Eksotus Nuarin-tas alupas 16.
Nuarin-tas alupas 16.
1 Era yetpan Sin a nup Isreel. 2 Era tas upoupo ara vai intivaig nitai caig incara. 4 Et ika a Atua yi ahes an nohatag nitai caig incara. 11 Et ikni man aien, 14 im manna. 16 Intas alep vai manna. 25 Er eti ecetai an nadiat atumop. 32 Er aminjinaig omer et ethi iran.
1ERIS ahes Ilam ara um atga ura; eris yetpan an namasacen Sin a nup Isreel asega, an niblai Ilam im Saine, an nadiat fiftiind an mohoc sekunt an nahes vaig ura an pece Ijipt.
2Eris tas edemda a nup Isreel asega vai Moses im Eron an namasacen:
3eris ika ehele rau a nup Isreel, El is upene vai cama el ecris emesmas aijama va nikmai Ihova an pece Ijipt, ecris wat amen aijama ui ipjiuru atho nitai hegaig iran, um caig nitai caig, um geije; arus imiapam cama aijaurau an namasacen inigki, par atgei atimi iji igki asega an numlaig.
4Is ika a Ihova ehele Moses, Ekpu idim ika ainyak yi asuol nitai caig an nohatag incamia; erumu alau ijo natimi, um asjapicnaig nahaijin uri nadiat inyi ethi irai iji adiat, mika ki ato ra ainyak, kit erupu imiaiji intas alep unyak ara, ka oʼo.
5Ja etu wit yetpam nadiat auaretha erumu atho inig ara erupu asjapicnaig ara; inyi alupas uri nadiat inyi ero, um eti idivaig inig era asjapicnaig irai iji adiat ara.
6Erus ika a Moses im Eron ehele nup Isreel asega, Etu wit jupura, akupu ato aijaua mika is iknipagki caua an pece Ijipt a Ihova:
7etu wit lahlah an nuhialeg, akupu ecetai natimi alupas u Ihova aijaua; et idim atahaijeg intas edemda unyimia aien vai Ihova: ecrau lep he aijumrau, mika eka edemda vai cumrau aijaua?
8Is ika a Moses, Akupu ato nitai inigki aijaua, etu wit alupai caua nitai caig incamia a Ihova an jupura, im lep nitai caig an nuhialeg, akupu geije iran aijaua; et idim atahaijeg a Ihova intas edemda iji ig eka asaig vai yin aijaua: ecrau he aijumrau? eka eti asan tas edemda vai cumrau aijaua, ja vai Ihova.
9Is ika a Moses ehele Eron, Namu ika aiek ehele nup Isreel asega, Akumu apam ubutpotet aijaua an nuhup u Ihova: et mun atahaijeg intas edemda unyimia aien.
10Is wat tas a Eron ehele nup Isreel asega, eris aespan an namasacen ara, is ehcohos natimi alupas u Ihova an napat.
11Is tas a Ihova ehele Moses, um ika,
12Ek mun atahaijeg intas edemda u nup Isreel ainyak: namu tas ehele ra aiek, um ika, Akupu caig man an jupura aijaua, akupu lep geije aijaua an nuhialeg va nitai caig; akupu ato aijaua mika, ek Ihova ainyak Atua unyimia.
13Is wat jupura eris ahtag pam inman, um ataluopni pam nuarin amen ura: is wat lahlah an nuhialeg, is amen nopoigmul, um arehed ira ra.
14Is wat mese nopoigmul, is amen an namasacen nitai haklin um arehed, is haklin um idivaig nopoigmul an nobohtan.
15Eris wat almoi a nup Isreel eris tastas jipe ara, um ika, Inhe nigki 1 Eris eti ato ara. Is tas a Moses ehele ra, um ika, Nitai caig nigki et mun alupai caua a Ihova incamia.
16Intas alep u Ihova nigki, nikavaig, Erumu asjapicnaig jipjipe natimi asega, et idivaig et upene incara, inyi ipjiomer yi ethi imi natimi yi ethi, um apaahni iramia asega, athi um athi ehni; akumu lep lucsei aijaua asega imi ra era amen ara iraili imnim unyimia.
