Kulaba 4
4
Milimo ya balevi ba lupashi lwa Kohati
1 #
Kul 1:50-53; 3:5-8, 21-37; 8:19; 18:3-4, 23. Nyambi ya Ngula wambile kuli Moshesha na Aloni ngayi, 2“Ulabe livumo lya Kohati mukati ka Balevi, balabe mu mavumo amashe namu mapashi, 3na kulaba balume nimwabo bali mukati ka myaka makumi ahatu na makumi mutanu, aba batweshele kutenda milimo yamu ntanda yaku meho a Nyambi ya Ngula. 4Mulimo wabo ku Ntanda wakundama ku byuma bya kuzila shikuma.”
5Nyambi ya Ngula wafundizizile Moshesha kami nehe ngayi, “Oho shikenga shikati sha kutuntuka ha munkungwa, Aloni na bana bendi bakengina mu ntanda mu kushimba shibaamba hambili ya Likwati lya Kulimama kwa Nyambi ya Ngula na kufwikishako Likwati lya wupaki. 6Bakayaka shifwiko sha shitembe sha shitutunga sha kunyuka shiwahe hayilu yalyo na kuyalaho likwiza lyaliliti lya wuhombo hayilu yalyo, pe niho kwingizamo mibanda ya kushimbila.”
7“Bakayala likwiza lya wuhombo hayilu ya tebulu ya kuyaka mankende akutupula kuli Nyambi ya Ngula na kuyakaho zindonga na zinyungu za kuyohela mitondo ya kutwa yakuhokesha na zinyungu za nkombela na zintesho za waine za ntupu. Hakekalenga mankende ha tebulu shikati nimwasho. 8Bakatandubula likwiza lya kufubila hayilu ya neshe nimwasho na kuyaka shifwiko sha shitembe sha shitutunga sha kunyuka shiwahe hayilu yasho, pe niho mukengize mibanda ya ku shimbila. 9Bakashimba likwiza lya wuhombo na kufwika ha kuyakila mimuni hamo na mimuni yayo na zimanya na zihebe na mishashi ya mazi a olive nimwayo. 10Bakayivungile mu shitembe sha shitutunga sha kunyuka shiwahe na byuma byayo nimwabyo na kuyiyaka ha maleenge akushimbila.”
11“Niho kami bakayala likwiza lya wuhombo hayilu ya kaala ka ngolinde, bakayaka shitembe sha shitutunga sha kufwika sha kunyuka shiwahe na kufwika hayilu yasho, pe hikwingiza mibanda ya ku shimbila. 12Bakashimba bitendesho nimwabyo bya kuliyavwisha nabyo mu mwanya wa kuyela na kuvungilabyo mu likwiza lya wuhombo na kuyaka shitembe sha shitutunga sha shifwiko sha kunyuka shiwahe na kufwika hayilu yabyo na kubiyaka ha maleenge akushimbila. 13Bakakomba mutoko wa mazi kuwu fumisha ku kaala, pe bakatandubula likwiza lya kufumbuluka hayilu yasho. 14Niho bakayakaho byuma nimwabyo bya kuliyavwisha ku mulimo waku kaala, nibyo binengi binzoyo bya kukalila mundilo na tuhanto na mafwosholo na zindonga za kukunama zazinene. Niho bakayala shitembe sha shitutunga sha kunyuka shiwahe sha kufwika hayilu yasho na kwingizamo mibanda ya ku shimbila. 15Oho Aloni na bana bendi bamanishakale kufwika mwanya wa kuyela na bya kuliyavwisha nimwabyo, oho bantu ba kutuntuka mu munkungwa, livumo lya Kohati bakeza mu kushimba byuma bya kuzilikiwa, ngoboni kaliha bafwanina kukwata ku byuma bya shizila, ndelewa bakafwa. Ebye nibyo banafwanini kutenda bakalivumo lya Kohati shikati nimwasho oho ntanda yikutuntuliwa.”
