Tyuteronome Nuarin-tas alupas 33.
Nuarin-tas alupas 33.
1 Natimi alupas u Atua. 6 Niji tas acis yi alwai vai niji elcau et twelv u nup Isreel. 26 Namen upene ura.
1INTAS upene ji igki, is asaig a Moses naheca u Atua ehele nup Isreel ja par mas.
2Is ika aien, Is ahes an nedoon Saine a Ihova, um ehcohos ehele ra irai lola edoon Sier; is naunau aien an nedoon Peran, is ham aien im ilpu atimi upene is ahinag acen o un: is ahes an matan incap, nitai ahaig imi ra.
3Maiya, is aiyu inliinmopon aien vai ilpu atimi o un; era amen an nikman a ilpu atimi upene asega o un: eris ateucse u neduon ara; erupu atahaijeg intas unyum ara asega.
4Is ati intas alep eheleija a Moses, nitai upene inig vai ilpu atimi alupas u ilpu mapoi Jekob.
5Is atimarid Jesurun aien, eris wat asjapicnaig a ilpu atimi alupas u atimi im niji elcau u nup Isreel.
6Is tas aien vai Ruben im Simeon, um ika, Erumu umumoh a ilpu mapoi Ruben, um eti emesmas; erumu ahinag acen a ilpu mapoi Simeon.
7Intas acis yi alwai Juta nigki: is ika aien, Ak Ihova, namu atahaijeg nohrai ilpu mapoi Juta aiek, um imiapan ra ehele ilpu atimi ura: etmu emda nikmara ara; namu atau imi ra aiek vai ilpu atimi tak atimi ira ra.
8Is tas vai ilpu mapoi Livai aien, um ika, Etmu amen ehele ilpu atimi itap unyimia iji igki Dummim im Urim unyimia, as ahilek nedo ura aiek Masa, um imiisjis ehele ra ui wai Meriba;
9eris ika ara vai etmara im risra, Ecra eti ato ra aijama; eris lep eti ato ilpu etwara ara, um eti ato ilpu hal ura: era mun apos intas unyum ara, um imiaiji intas alep unyum.
10Erupu esege imi ilpu mapoi Jekob nedo unyum ara, im lep imi nup Isreel intas alep unyum: erumu ati nitai auanipin upene an nuhup unyum ara, im niji itai ahlap er atnamud an natau unyum.
11Ak Ihova, namu acis yi alwai niji itai ura aiek, um imiacitak nauritai irai ikmara: auud incehei ra sji igki aiek era, ati nedoa vai ra ara, im lep ilpu atimi edemda vai ra, mika eri jim aat ira ra ara.
12Is tas vai ilpu mapoi Benjamin aien, um ika, Erupu amen upene ara et aiyu inliinmopoi Ihova vai ra; etpu aminjinai ra a Ihova ira adiat asega, erupu lep amen ara irai lola edoon.
13Is tas vai ilpu mapoi Josef aien, um ika, Etmu acis yi alwai inpece ura a Ihova, vai niji itai upene an nohatag, vai nopoigmul, im inwai ahlau ohua sjai irai uarin ubo,
14im lep nohwai itai upene et ededel va nagesega, im niji itai upene et ededel vai inmohoc,
15im niji itai upene irai lola edoon itu acen, im niji itai upene irai lola au inyi eti lep ti,
16im niji itai upene an nobohtan im nemda iran, im naiheuc o un is amen an nahtancai aien: etmu yetpam irai ilpu mapoi Josef intas acis yi alwai o un, um lep ira ra era ahes ehelen is esjilid irai ilpu etwan aien.
17Et idivaig kurimatau atamaig esjilid natimi alupas ura, et lep idivaig nemda u kurimatau nemda ura: erupu imiahau atimi iran aien, um yetpan an tid an nobohtan: era eceten dausant (10,000) u ilpu mapoi Ifreem ara sji igki, im lep ecewun dausant (1,000) u ilpu mapoi Manasi.
18Is tas vai ilpu mapoi Sebulun aien, um ika, Ak ilpu mapoi Sebulun, akumu imiacitak aijaua an nahtai itai vaig unyimia; im lep, ak ilpu mapoi Isakar, irai umamia.
19Erupu asjapicnaig nup urai pece an nedoon itap ara; erupu ahlap eahki ara irai iji itai ahlap upene: erupu lep lucsei inpadiaig inyi ahinag an jap ara, im niji itai upene er adenaig an nauanavig.
20Is tas aien vai ilpu mapoi Cat, um ika, Naaurinig vai Atua inig et ika aien eri ahinag a ilpu mapoi Cat: era imiiris atimi ara et idivaig laion inig, et aces nikman tah aien im nipek o un tah ijinijinies.
21Era ika ara eri uhup um alupai ra nuarin esjilid, eris ati aktit nuarin inig eris asaig vaig: ja erupu uhup ara um atau ilpu atimi alupas u atimi, erupu ago nauritai atoh u Ihova ara, im neruvaig o un vai nup Isreel.
22Is tas vai ilpu mapoi Tan aien, um ika, Erupu emda a ilpu mapoi Tan, um idivaig laion takuras inig, et aliaujai irai edoon Besan.
23Is tas vai ilpu mapoi Naftalai aien, um ika, Ak ilpu mapoi Naftalai, eka mun geije aijaua va naiheuc u Ihova, eka lep amen upene aijaua vai intas acis yi alwai o un: etmu unyimia nohmunjap im inpece inig et ahes nuritoga iran.
24Is tas vai ilpu mapoi Eser aien, um ika, Eri ahinag a ilpu hal u ilpu mapoi Eser; erumu imiacitak ra a ilpu etwara, erumu lep aspi irai eduora an narakei ara.
25Inyi aiurn im bras su unyimia; etmu idivaig nadiat iramia nemda unyimia.
26Et eti eteuc tah et idivaig Atua u Jesurun, et ae an nohatag aien mika yi atau caua aien, im lep an nauanohatag an natimi alupas o un.
27Et uarin amen iran unyimia a Atua inig et amen irai iji mesese aien, et apos caua nikmai Natimarid inig inyi eti lep ti aien: etpu ahau ilpu atimi tak atimi iramia aien an nuhup unyimia; etpu ika aien, Eri auahas ra.
28Erupu echim amen upene a nup Isreel an nopan iyehki: erupu amen a ilpu mapoi Jekob an pece u hwiit im nide vaine; etpu lep alupas nopoigmul vai ra.
29Ak nup Isreel, eka mun ahesmoij aijaua: era idivai caua a di, ak ilpu atimi et imiatamaig caua a Ihova, nitai ahtaipup par atau imi caua, im nauitoga esjilid unyimia, mika aki esjilid irai ilpu atimi edemda vai caua; akupu atga irai uarin ijinies ura aijaua.
Currently Selected:
Tyuteronome Nuarin-tas alupas 33.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)