Zefwaniya 1
1
1 #
2Bamy 22:1—23:30; 2Bya 34:1—35:27. Elye nilyo lizu ambile Nyambi ya Ngula kuli Zefwaniya ha shikati, oho Yoshiya mwana Amoni engile mwene mu Yunda. Zefwaniya wengile mwana Kushi, Kushi wengile mwana Ngendaliya, Ngendaliya wengile mwana Amaliya, Amaliya wengile mwana Hezekiya.
Mutena wa Nyambi
2Nikakomba byuma nimwabyo bili hanci.
Eshe nisho anamba Nyambi ya Ngula.
3Nikakomba bantu na tuyamana,
nikakomba tuyoni twatukanga muyilu na zinci zamu liwate.
Nikapukalisha bakakuluwa nimwabo na kulobesha bantu nimwabo hano hanci.
Eshe nisho anamba Nyambi ya Ngula.
4Nikolola liboko lyami ha bantu bali mu Yunda namu Yelushalema nimwamo.
Nikalobesha bakakulemesha Mbaalu baya balimo
na bakankombela baka mazina atunankishi.
5Nikalobesha bakakufunkama manungo hayilu ya matala wabo na kulemesha mutena,
ngonda na nyenye na baya bafunkamanga manungo na kulibeza kuli Nyambi ya Ngula,
ngoboni bakulibeza kami mu lizina lya nyambi Moleki.
6Nikalobesha baya banamfutamini na kubula kunkonkezeka,
hinge kwipula ngayi nibatwaminine.
7Mwenenu ku meho a Nyambi wa Makunge,
ndaba ha mutena uyo wa Nyambi ya Ngula uli hahepi.
Nyambi ya Ngula unawahishi nkombela na kuzilika nimwabo aba anehana.
8Nyambi ya Ngula unakwamba ngayi,
“Ha mutena uyo wa nkombela, nikashushula babilolo
na bana ba bamyene na baya nimwabo
bashinga kuvwala bivwalo bya bakamatunga ashenge.
9Ha mutena uyo,
nikashushula nimwabo bakakukana kulyata ha shikwiliti,
na mbuto nabaka kwinzalisha litala lya nyambi yabo
na byuma banawana mu mangunga
namu nzila ya kwongeza.”
10Nyambi ya Ngula ukwamba ngayi,
“Ha mutena uyo,
malila akayuvwanika ku Lipangati lya zinci,
na mbingo zikayuvwanika ku mbalila yayipya yili mu lukena.
Na mushindo wawunene wakupabuka ukayuvwanika ku binkanda.
11Lilenu na kutuwa mbingo, enu mwekala ku zinkunzu,
bakamikwebo benu nimwabo bakazihiwa,
nimwabo bakakulanda na kulandisha na shiliva bakalobeshiwa.
12Ha shikati shiyo,
nika shingashinga mu Yelushalema
na mimuni na kushushula nimwabo bali mumpoza,
baya bakwamba mu mitima yabo ngayi,
‘Nyambi ya Ngula kukatenda shashiwahe hinge sha shibi wufwako.’
13Wuheti wabo ukapukuliwa na matala wabo akanyemuniwa.
Hinge ndi bakazika matala kukalalamo bafwako,
hinge ndi bakalima mafuba a shinyanca,
kuka nwako waine bafwako.”
14Mutena wawunene wa Nyambi ya Ngula uli hahepi,
mwa shikuma ulinakwiza wanguwangu,
kukekala mungunina ha mutena wa Nyambi ya Ngula wawululu,
hinge muntu wangovu ukakaloka na kulila.
15Niwo ukenga mutena wa wukali,
ukenga mutena wa makando na malwa,
mutena wa mishunga na kuloba,
mutena wa mincimpwe na ku shipa.
Mutena wa makumbi na mincimpwe ya ku shipa shikuma.
16Mutena wakuvuma kwa mpandula
na miyoyo ya nzita na kulwisha zinkena
zekala mu bipata na baya bali kuyilu ya tupeshi.
17Nyambi ya Ngula unakwamba ngayi,
“Nikaleta makando ku bantu
ngayi mwanga bakende ngo batushishitwa,
ndaba banatende wubi kukwami.
Mukeza wabo bakawuyita ngo mema
na mituntu yabo yikabungana ngo wutoko.”
18Shiliva hinge ngolinde yabo kuka balamwina yifwako,
ha mutena uyo wa wukali wa Nyambi ya Ngula.
Na lihungu lya wukali wendi, hanci nimwaho ha kahoka na mundilo,
ndaba nimwabo bekala hanci ukabalobesha.
Currently Selected:
Zefwaniya 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
