Zincimpi 16
16
1Muntu wayongolanga mu mutima,
ngoboni Nyambi ya Ngula niye wakumbulanga.
2Zinzila za muntu nimwazo zenga zaziwahe kukwendi,
ngoboni Nyambi ya Ngula niye mukakufwanikiza bihanganiko.
3Kundika mulimo wobe kuli Nyambi ya Ngula,
pe bihanganiko byobe bikatangama.
4Nyambi ya Ngula walilengelele byuma nimwabyo ha shifungo shendi,
hinge bantu bakuluwa bali na mutena wabo wa makando.
5Nimwendi mukakuliyemeza wenga wa wunyengwe kuli Nyambi ya Ngula,
mwa shikuma ukashushuliwa.
6Yinga muka nceshe na kwoloka, pe Nyambi ya Ngula ukakuyatila wubi wobe,
yuvwila Nyambi ya Ngula bowa pe wubi ukafuma kukwobe.
7Nyambi ya Ngula oho aku wahilila na zinzila za muntu,
hinge bamalamo bendi ukubengisha ngayi bekale nendi mu ku mwena.
8Shashiwahe kwikala na byabishe hinga wenga muntu wakulunga,
kupitakana kwikala na byabingi bya kuwana mu nzila yayibi.
9Muntu ukutwesha kuhanganikila mu mutima niyemwine nzila yendi,
ngoboni Nyambi ya Ngula niye wamwendeshanga.
10Mu kanwa ka Mwene mu kufuma nyatilo ya wunyambi,
kutwesha kutengamisha ha kuyata wufwako.
11Bipimisho na bifwanikizisho bya kupwisha byenga bya Nyambi ya Ngula,
shipimo nimwasho washilimuka.
12Shenga shuma sha wunyengwe ku bamyene kutenda byabibi,
ndaba litanda lya shumishiwanga na kutenda bya kulunga.
13Bamyene bashinga mivumbo yambanga byakwoloka,
kami bahaka ou ukwamba bya kulunga.
14Wukali wa mwene wenga ngonehe ntumwana wa lufu,
ngoboni muntu wangana ukutwesha kuwu fwomona.
15Kubesha kwa lupala lwa mwene kwaletanga wumi,
pe kuyamiziza kwendi kwafweka ngonehe makumbi aletanga mvula washituwizi.
16Kuwana ngana kwakuwahe kupitakana ngolinde,
kuhata ku yuvwishisha kwenga kwakuwahe kupitakana shiliva.
17Nzila ya muntu wakwoloka ya mufumishanga ku byabibi,
ou ukulama nzila yendi ukukoweza wumi wendi.
18Kuliyemeza kwatwamininanga muntu mu kuloba,
mutima wakulilundumika washingishilanga muntu ngayi awe.
19Shinengi shashiwahe kwikala na mutima wakulilimbwilisha hamo na bakakuyanda,
kupitakana kulitapila lipuku hamo namu kakuliyemeza.
20Ou ukwombatala ku lizu ukatangama,
uli na mfuywezi ukakukulupila muli Nyambi ya Ngula.
21Muntu uli na mutima wangana ukutumbiwa ngayi wakukeya,
wa nyambilo yayiwahe wawezelelanga kalimukisho.
22Ngana zenga kaheloke ka wumi kukwendi ulinazo,
ngoboni bakuyeba bashushuliwanga ndaba ya wuleya wabo.
23Muntu wa mutima wangana, nyambilo yendi ya kukeya,
kami za wezelelanga kalimukisho mukanwa kendi.
24Mazu amawahe anafweke ngonehe likanza lya wushi,
amatobe ku moyo kami anyongomanishanga lutu.
25Kuli nzila yamonekanga wuwahe ku muntu,
ngoboni mamaninino ayo enga lufu.
26Nzala yaleteshanga muntu kukalamana,
kami kanwa kendi niko kamukandamikanga.
27Shihulahuli wavumbanga byabibi,
na nyambilo yendi yafweke ngo mundilo ukuhokesha.
28Muntu wamubi mutima waletanga mangunga,
kami katungwila katapululanga muntu na muhoni wendi.
29Muntu wa mushunga wahonganga kukoka ndambo yendi,
na kumutwala mu nzila yayibi.
30Keya na muntu ou ukulelula ukufunga byabibi,
ou ukuminuna mivumbo ukushonkomona byabibi.
31Mutwe wa nzimvwi unengi munana wa maleema,
zawaniwanga mu kuyoya kwa kulunga.
32Shashiwahe kubula kupilama shawangu kupitakana muntu wa ngovu,
kami ou wakwatanga mutima wendi ukupitakana ou ukulela lukena.
33Bantu bashanganga nyela ku shingishisha shifungo sha Nyambi,
ngoboni Nyambi ya Ngula niye walimukanga ebye bikatendiwa.
Libuka Lya Kuyela © Bible Society of Zambia, 2020.