Baloma 13

Milimo tunafwanini kutenda ku bakakulela litunga

1Muntu nimwendi ombatale bakakulela litunga. Ndaba kowa wene wakubula kufuma kuli Nyambi, aba bamyene baliko Nyambi niye unabetabilishi ngayi bekaleko. 2Nohobene niye ukukana wene, ukukana ebye anemiki Nyambi. Pe niye ukukana, ukulishingishila kuyatishiwa niye mwine. 3Ndaba bakakulela, kaliha batinishanga bakakutenda milimo yayiwahe, ngoboni bakakutenda milimo yayibi. Ukushinga ngayi ubule kwikala na bowa wakutina bamyene ndi? Tenda shiwahe, pe bakakuyemeza. 4Ndaba benga bakamilimo ba Nyambi, pe wenga mulimo wabo ngayi bakuyavwe. Ngoboni ndi ukutenda shibi, tina, ndaba bali na ngovu za kukushushula. Batulela benga bakamilimo ba Nyambi, pe bashushulanga bakakutenda wubi ku monesha wukali wa Nyambi. 5Nohobene mu ku fwanina kwombatala batulela, kaliha ndaba ya wukali wa Nyambi, ngoboni ndaba ya shikeketima.

6 # Mat 22:21; Mako 12:17; Luka 20:25. Ndaba yanebye, munafwanini kutela mutelo kami, ndaba batulela benga bakamilimo ba Nyambi, pe unengi mulimo wabo kutenda ebye. 7Nohobene bapanenu nimwabyo binafwanini, panenu mutelo kukwendi uku fwanina mutelo, patalenu kukwendi uku fwanina kupatalisha, panenu maleema kukwendi uku fwanina maleema na kuyemeza ou uku fwanina kuyemeziwa.

Milimo ya muntu kuwamina

8Hinga mwikala na mukuli ku umo na wamina, ngoboni lihakenu umo na wamina. Ndaba niye uku haka wamina unenzalishilili ndayano. 9#Kut 20:13-15, 17; Nday 5:17-19, 21; Bal 19:18. Ndaba ndayano zikwamba ngayi, “Hinga utenda wumambe, hinga uziha, hinga uyiba, hinga ulishoza shuma shaminobe,” nimwabyo ebye bili mu ndayano zikwamba ngayi, “Haka ndambo yobe ngonehe walihaka obe mwine.” 10Ndaba ndi uku haka muntu, kutwesha kumutenda byabibi wufwako. Nohobene kulihaka kunengi kwinzalishilila ndayano.

11Tendenu noho, ndaba munalimuku ngayi shikati shinakumu ngayi enu mupinduke mu tulo. Ndaba kupuluka haya kuli hahepi nanetu kupitakana ngonehe twakulupilile ha muntanzi. 12Wushiku uli na kuya na kumana, nohobene mutena uli hahepi. Haya tushiye milimo ya mincimpwe, pe tuvwale makebo a mwaana. 13Twende shiwahe ngonehe bantu bakwenda mu mwaana, hinga kwikala ngwaluke na kukolwa, hinga kwikala lwiholwiho na likenkemi, hinga kwikala nkani na mwili. 14Ngoboni livwikenu Mwene Yeshu Kilishitu, shiyenu kukobokela mahungu a wuntu, ngayi mubule kutenda bifungo byawo.

Currently Selected:

Baloma 13: LLK

Highlight

Compare

Copy