Eksotus Nuarin-tas alupas 14.
Nuarin-tas alupas 14.
1 Ai asjaaicnaig nefalaig vai nup Isreel a Atua. 5 Et apitac ra a Fero. 10 Era tas upoupo a nup Isreel. 13 Et tas upene ehele ra a Moses. 15 Et asuptecnaig itai ehele Moses a Atua. 19 Et apan itac atimi napat. 21 Era algaunyi Injap cap a nup Isreel. 23 Eh atpujej iran nup Ijipt.
1IS ika a Ihova ehele Moses,
2Namu asaig ehele nup Isreel aiek, mika eri ahparahed ara, um atumop an nahaijin Paihahairod, an niblai Mictol im injap, ubutpotet pan Beal-sifon: akumu atumop eahki aijaua an nohmunjap.
3Etpu ika a Fero vai nup Isreel, Era ecen an pece ara, et atapnes ra namasacen.
4Ekpu lep ago ipjin inliinmopoi Fero ainyak, etpu apitac ra aien; uhpu ecetai natimi alupas unyak irai Fero, im ilpu eucsupo asega o un; va erupu ato a nup Ijipt mika, ek Ihova ainyak. Eris ago ara is uce.
5Eris asaig ehele natimarid Ijipt mika, eris aha natimi: is acen inliinmopoi Fero im inliinmopoi ilpu aheca o un vai nup Isreel, eris ika ara, Intis a uri akaija par ago nedo inigki, um atcijaig nup Isreel mika eri jim aheca uja ara?
6Is yecrei jariot o un a Fero, um lucsei ilpu dualep o un:
7is lucsei jariot esjilid is siks huntret aien, im ilpu atimi ateuc irai hors asega an pece Ijipt, im ilpu atimi alupas ira ra asega.
8Is ago ipjin inliinmopoi Fero natimarid Ijipt a Ihova, is apitac nup Isreel aien: eris atga ura a nup Isreel irai ikmara emda.
9Ja eris apitac ra a nup Ijipt, nikavaig, niji hors asega u Fero, im niji jariot o un, im ilpu atimi ateuc irai hors o un, im ilpu eucsupo o un, um uhum pan ra an natumop vaig ura an nohmunjap an nahaijin Paihahairod, ubutpotet pan Beal-sifon.
10Is wat apan ubutpotet a Fero, eris easeas a nup Isreel, um alum nup Ijipt napitac ra vaig; eris imtitaig alupas ara: eris ahlaig vai Ihova a nup Isreel.
11Eris ika ehele Moses ara, Et idim eteuc nehpaiitai Ijipt, na a uri aiek par iknipagki cama, mika ecri emesmas aijama an namasacen? as a uri aiek par ago nedo inigki vai cama, um iknipagki cama an pece Ijipt?
12Ecris tas ehelum an pece Ijipt aijama, um ika, Udei cama, mika ecri aheca u nup Ijipt aijama? Is upene vai cama par aheca u nup Ijipt, jam has par emesmas an namasacen.
13Is ika a Moses ehele atimi, Akumu jim imtitaig aijaua, amen aktit, um almoi, etpu imiatamaig caua a Ihova, etpu ehvaig nedo o un ehelemia aien an nadiat inigki: eka mun alum nup Ijipt inpig aijaua, ja akupu eti lep alum ra aijaua irai iji mesese.
14Etpu ago nedoa vai caua a Ihova, akumu eucsup aijaua.
15Is ika a, Ihova ehele Moses. Na a un aiek par ahlaig vai nyak? namu asaig ehele nup Isreel aiek mika eri atga ara:
16namu adaigjai niseuc unyum aiek, um atgeig yi apidi nikmam ijinies an jap, um atiakoai: erupu atga an nobohtan mese a nup Isreel juju an niblan jap.
17Ekpu idim ago ipjin inliinmopoi Fero ainyak, im inliinmopoi nup Ijipt, erupu lep apitac caua ara: uhpu ecetai natimi alupas unyak irai Fero, im ilpu eucsupo asega o un, im niji jariot o un, im ilpu atimi ateuc irai hors o un.
18Erupu ato a nup Ijipt mika ek Ihova ainyak, uhu wit ecetai natimi alupas unyak irai Fero, im niji jariot o un, im ilpu atimi ateuc irai hors o un.
19Ja is apan a nagelo iyehki u Atua is atga an nuhup u nup Isreel aien, um lep atga an cehera; is lep apan an cehera napat iyehki is atga um uhup ira ra:
20is apan juju an niblai nup Ijipt im nup Isreel; eris amen an napat im inmehcim ara sji ehki eris apitac ara, ja is itai Iah an nepig imi ra sji ehki eris uhup ara: va nitai inigki eris eti uhum sjipe ra ara an nepig asega.
21Is atgeig yi apidi nikman a Moses ijinies an jap; is imiadumoij injap a Ihova an natoga alupas an nepig asega iyehki, is um mas injap, eris atiakoai injap.
22Eris atga an niblan jap a nup Isreel an nobohtan mese: is atcai injap an matara im lep an mauura.
23Eris apitac ra a nup Ijipt um apan an niblan jap, nikavaig, niji hors asega u Fero, im niji jariot o un, im ilpu atimi ateuc irai hors o un.
24Is wat ahraren nepig is aespan nup Ijipt a Ihova an nalaume u incap im napat, um aldatji nup Ijipt,
25um iknipagki nitai atpelaig irai iji jariot ura, is idim ehka vai ra natga vaig: va nitai inigki eris ika a nup Ijipt, Intumu aha akaija va nup Isreel; et ago nedoa vai ra a Ihova um aat irai nup Ijipt.
26Is ika Ihova ehele Moses, Namu atgeig yi apidi nikmam aiek ijinies an jap, va etpu lep ahtag injap ijinies irai up Ijipt, im niji jariot ura, im ilpu atimi ateuc irai hors ura.
27Is atgeig yi apidi nikman a Moses ijinies an jap, is lep ahtag ahtu injap an nuhialeg; eris aha vaig a nup Ijipt; ja is auahas nup Ijipt a Ihova anliin jap.
28Is lep ahtag injap, um ataluopni niji jariot, im ilpu atimi ateuc irai hors, im ilpu eucsupo asega u Fero eris apitac ra an jap; is idim eti amen tah ira ra.
29Ja eris atga an nobohtan mese a nup Isreel an niblan jap; is atcai injap an matara im lep an mauura.
30Et idim uco is imiatamaig nup Isreel a Ihova va nikmai nup Ijipt an nopan iyehki; eris ecet nup Ijipt an nohmunjap a nup Isreel, ja eris emesmas ara.
31Eris almoi a nup Isreel nauritai esjilid iyehki u Ihova irai up Ijipt: eris imtitai Ihova ara, um imiisjis ninveijec intas o Ihova, im lep Moses naheca o un.
Currently Selected:
Eksotus Nuarin-tas alupas 14.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)