Lute 3
3
Lute ukawana mulume wakumuyeka
1Oho kwapitile shikati, niho Naomi mukowendi ambile kuli Lute ngayi, “Mwanami, niku fwanina kukuwanina mulume wakukuyeka, ngayi mwanga uwane ku mwena. 2Anuka ngayi Mbowazi, uya wekalilenga na bakamilimo bendi babambuyama baya watendelenga nabo milimo, nengi kawushinda wetu. Haya yuvwa, ano mazolo Mbowazi ukekala ku likotwelo na kuleleka luku. 3Nohobene yanga ukayowele, pe uwabe mazi a lukumba, kami vwala bivwalo byobe byabiwahe. Niho uye oku akulelekela, ngoboni hinga umutoshesha ngayi alimuke ngayi obe niko uli, hantu unamanishi kulya na kunwa. 4Oho akushinga kulangana ulimuke oku akulanganina mutulo, niho uye ukamufwikulule ku mawulu wendi, pe ukalaleko. Niye ukakutongweza sha kutenda.”
5Lute wakumbwile ngayi, “Nikatenda byuma nimwabyo ebye ukuntongweza.”
6Nohobene Lute wayile ku likotwelo kami watendele nehe amutongwezele mukowendi. 7Oho Mbowazi amanishile kulya na kunwa, wekalile shiwahe mu mpoza. Niho ayile na kulangana ku mushiinzi wa mbale. Lute wabembelelele shiwahewahe pe wamufwikulwile ku mawulu niho alanganineko. 8Ku shikati sha wushiku oho Mbowazi abazumukile ha tulo na kufutuka, pe walikomokelele ha kuwana mbuyama nalangana ku mawulu wendi. 9Wamwipwile ngayi, “Kati obe yani?”
Wakumbwile ngayi, “Ami mukamulimo wobe Lute. Ndaba unengi kawushinda ou wafwanina kundama, uli na ngovu za kundama, haya nikulomba ngayi unyeke.”
10Mbowazi wakumbwile ngayi, “Nyambi ya Ngula mwanga akufuywele, mwanami. Aha unamoneshe nceshe zobe zazinene za mamaninino ku ba lupashi kunebye unatende, kupitakana ebye watendele ha kutatika kuli bamukowobe. Shafwanina kukwobe kuya na ku shinga ndumbana, wakuheta hinge ndi ncepwe, ngoboni kutenda noho wufwako. 11Haya hinga ulikekula, ndaba bantu nimwabo bali muno mu lukena banalimuku ngayi unengi mbuyama wankama. Nikatenda byuma nimwabyo ukunyepa. 12#Lute 2:20. Mwa shikuma nisho shinengi sha kupwisha ngayi ninengi kawushinda ou wafwanina kukulama, kami nili na ngovu hahobe. Ngoboni kwali mulume wa kawushinda waha mutima wakumpitakana. 13Yikala kuno wushiku nimwawo, pe ku lumenemene kawushinda wobe waha mutima ukushinga kukuliza, pe shashiwahe atende noho, ngoboni ndi kushinga wufwako kukutendela byawushinda waha mutima, nikubeza na Nyambi ya Ngula wakuyoya nohoboni nika kuliza. Haya langana kutwala ku lumenemene.”
14Nohobene Lute walalile ku mawulu a Mbowazi hantu naku lumenemene, ngoboni wapindukile oho shilolo kushe shiwahe, oho bantu kumumona bafwako, ndaba Mbowazi kaliha washingile muntu ngayi alimuke ngayi mbuyama wekala ku likotwelo. 15Niho Mbowazi ambile kukwendi ngayi, “Lifwikulule likwiza lyobe olyo unavwala, ulitandubwile hanci”. Pe walitandubwile. Mbowazi wayitilileho luku lwa wulemu wa kushinga kulingana makilo makumi abili, kami wamuyavwile kukatula na kumutwika ha shifuzi. Mbowazi wayile ku munzi. 16Oho Lute akumine ku munzi, mukowendi wamwipwile ngayi, “Oho wakakumako, shumangani shakatendiwa mwanami?”
Lute wamutongwezele nimwabyo ebye Mbowazi amutendela. 17Wanungileko ngayi, “Kaliha nafwanini kuboka mabokoboko kukwobe. Nohobene nampana eye luku nimwalwo.” 18Naomi wambile kukwendi ngayi, “Haya tula mutima mwanami, hantu unawana ngayi eshe shambo shikaketuka nahiti. Mbowazi kulehasho wufwako hantu naketulu eshe shambo lelo.”
Currently Selected:
Lute 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.