Eksotus Nuarin-tas alupas 37.
Nuarin-tas alupas 37.
1 Nelcau. 6 Intapnes an nelcau im ohwat jerub ehro. 10 Nitai hag im nipjiitai iran. 17 Nitai atijai incap alahala iran im niji lamp im niji itai iran. 25 Natau atni nitai auanipin upene iran. 29 Narakei aspi im nitai auanipin upene.
1IS ago nelcau an cai sitim a Besaliil: is kubit is ero im nahaijin nopra iran, im kubit is ethi im nahaijin netgeig iran, im kubit is ethi im nahaijin nijinies iran:
2is adahpoi aien irai colt upene anliin im lep itac, um lep ago nitai yecrei irai colt um arehed iran.
3Is atho colt aien um ago nitai arehed is for iran, um ikni an nesvi vaig is for; nitai arehed is ero an nahaijin, im lep nitai arehed is ero an nahaijin.
4Is ago inceen is ero aien an cai sitim, um adahpoi irai colt.
5Is ati inceen is ero aien irai itai arehed an nahaijin nelcau im lep nahaijin, par apos nelcau.
6Is ago intapnes irai colt upene aien: is kubit is ero im nahaijin nopra iran, im kubit is ethi im nahaijin netgeig iran.
7Is ago jerub is ero irai colt aien, is ago ero aien an nuarin is ethi ache, ijinies an nilpun tapnes im lep nilpun;
8Is eteuc jerub is ethi an nilpun an nahaijin is ethi, im lep jerub is ethi an nilpun an nahaijin is eche: is ago ohwat jerub erahki aien ijinies an tapnes an nilpun im lep nilpun.
9Erus elgelgei nehparau ahwat jerub erahki an nohatag, um adahpoi intapnes irai ehparau, erus alum jipe rau arau: is lep apan nesganimtai ohwat jerub u intapnes.
10Is lep ago nefata aien an cai sitim: is kubit is ero nopra iran, im kubit is ethi netgeig iran, im kubit is ethi im nahaijin nijinies iran:
11is adahpoi aien irai colt upene, um lep ago nitai yecrei irai colt um arehed iran.
12Is lep ago nitai aradei arehed iran aien is idivaig nikmai atimi netgeig iran; um lep ago nitai yecrei irai colt arehed iran.
13Is atho colt aien um ago nitai arehed is for urin, um ikni niji itai arehed an nesvi vaig is for, irai eduon is for.
14Eris ikni niji itai arehed ubutpotet pan u nitai aradei mika yi uarin ikni inceen is ero iran, par apos nefata.
15Is ago inceen is ero an cai sitim aien, um adahpoi irai colt, par apos nefata.
16Is ago nipji itai an nefata aien irai colt upene, nikavaig, nipjiitai iran, im spuun iran, im beson iran, im niji itai adahpoi iran.
17Is lep ago nitai atijai incap alahala iran aien irai colt upene: is ago nitai atijai incap alahala iran aien irai colt ipjin; is lep uce inhus o un, im niji ran, im niji ipjikup, im niji uptin, im niji tisian:
18is eteuc inran is siks iran; inran is eseij an nahaijin nitai atijai incap alahala iran, im lep inran is eseij an nahaijin nitai atijai incap alahala iran:
19is amen nipjikup haklin is eseij an ran is ethi, im lep nuptin, im intisian; is lep amen nipjikup haklin is eseij an ran is eche, im nuptin, im intisian: is lep uce irai ran is siks is amen an nitai atijai incap alahala iran.
20Is amen an nitai atijai incap alahala iran nipjikup haklin is for, im niji uptin, im niji tisian:
21is amen nuptin is ethi ithan ran is ero iran, im nuptin is ethi ithan ran is ero iran, im nuptin is ethi ithan ran is ero iran, is idivaig inran is siks iran.
22Is lep uce nuptin im inran: eris ago niji itai asega iran irai colt ipjin um upene.
23Is ago lamp is seven aien, im niji itai ehtehti lamp iran, im nelcau uri nitai ehtehti lamp iran irai colt upene.
24Is ago aien irai colt is talent is ethi, im lep niji itai asega urin.
25Is lep ago natau atni nitai auanipin upene iran aien an cai sitim: is kubit is ethi nopra iran, im kubit is ethi netgeig iran; is tup apapa pikgaig nahaijin asega; im kubit is ero nijinies iran; eris lep ago nipat iran an cai iyehki.
26Is adahpoi aien irai colt upene, ijinies, im nahaijin asega, im nipat iran: is lep ago nitai yecrei um arehed iran aien irai colt.
27Is ago nitai arehed is ero urin aien irai colt, ithan nitai yecrei, an nesvi vaig is ero an nahaijin im lep nahaijin, mika yi uarin ati inceen et ero iran, par apos.
28Is ago inceen is ero an cai sitim aien, um adahpoi irai colt.
29Is ago narakei aspi itap aien, im nitai auanipin upene eri atni irai ide cai auanipin upene, is idivaig nauritai u natimi ago nitai auanipin upene.
Currently Selected:
Eksotus Nuarin-tas alupas 37.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)