Zincimpi 28
28
1Bakuluwa betukanga oho waku batanda kowa,
ngoboni bakulunga benga ba kukanca ngo shimbwi.
2Oho litunga liku bipisha likuleliwa na batulela banungunanungu,
ngoboni litunga likashuma na kwikala shiwahe ndi likwikala na batulela ba kukeya.
3Muntu nimwendi ukulyatilila bancepwe,
nafweke ngo mvula wa nkuli uku bipisha byakulya.
4Obo bakana kutenda mwayila ndayano ba kuyemeza muntu wakuluwa,
ngoboni bakakulama ndayano ba kukona bantu bakuluwa.
5Bantu bababi kaliha bayuvwishishanga byakwoloka,
ngoboni baya bashinga Nyambi ya Ngula ba ku yuvwishisha shiwahe nimwabyo.
6Shashiwahe ncepwe ukwenda mu nzila ya kupwisha,
kupitakana muntu wakuheta ou uli na biheka byabibi.
7Mwana ukulama ndayano za Nyambi wenga wangana,
ngoboni wakutenda wuhoni na muntu wakubula ku fwanina ukuyeneshesha tatiyendi.
8Ndi ukuwezelela wuheti wobe na nkambiko yayinene shikuma ya kukeyela bantu,
pe wuheti wobe ukaya kuli uya uli na nceshe na bancepwe.
9Ndi muntu umo ukuzika matu wendi ngayi abule kuyuvwa mulao,
hinge malombelo endi akwinga a wunyengwe kuli Nyambi.
10Ou ukushanwisha muntu wakwoloka na kumutwala mu nzila yayibi,
ukawila mu liteke lyendi niyemwine,
ngoboni bakubula nyanco bakekala na likona lyaliwahe.
11Mukakuheta walimonanga ngayi uli na ngana,
ngoboni ncepwe uya mukaku yuvwishisha ukamupitakana.
12Oho kalela wakulunga akukona kukwikala ku wahilila kwakunene,
ngoboni oho kalela wakuluwa a kulela bantu ba kupanzana.
13Ou ukuholeka milandu yendi kukatangama wufwako,
ngoboni ou ukulitabila na kuwu futamina Nyambi ukamuyuvwila nceshe.
14Uli na mfuywezi uya ukuyuvwila Nyambi ya Ngula bowa shikati nimwasho,
ngoboni ou ukukaluhisha mutima wendi ukekala mu malwa.
15Kalela wakuluwa,
kulela bantu ba kuyanda nafweke ngo shimbwi ukubuluma na mbeya ukuhashoka.
16Kalela wakubula ngana nengi mukakulyatilila wanguma,
ngoboni ou ukuzimba wuheti wakubula kuwana mu kupwisha ukayoya matena amengi.
17Ndi muntu nayiti mukeza waminendi,
ukenga wakutampwa kutwala kulufu lwendi,
kowa wamina ukamuyavwa.
18Muntu ukwenda mukwoloka ukapuluka,
ngoboni muntu wakuluwa ukawa.
19Ou ukulima mfuba yendi ukekala na byakulya byabingi,
ngoboni wakukonka byowa ukenga ncepwe shikuma.
20Muntu wakulunga ukekala na mfuywezi,
ngoboni wakunyankupila ngayi ahete ukashushuliwa.
21Ku monesha shihota kaliha shashiwahe,
ngoboni muntu ukutwesha kutenda shibi ndaba ya kalizika kanwa.
22Muntu wa lukatwa wanyankupila ngayi awane wuheti,
kulimuka ngayi wuncepwe ukamwizililila wufwako.
23Ou ukwambila muntu ku mamaninino ukayemeziwa,
kupitakana wa lulimi lwa mazu a kutekenyesha.
24Wakuyibila tatiyendi hinge mandiyendi pe hakwamba ngayi, “Owe kaliha mulandu,”
unengi muhoni wa mukakunongesha.
25Muntu wa mutongo washonkomonanga mangunga,
ngoboni ou ukukulupila muli Nyambi ya Ngula ukatangama.
26Ou ukulimona ngayi wakukeya niyemwine wenga wakuyeba,
ngoboni ou ukwenda na ngana ukapulwishiwa.
27Ou ukupana ku bakakuyanda kukabula shuma wufwako,
ngoboni ou ukuvunga liboko lyendi kukwabo ukekala na bikuto.
28Oho batulela bakuluwa ba kulela, bantu ba kupanzana nibo bamwine,
ngoboni oho batulela bakuluwa ba kuloba, bakulunga ba kuvula.
Currently Selected:
Zincimpi 28: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.