Zincimpi 30
30
Mazu a Angule
1Mazu wa Angule mwana Yake, waku Masha,
Nyambi kaliha uli na nami, Nyambi kaliha uli na nami, napopo shikuma.
2Mwa shikuma, nenga wakuyeba shikuma kupitakana bantu nimwabo,
nifwazo ngana za kufweka ngo za bantu.
3Shilolo nililongeshe ngana,
hinge kulimuka nifwako niye wa Kuyela.
4Kati yani nakandama kuyilu na ku huluka?
Kati yani wakungula mpepo mu liboko lyendi na kuyikamatila?
Kati yani wavungila mema mu shivwalo shendi?
Kati yani wazikanga zinkumo za hano hanci?
Kati lizina lyendi yani? Kami lizina lya mwanendi kati yani?
Ndi hiwulimuka ntongweze.
5Mazu a Nyambi nimwawo enga akupwisha,
Nyambi wenga likebo lya baya ba kutinina mumwendi.
6Hinga uyakila ku mazu wendi boha,
kutina akukalihila, pe ukuwaniwa kwinga wa mahalo.
7Na kukunyepa byuma bibili,
kami hinga unkanina oho shilolo nifwe.
8Fumisha mumwami mahalo na makula,
hinga uncepwesha kami hinga umpana wuheti,
ndeleshe na byakulya ninafwanini kulya,
9kutina niyikuta shikuma, pe nika kukana na kwamba ngayi, “Kati Nyambi ya Ngula nengi yani?
Ndi nikushepwa kami pe nikuyiba na Kubipisha lizina lya Nyambi yami.”
10Hinga utungwila mukamulimo kuli hekulyendi,
kutina akukuta pe ukawana mulandu.
11Kubali bantu bamo ba kutanga batatizabo,
na kubula kutandalisha bamandizabo.
12Kubali bantu bamo ba kulimona ngayi ba kuyela,
ngoboni shilolo bayoweshiwe mazilo wabo.
13Kubali bantu bamo meho wabo akwimana,
kami bikuku bya meho wabo bya kukabalala.
14Kubali bantu bamo mayewe wabo anengi mukwale,
mayewe wabo anengi zimpoko, akuvwota bancepwe kubafumisha hano hanci,
akuvwota ba kuyanda na kubafumisha mukati ka bantu.
15Linzambo wahuminanga kubili,
nimwako kwa lilanga ngayi, “Mpane, wamina kami ngayi, mpane.”
Byuma bihatu byabulanga kwikuta,
hinge binaa byabulanga kwamba ngayi, “Nanyikwakale.”
16Kalunga ka bafu, mbuyama wa mumba
na hanci habulanga kwikuta mema,
na mundilo wabulanga kwamba ngayi, “Nanyikwakale.”
17Muntu uya ukushilawiza tatiyendi, na kukendula mandiyendi,
ukaliwa ku makwangala amu mukulo, kami ukaliwa ku makubi.
18Kuli byuma bihatu byenga bya kukomokesha,
hinge binaa ebye nabula ku yuvwishisha.
19Eshe atukanga ngonga mu mbimbayilu,
eshe endanga liyoka ha limanya,
eshe shishepe shendanga mu mawate,
naneshe endanga mulume ahakanga mbuyama.
20Eye niyo nzila atendanga mbuyama walwiholwiho,
watendanga wumambe amanisha akuyowela pe hakwamba ngayi, “Kowa ebye nabipishi.”
21Kuli byuma bihatu byakankishanga kaye,
hinge binaa ebye nabula kutwesha kuliyuvwa nabyo.
22Ndungo oho akwinga mwene,
wakuyeba oho anekutu byakulya,
23mbuyama wakubula kuhakiwa oho akuyekiwa ku maluwo,
ndungo yendi uya mukazi ukamuyanga maluwo.
24Kuli byuma binaa byabishe shikuma hano hanci,
ngoboni bya kukeya shikuma.
25Mashenze enga tulongolo twa kubula ngovu,
ngoboni akonganga byakulya ha shikati sha kuteza.
26Masheha enga tuyamana twa kubula ngovu,
ngoboni bayaka munzi wabo mu mamanya.
27Mikumbi kaliha bekala na mwene,
ngoboni bendanga mu bipani.
28Ukutwesha kukwata muholobozi na maboko,
ngoboni ukuwaniwa namu musheke.
29Kubili byuma bihatu byangwahilishanga oho byendanga na wulolo,
binaa biya byendanga shiwahewahe,
30shimbwi wa ngovu shikuma hakati ka tunzama,
mukakubula kutina shuma shamina.
31Likombwe wakwituka shikuma,
na shikungwe wa mpongo na mwene ukwenda kumbili ya bakanzita bendi.
32Ndi wenga wakuyeba na kulilundumika,
hinge ndi wavumbanga byabibi, fwika ku kanwa kobe.
33Ngonehe muntu ukufweta mahwe, ukawana mazi,
na kukondolola muzulu wa muntu, kwatutwishanga mukeza,
ukupilama shawangu, pe ukekala mu wukalu.
Currently Selected:
Zincimpi 30: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.