Tyuteronome Nuarin-tas alupas 2.
Nuarin-tas alupas 2.
1 Et lep tas aien, et ika a Atua eri jim imiisjisitai ehele nup Itom, 9 im nup u Moab, 17 im lep nup Amon, 24 ja eris auud Saihon im nup Emor ara.
1INTIS ahidai caija akaija, um atga an namasacen ubutpotet pan u Injap cap, is idivaig is asaig ehelek a Ihova: intis lep ahparehed an nedoon Sier akaija ira adiat is ahinag.
2Is tas ehelek a Ihova, um ika,
3Akis ahparehed an nedoon inigki aijaua is itu iramia: akumu ahidaig pan caua an nuarin inig et ahes narutu iran aijaua.
4Namu tas ehele atimi aiek, um ika, Akupu atga an nahaijin pece u ilpu etwamia ilpu mapoi Isa era amen Sier ara; erupu imtitaig caua ara: va nitai inigki akumu aktaktai nedo unyimia aijaua:
5um jim imiisjisitai ehele ra; inki eti alupai caua tah nuarin pece ura ainyak, maiya, nuarin et idivaig nugnyan neduon; kis idim alupai Isa nedoon Sier ainyak mika yi ohuun aien.
6Akumu auarimtai itai hegaig irai mune ehele ra aijaua incamia; akumu lep auanimtai wai irai mune ehele ra aijaua lumamia.
7Is acis yi alwai caua a Ihova Atua unyimia irai iji auritai asega unyimia: et ato natga unyimia aien an namasacen alupas inigki: is amen ehelemia a Ihova Atua unyimia irai mesese is forte iji ehki; akis eti ihki atimi aijaua an tah nitai.
8Intis ahtaregdei ilpu etwaija akaija ilpu mapoi Isa, era amen Sier ara, um atga an nefalaig et ahes Ilad im Ision-ceber, ja par ahidaig caija um atga an nefalaig an namasacen Moab.
9Is tas ehelek a Ihova, um ika, Akumu jim imiisjisitai ehele nup u Moab aijaua, um jim ago nedoa vai ra: inki eti alupai caua inpece ura ainyak mika aki ohuun aijaua; kis idim alupai ilpu mapoi Lot nuarin pece Ar ainyak mika eri ohuun ara.
10Eris amen iran a nup Imai itu acen, eris alupas ara, um ahinag, um ijinies, et idivaig nup Enak;
11eris lep ika eris ilpu atimi actalactal ara et idivaig nup Enak; ja era anvi nidara a nup u Moab par ika nup Imai.
12Eris upyi amen Sier itu acen a nup u Hor; ja eris auahas ra a ilpu mapoi Isa, um isjeupigmoig ra, um amen an pece ura; et idivaig eris ago a nup Isreel an pece is alupai ra a Ihova mika eri ohuun ara.
13Kis ika ainyak, Akumu atidai aijaua, um algaunyi inwai yah Siret. Intis algaunyi inwai yah Siret akaija.
14Intis ahes Ketes-barnea akaija um atga irai mesese is dirte eet, ja par algaunyi inwai yah Siret; um imihum pan an nopan iyehki eris emesmas a ilpu eucsupo asega ira atimi, is idivaig is asaig ehele ra a Ihova.
15Is idim yetpam ira ra nikmai Ihova par auahas ra ehele atimi, um umihum pan an nopan iyehki eris atiih ara.
16Eris wat atiih a ilpu eucsupo asega um emesmas ehele atimi,
17is tas ehelek a Ihova, um ika,
18Namu atga an nuarin pece Ar aiek an nadiat inigki, nahaijin pece Moab:
19ja aku wit atga ubutpotet pan u ilpu mapoi Amon aijaua, jim imiisjisitai ehele ra, um jim apan ehele ra: inki eti alupai caua tah nuarin nobohtan u nup Amon ainyak mika aki ohuun aijaua; kis idim alupai ilpu mapoi Lot inpece inigki ainyak mika eri ohuun ara.
20Eris lep ika eris amen a ilpu atimi actalactal eahki itu acen; era anvi nidara a nup Amon par ika nup u Samsumai;
21eris alupas ara, um ahinag, um ijinies, et idivaig nup Enak; ja is auahas ra a Ihova an nuhup ura; eris isjeupigmoig ra ara, um ohuun inpece ura:
22is idivaig nedo o un vai ilpu mapoi Isa eris amen Sier ara, is wat auahas nup u Hor aien an nuhup ura; eris isjeupigmoig ra ara, um amen an pece ura, um imihum pam an nopan inig:
23im lep nup Evai eris amen Haserim ara, um yetpan Asa, eris auahas ra a nup u Kaftor eris ahes Kaftor ara, um amen an pece ura.
24Akumu atidai aijaua, um atga unyimia, um algaunyi inwai yah Amon: ek mun ati an nikmamia ainyak Saihon nup Emor, et atimarid Hesbon aien, im lep inpece o un: akumu ohuun aijaua, um ago nedoa vai yin.
25Ekpu atupun ainyak an nadiat inigki, um ika eri imtitaig caua um auatialidi vai caua a nup irai iji pece ithan nohatag; erupu ahgei intas vai caua ara, um eucjeucjeucaij, um ohocred vai caua.
26Kis abraig pan atimi an namasacen Ketemod ainyak par apan ehele Saihon natimarid Hesbon, um tas igpa, um ika,
27Ecrumu atga an pece unyum aijama: ecrupu atga an nefalaig alupas aijama, um eti ahidaig pan cama an matama ka an mauuma.
28Namu ahtai imi cama nitai hegaig va mune incama; um ahtai imi cama inwai va mune lumama: ja ecrupu atga ache an pece aijama;
29(is idivaig nedo o ilpu mapoi Isa era amen Sier ara, im nup u Moab era amen Ar ara;) um imihum pan an nopan iyehki ecrupu algaunyi Jortan aijama, um yetpan an pece is alupai cama a Ihova Atua unyima.
30Ja is ipjin a Saihon natimarid Hesbon vai ti jim ahtaregdei yin akaija: ja is alupai yin inliinmopon ipjin, im inliinmopon imiisjisitai, a Ihova Atua unyimia, va etpu atcijaig yin imi caua aien, et idivaig an nopan inig.
31Is tas ehelek a Ihova, um ika, Ek mun idim atcijaig Saihon ehelemia ainyak im inpece o un: akumu atupun aijaua, um ohuun inpece o un.
32Ja is apam eheleija a Saihon, im nup uran pece o un asega, par ago nedoa Jehas.
33Is ati yin imi caija a Ihova Atua uja; intis auud yin akaija, im ilpu halav atamaig o un, im nup uran pece o un asega.
34Intis atoraliak niji maliyum asega o un akaija an nopan iyehki, um auahas ehni ilpu atamaig, im ilpu takata, im ilpu halav, irai iji maliyum asega, intis eti udei tah akaija:
35intis lucsei niji itai eklim edo irai pece ache akaija imi caija, im lep inpadiaig irai iji maliyum.
36Is eti esjilid iraija tah inmaliyum is ethi, an niblai Aroer is eteuc an nahaijin nofowai Amon, im inmaliyum ubutpotet pan u nofowai, im lep Cileat: is atcijaig asega imi caija a Ihova Atua uja:
37akis eti apan aijaua an pece u nup u Amon ache, ka an tah anuarin u nofowai Jabok, ka irai iji maliyum irai edoon, ka an tah anuarin is acaiji caija a Ihova Atua uja.
Currently Selected:
Tyuteronome Nuarin-tas alupas 2.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)