Baloma 7

Kutontolola bya ha maluwo

1Bawushinda nikwamba nenu mu kulimuka bya ndayano. Mukulimuka shiwahe ngayi ndayano zili na ngovu hali muntu oho ushili kuyoya. 2Ndaba kuya na ndayano mukazi unamangiwi kuli mukokwendi oho ashili kuyoya ngoboni ndi mukokwendi ukufwa, pe ukushoboloka ku ndayano za maluwo. 3Nohobene ndi ukuyekiwa ku mulume wamina, oho mukokwendi ushili kuyoya, uya mukazi bakamutoya ngayi ukutenda wunjenge. Ngoboni ndi mukokwendi ukufwa, pe uya mukazi nashoboloko ku ndayano za maluwo, hinge ndi ukuyekiwa ku mulume wamina, kutenda wumambe wufwako.

4Nohobene bawushinda wami, nisho shili na kukwenu. Nanenu munafu kuya na ndayano ndaba muli bimamo bya lutu lwa Kilishitu. Haya muli bendi ou nashanguku ku bafu ngayi mutendele Nyambi milimo ya ku fwanina.

5Oho twekalilenga mu wuntu, mahungu a wubi afumine ku ndayano, atendele milimo mumwetu, kami byayimine lufu. 6Ngoboni wuluno tunashoboloko ku ndayano, ndaba tu nafu ku shuma eshe shatu mangile. Haya Moyo wa Kuyela ukutuyavwa kutendela milimo Nyambi na nzila yayipya, kaliha kami na nzila ya mwaka iya ya kukonka ndayano za kutatika.

Ndayano na wubi

7 # Kut 20:17; Nday 5:21. Haya tukamba bishini? Kati twambe ngayi ndayano zazibi ndi? Byo, kaliha noho! Ngoboni ndayano nizo zinatumoneshe kulimuka wubi. Ndaba shinga ndayano kaliha zambile ngayi, “Hinga ulishoza shuma shaminobe,” shinga kaliha nalimuka kulishoza. 8Ndaba ya ndayano, wubi unawana mwanya wakupindula mumwami kulishoza kwa mishobo nimwayo. Ndaba shinga kowa ndayano, wubi shinga wafwile. 9Mwaka nayoyele oho kwabulile ndayano, ngoboni nalimukile ndayano, hohobene wubi wahanyine. 10Nanami nengile ngo ninafu, pe ndayano zemikiwile kutwala bantu ku wumi, ami nawanine ngayi zikutwala ku kufwa. 11#Shit 3:13. Wubi wawanine mwanya ndaba ya ndayano, wubi wanyongezele, pe wanzihile.

12Nohobene ndayano za kuyela, za kwoloka, zaziwahe. 13Kati shuma shashiwahe shikutwesha kuleta kufwa kukwami ndi? Nyambi akane! Ngoboni wubi niwo unanzihi ha kuliyavwisha shuma shashiwahe ngayi wubi umoneke ngayi wubi.

Mushunga uli mu muntu

14Tukulimuka ngayi ndayano zikufuma kuli Nyambi, ngoboni ami nili muntu wakupopa, unalandishiwi kwinga ndungo ku wubi. 15#Nga 5:17. Kuyuvwishisha shiwahe nifwako ebye nikutenda, ndaba nifwako kutenda ebye nafwanini kutenda. Ngoboni nikutenda ebye nikubula ku fwanina kutenda. 16Ngoboni nifwako kutenda byabibi ebye nikutenda, nikwitabila ngayi ndayano zaziwahe. 17Pe ebye bikutendiwa, kaliha ami nikubitenda, ngoboni wubi ukwikala mumwami. 18Nikulimuka ngayi mumwami kowa shuma shashiwahe shikwikalamo. Oho nikwamba ngayi, “Ami,” nikwamba nyinkalo yami ya ku haka wubi. Hinga ngayi nikushinga kutenda byuma byabiwahe ngoboni nifwako kuwana nzila ya kutenda byuma byabiwahe. 19Kaliha nikutenda wuwahe ou nafwanini kutenda, ngoboni wubi ou nikubula kushinga niwo nikutenda. 20Ndi nikutenda ebye nabula ku shinga, kaliha ami nikushitenda, ngoboni wubi ukwikala mumwami.

21Nohobene nawana ngayi, oho nikushinga kutenda byabiwahe, wubi ukwikala na nami. 22Mutima wami uku wahilila mu ndayano za Nyambi, 23ngoboni mu lutu lwami niku mona ndayano zamina zikulwisha ndayano za mu mutima wami. Ndayano eze zinanyingishi kwinga ndungo wa ndayano za wubi ou uli mu lutu lwami. 24Kati nili muntu wakutamwa nahiti! Yani ukandamwina ku lutu olu lu kuntwala ku kufwa? 25Nikukambilila kuli Nyambi, ukampulwisha kupitila muli Yeshu Kilishitu Mwene wetu!

Nohobene na mutima wami nikutendela milimo ndayano za Nyambi, ngoboni lutu lwami lunamangiwi ku ndayano za wubi.

Currently Selected:

Baloma 7: LLK

Highlight

Compare

Copy