Zincimpi 19
19
1Shashiwahe kuli ncepwe uya ukwenda mu kulunga,
unapitakana shibulangana uya ukuwana byuma mumahalo.
2Kaliha shashiwahe muntu ngayi ekale na ntukumina kwakubula kalimukisho,
mukakwenda muwanguwangu wayongeshanga nzila yendi.
3Wuleya wa muntu walobeshanga nzila yendi,
mutima wendi wapilaminanga Nyambi ya Ngula.
4Wuheti waletanga bahoni babengi,
ngoboni ncepwe bahoni bendi bamukananga.
5Paki wa mahalo ukashushuliwa,
kami mukakwamba mahalo kukapanza wufwako.
6Bantu babengi bashinga kuyamiziziwa na muntu wampupo,
bantu babengi balikwatanga wuhoni na mukakupana bishemo.
7Haya ndi bawushinda wa muntu ba kumushiya ndaba ya wuncepwe,
pe bahoni bendi bakakumina hati, nka bakamukana?
Hinge ndi ukabalambilila kuka batwesha wufwako, bakamupanzana.
8Ou ukuwana ngana ukuliyavwa niyemwine,
mukaku yuvwishisha ukatangama.
9Paki wa mahalo ukashushuliwa,
kami mukakwamba mahalo ukaloba.
10Kaliha shashiwahe ngayi shibulangana ayoye mu wulolo,
hinge ndungo ngayi alele bana ba bamyene.
11Ngana zenga zaziwahe, zakanishanga muntu kupilama shawangu,
oho akuyatila mulandu, ukawana maleema.
12Wukali wa mwene wafweka ngo kubuluma kwa shimbwi,
ngoboni kuyamiziza kwendi kwafweka ngo mume uli ku mwila.
13Mwana wakubula ngana walobeshanga tatiyendi,
kami mukazi wa nkani wafweka ngo mvula wa muvumbi.
14Litala na wuheti byenga likona lyafumanga kuli tatiyendi muntu,
ngoboni Nyambi ya Ngula niye wapananga mulume mukazi wangana.
15Wuvwa walangikanga muntu lalee,
kami muntu wawuvwa wekalanga na nzala.
16Ou ukulama ndayano ukakoweza wumi wendi,
ngoboni ou ukuzilimbwilisha ukafwa.
17Ou ukuyuvwila nceshe bancepwe ukukolotesha Nyambi ya Ngula,
kami Nyambi ukamuhingishila ku ntendelo yendi.
18Keyesha mwanobe ha shikati ashili kanuke,
ndi wufwako ukutenda noho pe unakuyavwa kanuke kulilobesha niyemwine.
19Muntu wamukali shikuma, mulehe aliyumbile mulandu,
ndaba ndi ukumulamwina, ukabokelaho kami kumulamwina.
20Yuvwilila mazu akukushiwulula kami yitabila kulongeshiwa,
ngayi mwanga uwane ngana.
21Muntu wekala na bifungo byabingi mu mutima,
ngoboni shifungo sha Nyambi ya Ngula nisho shatendiwanga.
22Shalisheni kwinga wa mutongo,
shashiwahe kwikala wa kushepwa kupitakana muntu wa mahalo.
23Kuyuvwila Nyambi ya Ngula bowa niwo wumi,
ou ukumuyuvwila bowa ukwikala shiwahe kami malamo kumulalabila afwako.
24Muvwa wengizanga liboko lyendi mu lulonga,
ngoboni wakwanganga kubwesha liboko lyendi ku kanwa.
25Shushula muntu wawuncengwe mwanga byowa balilongeshe ngana,
keyesha mukaku yuvwishisha pe ukekala na kalimukisho.
26Ou ukutenda mangunga na tatiyendi na kutanda mandiyendi,
nengi mwana waletanga lisheni kami nengi wa lihandu.
27Mwanami ndi ukulehasho kulilongesha,
pe kukekala na kalimukisho wufwako.
28Paki wa shihulahuli wawelokanga kuyata kwa kupwisha,
pe kanwa ka muntu wakuluwa kavwotanga byabibi.
29Bantu ba wuncengwe banatatilili ku shushuliwa,
kami bantu bakubula ngana bakazipoliwa ha myongo.
Libuka Lya Kuyela © Bible Society of Zambia, 2020.