Ijipt, um aru alupas ira ra.
5Erupu ato a nup Ijipt mika ek Ihova ainyak, eku wit atgeig yi apidi nikmak ainyak an pece Ijipt, um iknipagki nup Isreel ehele ra.
6Erus idim ago a Moses im Eron, is idivaig is asaig ehele rau a Ihova.
7Is eteuc inmesese is eete irai Moses, im inmesese is eete dri irai Eron, an nopan iyehki erus tas ehele Fero arau,
8Is tas a Ihova ehele Moses im Eron, um ika.
9Etu wit tas ehelemirau a Fero, um ika, Arumu ehvaig nitai asjaaicnaig aijaurau: namu tas ehele Eron aiek, um ika, Leh niseuc unyum aiek, um ethaigse an nuhup u Fero, etpu imyeuv.
10Erus apan a Moses im Eron ehele Fero, um ago is idivaig is asaig ehele rau a Ihova: is ethaigse niseuc o un a Eron an nuhup u Fero, im lep an nuhup u ilpu aheca o un, is um imyeuv.
11Is lep asjapicnaig ilpu atimi arapakau a Fero, im ilpu atimi araces: eris lep ago nitai inigki a ilpu atimi araces an pece Ijipt an nedo apat ura.
12Eris ethaigse niji iseuc ura ara asega, is um imyeuv: ja is atleg niji iseuc ura niseuc u Eron.
13Is ago ipjin inliinmopoi Fero aien, va nitai inigki is eti atahaijeg intas urau aien; is idivaig is asaig a Atua.
14Is ika a Ihova ehele Moses, Et ipjin inliinmopoi Fero, et acaiji atimi aien va eri jim atga ura ara.
15Namu apan aiek ehele Fero an nuhialeg; et apan aien u inwai; namu aiji aiek an nohmun nofowai, um aitgai yin; namu lep apos an nikmam niseuc iyehki aiek is lep imyeuv.
16Namu ika ehelen aiek, Is abraig pam nyak ehelum a Ihova Atua u nup u Hibru, um ika, Namu atcijaig ilpu atimi unyak aiek, mika eri apan ara um ahlap irai iji itai ahlap vai nyak an namasacen: ja as esjum aiek par atahaijeg um imihum pam an nopan inig.
17Ja et ika a Ihova, Napu ato aiek mika ek Ihova ainyak, va nitai inig, nikavaig, ekpu auud inwai ainyak an nofowai an niseuc inigki an nikmak, ja etpu ja.
18Erupu emesmas numu an nofowai, etpu lep epeuv nofowai; erupu amcel vai inwai an nofowai a nup Ijipt, um eti umnyi.
19Is ika a Ihova ehele Moses, Namu ika ehele Eron aiek, Leh niseuc unyum aiek, um atgeig yi apidi nikmam ijinies irai iji wai Ijipt, irai eucsen wai ura, im netpen ura, im lep inwai asega ura, va etpu ja; etpu lep eteuc inja an pece Ijipt asega, irai iji elcau ura, im lep irai ipjihat.
20Erus ago nedo inigki a Moses im Eron is asaig a Ihova; is alcacsei jai niseuc o un aien, um auud inwai an nofowai, an nuhup u Fero, im lep an nuhup u ilpu aheca o un; is um ja inwai asega an nofowai.
21Eris emesmas numu an nofowai; is epeuv nofowai, is ehka vai nup Ijipt numnyi vaig inwai an nofowai; is eteuc inja an pece Ijipt asega.
22Eris lep ago nitai inigki a ilpu atimi araces an pece Ijipt an nedo apat ura: is ipjin inliinmopoi Fero, is eti atahaijeg intas urau aien; is idivaig is asaig a Ihova.
23Is ahidai yin a Fero um apan an neom o un, ja is lep eti aktaktai nitai inigki aien.
24Eris ucji an nahaijin nofowai a nup Ijipt asega, um ahilek inwai lumara; is ehka vai ra numnyi vaig inwai an nofowai.
25Is auud nofowai a Ihova, ja is par ti pan itac nadiat is seven.
Currently Selected:
Eksotus Nuarin-tas alupas 7.: ABO
Highlight
Share
Copy
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)