Tyuteronome Nuarin-tas alupas 6.
Nuarin-tas alupas 6.
1 Et ati intas alep a Atua mika eri imiaiji natimi. 3 Intas ahugni ra vaig.
1INTAS alep, im intas asuptecnaig, im nedo iji igki, is asaig a Ihova Atua unyimia mika uhpu esege imi caua, mika aki ago aijaua an pece iyehki akupu apan iran aijaua um ohuun:
2va akupu imtitai Ihova Atua unyimia aijaua, um apos nedo asega o un, im intas alep o un, ek asaig ehelemia ainyak, aijaua, im ilpu hal unyimia, im ilpu mapomia, irai iji adiat an numumoh vaig unyimia; va etpu ahinag nadiat iramia.
3Ak nup Isreel, akumu atahaijeg aijaua, um imiaiji; va akupu ahinag acen aijaua, um lep amen upene, et idivaig is upyi asaig a Ihova Atua u ilpu retpomia, an pece iyehki et alupas nidenided im hune iran.
4Ak nup Isreel, akumu atahaijeg aijaua: Et Ihova et ethi ache a Ihova Atua uja:
5etmu aiyu inliinmopomia aijaua vai Ihova Atua unyimia an liinmopomia asega, im nesgamia asega, im nemda asega unyimia.
6Etmu amen an liinmopomia intas iji igki, ek asaig ehelemia ainyak an nadiat inigki:
7akumu lep esege upene imi ilpu hal unyimia aijaua, um tas vaig, aku wit ateuc iraili eom unyimia aijaua, um atga an nefalaig, um asjeucse, um atidai.
8Um arore an nikmamia mika yi itai asjaaicnaig, etpu lep idivaig itai imiehva juju an niblan nesganimtamia.
9Um aged ira auicai irai eom unyimia, im lep irai eucse irahed unyimia.
10Etu wit imiapan caua an pece iyehki a Ihova Atua unyimia, is upyi asaig ehele ehtaij etpomia, nan, Ebraham, im Aisak, im Jekob, par alupai caua niji maliyum alupas um esjilid, akis eti ago aijaua,
11im niji eom et ohua niji itai upene iran, akis eti ikni aijaua, im nehpaiwai eris ucji, ja akis eti ucji aijaua, im niji okoro vaine im niji cai oliv, akis eti ahwaig aijaua;
12aku wit hag aijaua um geije, akumu aktaktai aijaua va aki jim eti imiehva Ihova aijaua, is iknipagki caua aien an pece Ijipt, an nuarin auaraheca iran.
13Akumu imtitai Ihova Atua unyimia aijaua, um aheca o un, um asan tas ipjin unyimia an nidan.
14Akumu jim apitac ilpu atmas aijaua, irai ilpu atmas u nup urai pece era amen arehed iramia ara;
15(et Ihova a Atua unyimia et amen ehelemia aien, et idivaig nedemda u natimi oporei nedemda u Atua,) vai yi jim edemda vai caua a Ihova Atua unyimia, um auahas caua an nobohtan.
16Akumu jim auahas inliinmopoi Ihova Atua unyimia aijaua, et idivaig akis auahas inliinmopon aijaua Masa.
17Akumu apos upene intas alep u Ihova Atua unyimia aijaua, im intas asuptecnaig o un, im nedo o un, is asaig ehelemia aien.
18Akumu ago nedo atoh im nedo upene an nuhup u Ihova aijaua: va akupu amen upene aijaua, um apan um ohuun inpece upene iyehki is asaig a Ihova ehele ehtaij etpomia,
19um ahlo pan itac ilpu atimi tak atimi iramia asega an nuhup unyimia, et idivaig is asaig a Ihova.
20Eru wit ahodai caua a ilpu hal unyimia an taka opan, um ika, Nesgai tas iji igki, im intas alep iji igki, im nedo iji igki, nevitai, is asaig ehelemia a Ihova Atua uja?
21Akumu asuptecnaig ehele ilpu hal unyimia aijaua, um ika, Ecris ilpu aheca u Fero aijama an pece Ijipt; ja is iknipagki cama an pece Ijipt a Ihova an nikman emda:
22is ehvaig niji itai asjaaicnaig a Ihova, im niji itai imiali, im niji itai esjilid irai up Ijipt, im Fero, im lep ra an nimnim o un, an nuhup unyima:
23is iknipagki cama eahki aien, mika yi imiapam cama igcaki aien, um alupai caija inpece inig is upyi asaig ehele ehtaij etpoija aien.
24Is asaig eheleija a Ihova, mika inti imiaiji intas alep asega iji igki akaija, um imtitai Ihova Atua uja, um amen upene irai iji adiat, va etpu imiatamaig caija aien, et idivaig an nopan inig.
25El eta apos intas alep asega iji igki akaija an nuhup u Ihova Atua uja, uhpu aiheuc vai caija, et idivaig is asaig eheleija aien.
Currently Selected:
Tyuteronome Nuarin-tas alupas 6.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)