Eksotus Nuarin-tas alupas 40.
Nuarin-tas alupas 40.
1 Et tas alep a Atua mika eri athai neom apelumai, 9 um aspi iran, 13 um ikni Eron im ilpu halav atamaig o un. 16 Et ago niji itai asega a Moses et idivaig is tas alep a Atua. 34 Et ataluopni neom er asjapicnaig o un napat.
1IS tas a Ihova ehele Moses, um ika,
2Namu athai neom apelumai aiek, neom er asjapicnaig o un marom, an nadiat uhup an mohoc uhup.
3Namu ati nelcau iran aiek et amen intas alep iran, um atapin nelcau an napelumai atapin.
4Namu imiapan nefata anliin neom aiek, um ikni upene nitai iji igki eri ikni iran; um lep imiapan nitai atijai incap alahala iran, um atni lamp iran.
5Namu ati natau colt aiek er atnamud nitai auanipin upene iran, an nuhup u nelcau et amen intas alep iran, um lep athai napelumai atapin neucse neom atga.
6Namu ati natau uri niji itai ahlap aiek er atnamud an nuhup u neucse neom atga, neom er asjapicnaig o un.
7Namu ati nelcau ereuc iran aiek an niblan neom er asjapicnaig o un im natau, um ati inwai iran.
8Namu athai niji itai atapin nokoro aiek, um arehed mihtag, um athai napelumai atapin neucse nah.
9Namu leh narakei aspi aiek, um aspi neom atga im niji itai asega iran, mika yi itap im niji itai asega iran; etmu idim itap.
10Namu aspi natau uri niji itai ahlap aiek, er atnamud im niji itai asega urin, mika yi itap natau: etmu idim itap natau.
11Namu aspi nelcau ereuc iran aiek im intapnes, mika yi itap.
12Namu imiapan Eron im ilpu hal o un aiek, an neucse neom er asjapicnaig o un, um yiri ra an wai.
13Namu aso Eron aiek ira apelumai itap, um aspi yin, mika yi itap aien; va etpu ago nauritai u natimi ahlap aien vai nyak.
14Namu imiapan ilpu hal o un aiek, um aso ra ira apelumai uhup:
15namu lep aspi ra et idivaig as aspi etmara aiek, mika eri ago nauritai u ilpu atimi ahlap vai nyak ara: eri aspi ra mika eri ago nauritai u ilpu atimi ahlap ara, im ilpu hal ura, im ilpu mapora, irai iji mesese.
16Is ago a Moses is uce: is idivaig is asaig ehelen a Ihova, is idim ago aien.
17Eris athai neom atga an nadiat uhup, an mohoc uhup, irai yier sekunt.
18Is athai neom atga a Moses, um ago ipjin niji itai ipjilai urin, um aduwi niji uari cai iran, um ikni niji akaukau iran, um aduwi niji auicai aduwi.
19Is elgelgei napelumai aien ijinies an neom atga, um ati nitai adahpoi napelumai ijinies iran; is idivaig is asaig a Ihova ehele Moses.
20Is leh intas alep aien, um ati anliin nelcau, um ati inceen is ero irai itai arehed an nelcau, um ati intapnes ijinies an nelcau:
21is imiapan nelcau aien anliin neom atga, um athai napelumai atapin, um atapin nelcau is amen intas alep iran; is idivaig is asaig a Ihova ehele Moses.
22Is ati nefata aien anliin neom er asjapicnaig o un, an nahaijin neom atga inig et ahes narutu iran, an nahaijin napelumai atapin itac.
23Is ikni upene nareto iran aien an nuhup u Ihova; is idivaig is asaig a Ihova ehele Moses.
24Is ati nitai atijai incap alahala iran aien anliin neom er asjapicnaig o un, an nuhup u nefata, an nahaijin neom atga inig et ahes nuritoga iran.
25Is atni lamp aien an nuhup u Ihova; is idivaig is asaig a Ihova ehele Moses.
26Is ati natau colt aien anliin neom er asjapicnaig o un an nuhup u napelumai atapin:
27is atnamud nitai auanipin upene iran aien; is idivaig is asaig a Ihova ehele Moses.
28Is athai napelumai atapin neucse neom atga aien.
29Is ati natau uri niji itai ahlap er atnamud aien an neucse neom atga, neom er asjapicnaig o un, um ahlap iran an nitai ahlap er atnamud, im nitai ahlap eh caig; is idivaig is asaig a Ihova ehele Moses.
30Is ati nelcau ereuc iran aien an niblan neom er asjapicnaig o un im natau, um ati inwai iran par ereuc.
31Eris yiri nikmara iran im neduora a Moses im Eron im ilpu hal o un:
32eris ereuc ara, ja par apan anliin neom er asjapicnaig o un, ka apan ubutpotet u natau; is idivaig is asaig a Ihova ehele Moses.
33Is athai niji itai atapin neom atga aien im natau, um arehed mihtag, um athai napelumai atapin neucse nah. Is idim ago ehni nauritai a Moses.
34Is ataluopni neom er asjapicnaig o un napat, is lep ohua inlah u Ihova an neom atga.
35Is ehka vai Moses napan vaig anliin neom er asjapicnaig o un va napat is amen ijinies iran, im lep inlah u Ihova is ohua an neom atga.
36Is wat ti napat ijinies an neom atga, eris atupun natga asega ura a nup Isreel:
37ja el is eti aridjai napat, eris eti atga ara, um uhum pan an nopan iyehki is lep ti.
38Is amen napat u Ihova ijinies an neom atga an nadiat, is lep amen incap ijinies iran an nepig, an nuhup u nup Isreel asega, an natga vaig ura asega.
Currently Selected:
Eksotus Nuarin-tas alupas 40.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)