17Eris ago nitai inigki a nup Isreel, um asjapicnaig, ja is alupas u ahaiji ra, jam tintin u ahaiji ra.
18Eris wat asjapicnaig ara irai ipjiomer, is eti eled o un is asjapicnaig alupas aien, um eti haklin o un is asjapicnaig tintin aien; eris asjapicnaig natimi asega is idivaig is upene incara.
19Is tas a Moses, um ika, Etmu jim udei tah nuarin tah natimi um yetpan an nuhialeg.
20Ja eris eti imiaiji intas o Moses ara; ja eris udei nahaijin um yetpan an nuhialeg nahaiji ra, ja is isjis nija iran um epeuv: is ehniv vai ra a Moses.
21Eris asjapicnaig natimi asega irai iji uhialeg is idivaig is upene incara: ja is wat alupas nagesega is ahna.
22Eris lep asjapicnaig nitai caig alupas ara an nadiat auaretha, um yetpan irai omer is ero incai natimi is ethi: eris apan um asuptecnaig ehele Moses a ilpu atimi alupas asega ura.
23Is ika ehele ra aien, Intas o Ihova nigki, nikavaig, Nadiat atumop inyi itap imraig vai Ihova: akumu ahen nitai iji igki aijaua, eka merit aijaua nahen vaig inpig, um lep atho nitai iji igki, eka merit aijaua natho vaig; akumu lep ati nitai inig et aled aijaua, um aminjinaig uri nuhialeg.
24Eris ati ara uri nuhialeg is idivaig is asaig a Moses: ja is eti epeuv, um eti isjis nija iran.
25Is ika a Moses, Akumu caig inig inpig aijaua; idim nadiat atumop vai Ihova inpig: akupu eti ecetai aijaua inpig an nobohtan.
26Akumu asjapicnaig aijaua ira adiat inyi siks; ja inyi eti eteuc tah an nadiat sevend, nadiat atumop marom.
27Eris apan nahaiji atimi an nadiat sevend par asjapicnaig, jam eti ecetai tah.
28Is ika a Ihova ehele Moses, Eka imiisjis aijaua, um eti apos intas unyak, im intas alep unyak, um yetpan an nahopan?
29Is idim ati nadiat atumop a Ihova imi caua, et lep alupai caua aien an nadiat auaretha nitai caig uri nadiat et ero; akumu amen aijaua asega irai iji uarin amen unyimia, etmu jim udei nuarin amen o un tah natimi an nadiat sevend.
30Eris atumop natimi an nadiat sevend.
31Eris anvi nidan a nup Isreel par ika Manna: is idivaig nupsi korianter, is ahi; eh wat atimtim, is idivaig flaur apalapal er ago irai hune.
32Is ika a Moses, Intas alep u Ihova nigki, nikavaig, Akumu asjapicnaig an nipjiomer aijaua yi ohua, um aminjinaig imi ilpu mapomia; va erupu almoi nitai caig inig ara, kis alaamia iran ainyak an namasacen, an nopan iyehki kis iknipagki caua an pece Ijipt ainyak.
33Is ika a Moses ehele Eron, Namu leh nipjinitai colt aiek, um atohwaig manna iran, et idivaig omer et ethi, inyi ohua, um ati an nuhup u Ihova, va uhpu aminjinaig vai ilpu mapomia.
34Is ati a Eron an nuhup u nelcau is amen Intas alep iran; is idivaig is asaig a Ihova ehele Moses, mika eri aminjinaig.
35Eris caig manna a nup Isreel irai mesese is forte, um imihum pan an nopan iyehki, eris yetpan an pece ara eris amen natimi iran; eris caig manna ara, um imihum pan an nopan iyehki, eris yetpan an nahaijin pece Kenan ara.
36Et tup apapa omer et ten um ifa et ethi.
Currently Selected:
Eksotus Nuarin-tas alupas 16.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)