Tyuteronome Nuarin-tas alupas 8.
Nuarin-tas alupas 8.
Intas ahugni ra mika eri imiaiji intas alep u Atua ara va nedo aiheuc o un vai ra.
1AKUMU aktaktai um imiaiji intas alep iji igki asega aijaua ek asaig ehelemia ainyak an nadiat inigki, va akupu umumoh aijaua, um asvalav, um apan um ohuun inpece iyehki is asaig a Ihova ehele ehtaij etpomia.
2Akumu imiehva nedo asega u Ihova Atua unyimia vai caua irai mesese is forte iji ehki an namasacen, par imiasuol caua, um ahilek inliinmopomia, um ato nedo unyimia, kit akupu imiaiji intas alep o un aijaua, ka oʼo.
3Is imiasuol caua aien, is wat ehtele caua aijaua is um alaamia manna inig aien, akis eti ato aijaua, eris lep eti ato a ilpu retpomia; mika aki ato aijaua, nikavaig, era eti umumoh natimi vai nitai caig ache, ja era umumoh natimi va nitai asega iji ig et ikni vaig a Ihova.
4Is eti mohtan napelumai unyimia akis aso caua iran aijaua, is lep eti atop neduomia irai mesese is forte iji ehki.
5Akumu lep aktaktai an liinmopomia aijaua mika, et ated caua a Ihova Atua unyimia, et idivaig et ated inhal o un tah natimi.
6Va nitai inigki akumu apos intas alep u Ihova Atua unyimia aijaua, um ago nedo o un, um imtitai yin.
7Et imiapan caua an pece upene a Ihova Atua unyimia, inpece et amen iran nofowai, im inwai ahlau ohua jai, im netpen wai et ahes irai iskanse im lola edoon;
8inpece inig et amen iran hwiit, im barle, im vaine, im nateg, im pomcranet; inpece inig et amen iran narakei oliv, im hune;
9inpece inig akupu caig nitai caig iran aijaua jam eti ahtahni, um eti ihki atimi an tah nitai; inpece inig et aiurn inhat iran, er lep ucji koper irai edoon iran.
10Aku wit hag aijaua um geije, akumu ago naaurinig vai Ihova Atua unyimia aijaua vai inpece upene is alupai caua aien.
11Akumu aktaktai aijaua va aki jim eti imiehva Ihova Atua unyimia aijaua, um eti apos intas o un, im nedo o un, im intas alep o un, ek asaig ehelemia ainyak an nadiat inigki:
12aku wit hag aijaua um geije, um ago neom upene, um amen iran;
13eru wit ahinag kurimatau unyimia im siip unyimia, etu wit ahinag silver unyimia im colt unyimia, etu wit ahinag niji itai asega unyimia;
14etmu jim ijinies inliinmopomia aijaua, um jim ahnag irai Ihova Atua unyimia, is iknipagki caua aien an pece Ijipt, an nuarin u nauanaheca unyimia;
15is lep atau iramia aien an namasacen iyehki is alupas um has, eris amen iran nimyeuv has, im nispeuv has, is mese, um ti inwai iran; is lep ika aien yi ahes inwai lumamia an hat ipjin;
16is alaamia manna inig aien an namasacen, eris eti ato a ilpu retpomia, mika yi imiasuol caua aien, um ahilek inliinmopomia, ja par apitac um ago nedo upene vai caua;
17um jim ika an liinmopomia aijaua, Ecris asjapicnaig natimi alupas unyima aijama va nemda unyima, im nauritai u nikmama.
18Ja akumu imiehva Ihova Atua unyimia aijaua: aien aigki is alupai caua nemda aien par asjapicnaig itai, mika yi ehneijid intas upyi asaig o un aien is asaig ehele ilpu retpomia aien, et idivaig an nadiat inigki.
19El eka eti imiehva Ihova Atua unyimia aijaua, um apitac ilpu atmas u nup urai iji pece um aheca ura, um ago nalaigaheni vai ra, ek idim asaig ehelemia ainyak an nadiat inigki mika akupu idim emesmas aijaua.
20Akupu emesmas aijaua, et idivaig nup urai pece iji igki is auahas ra a Ihova an nuhup unyimia; va nedo unyimia, nikavaig, akis esjum aijaua nimiaiji vaig intas o Ihova Atua unyimia.
Currently Selected:
Tyuteronome Nuarin-tas alupas 8.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)