Zincimpi 1
1
Wuwahe wa Zincimpi
1Zincimpi za Sholomoni, mwene wa Ishalela, mwana Ndavita.
2Zincimpi ezi zikuyavwa bantu kwikala na ngana,
na ku longesha ngayi bayuvwishishe nyambilo ya zinguli,
3Ziku ku longesha kwinga wakukeya,
na kwoloka na kulunga na kupwisha.
4Ziku panika ngana za kutenda byabiwahe ku baya bali mu wulube,
na kupanika ku bandumbana ngana na kukeya.
5Zincimpi ezi zikuwezelela ku ngana ku baya bali na zo,
na kutwaminina bakakulilongesha,
6ngayi bayuvwishishe zincimpi na zinguli,
za bakakukeya na tushau twabo.
Kulongesha Bandumbana
7 #
Yobo 28:28; Nyi 111:10; Zinc 9:10. Kuyuvwila Nyambi ya Ngula bowa niwo mabalikilo a ngana,
ngoboni muntu wakuyeba ukukana ngana na bilongesha.
8Mwanami, yuvwilila bilongesha bya tatiyobe,
pe hinga ukana ebye akukulongesha mandiyobe,
9ndaba bilongesha byabo byafweka ngonehe ngala za ku mutwe wobe,
na mukali wawuwahe mu ncingo yobe.
10Mwanami, ndi bakawubi ba kukwongeza,
hinga wuyitabila.
11Ndi bakwamba ngayi,
“Yeka tubelamine muntu mwanga tumuzihe,
yeka tushintikize muntu wakubula mulandu.
12Yeka tubamine hibayoya, ngonehe shinzimbi,
tubamine banzimba ngonehe bayo banaminiwi na kaye.
13Pe tukashimba byuma byabingi bya kulishiyashiya,
na kwinzalisha matala wetu na byuma bya kupukula.
14Yeka ulifungile netu,
pe tukalitapile nimwabyo tukawana.”
15Mwanami, hinga wenda nabo bantu banoho,
hinge kutenda biya ba kutenda.
16Ndaba bantu aba bikati nimwabyo bakakutenda byabibi,
ba kunyankupila na kuziha.
17Kaliha shashiwahe, ku manyika kantamba,
ndi tuyoni otu ukumanyika hitumona.
18Bantu bakakutenda nehe, ba ku li manyikila kapeto nibo bamwine,
mu kapeto muya bakafwamo.
19Nibyo byaholokanga ku bakakuheta mu zinzila zazibi,
balobeshiwanga na wuheti uya banatongokele.
Ngana Zili na kwihana
20Ngana zili na kubilikiza mu mikwakwa,
na ku myanya ya kulandishila.
21Ngana zili na kubilikiza,
ku mapangati a zinkena nanoku kunakungulukili bantu babengi.
22“Kati shikati sha kukuma hati enu bakuyeba,
mukatwalilila na kutenda byuma byowa?
Kati shikati sha kukuma hati enu bakuyeba mukazimba ngana?
Kati kulilongesha mufwako ndi?
23Yuvwilililenu oho nikumilongesha,
nikamitongweza bihanganiko byami,
na kumi tontwelela mazu wami.
24Namihanine ngoboni kaliha mwanyuvwile,
pe nolwele liboko lyami ngoboni kaliha mwatwalileko ngana,
25ndaba munalimbwilishi mazu wami,
na kubula kutenguluka oho namishuzu.
26Nanami kami, nikamihepa ha shikati sha makalikiza wenu.
Nikamihengamina, oho mukekala mu makando.
27Oho makando akamishintikiza ngonehe nkuli,
na makalikiza akamizilila ngonehe kakundukundu na wukalu na malwa.
28Niho mukanyihana,
ngoboni nifwako kuka kumbula,
bakancingancinga ngoboni bafwako kukangwana.
29Ndaba mwakanine ngana,
pe kaliha mwalihatilile kuyuvwila Nyambi ya Ngula bowa.
30Enu kaliha mwombatalile mazu wami,
kami mwayinishile ku shuza kwami nimwako.
31Nohobene mukalya mikabo yinafwanini, ntendelo yenu.
Pe mukekuta na mikabo ya ntendelo yenu.
32Bantu bakuyeba balobanga,
ndaba ya kukanangana.
33Ngoboni ou ukayuvwilila kukwami ukawana kulamwina,
pe ukekala mu ku mwena na kubula kulikekula.”
Currently Selected:
Zincimpi 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.