16“Eliza mwana mukankombela Aloni, ukalama mazi a mimuni na incence na zintupu za mpeka zaha mutena ha mutena na mazi akuwaba na byuma nimwabyo kami na byashenge bya mu ntanda biya byazilikiwa kuli Nyambi ya Ngula.”
17Nyambi ya Ngula wambile kuli Moshesha na Aloni ngayi, 18“Hinga witabila livumo lya Kohati ngayi balobe mukati ka Balevi, 19ndi bakwiza kwakwipi na byuma ebye byazilikiwa. Aloni na bana bendi bakengina mukati mu kutontolola mulimo wa muntu na muntu na kumutongweza eshe akashimbanga. 20Ngoboni ndi baka Kohati bakengina mu ntanda na ku mona bakankombela hibawahisha bingwalingwali bya kuzilikiwa ha kulongalonga bakafwa.”
Milimo ya Balevi ba livumo lya Ngeshona
21Nyambi ya Ngula watongwezele Moshesha ngayi, 22“Laba livumo lya Ngeshona mukati ka Balevi, balabe mu mavumo amashe namu mapashi, 23kami ulabe balume nimwabo bali na myaka mukati ka makumi ahatu na makumi mutanu, aba ba kutwesha kutenda mulimo mu ntanda ya shikungulukilo. 24Bakekala na mulimo waku kulika bingwalingwali ebye Bangeshona, 25ntanda na shifwiko shayo sha mukati na shifwiko shayo sha ha munkanda na shifwiko sha shitembe sha shitutunga sha kunyuka shiwahe sha hayilu yayo, mu wumbo waku menginino, 26na miwumbo na nyimbwa za shipango shiya shazinguluka ntanda na kaala na miwumbo yaku menginino a shipango. Bakatenda milimo nimwayo yikushingiwa yaha byuma ebye. 27Ba Moshesha na Aloni nibo bakamona ngayi Bangeshona bakatenda milimo nimwayo na ku kulika byuma nimwabyo biya banabapaniki ba Aloni na bana bendi. 28Eye niyo milimo ya ba livumo lya Bangeshona mu ntanda ya shikungulukilo, pe mukakutwaminina ou mulimo ukenga Itama mwana mukankombela Aloni.”
Milimo ya Balevi ba livumo lya Melali
29Nyambi ya Ngula watongwezele Moshesha ngayi, “Laba livumo lya Melali mukati ka Balevi, balabe mu mavumo amashe namu mapashi wabo, 30kami ulabe balume nimwabo bali mukati ka myaka makumi ahatu na makumi mutanu, aba ba kutwesha kutenda mulimo mu ntanda ya shikungulukilo. 31Bakekala na mulimo wakushimba maleenge na mikambo na bishimi na tupona twa ntanda, 32na bishimi na tupona na zimpimpi na nyimbwa za shipango, shazingwilisha ntanda, twa kutendesha ha kuzikabyo. Muntu na muntu ukekala na mulimo waku kulika bingwalingwali banamutoyele. 33Ou ukenga mulimo wa livumo lya Melali mu ntanda ya shikungulukilo, pe mukakutwaminina ou mulimo ukenga Itama mwana mukankombela Aloni.”
Kulabiwa kwa Balevi
34 #
Kul 3:15. Nohobene Moshesha na Aloni na bakakutwaminina makunge bakatukile kuya na kulaba Balevi mu mavumo a Kohati na Ngeshona na Melali na mavumo amashe namu mapashi, 35pe balabile balume nimwabo mukati ka myaka makumi ahatu na makumi mutanu, aba batweshele kutenda mulimo wa muntanda ya shikungulukilo. 36Pe balabile balume nimwabo ba livumo lya Kohati mukati ka myaka makumi ahatu kukuma ku ba myaka makumi mutanu, nimwabo balabiwile bengile 2,750. 37Aba nibo bantu balabiwile mu mapashi namu a Kohati aba batweshele kutenda mulimo mu Ntanda ya Shikungulukilo, aba Moshesha na Aloni balabile ngonehe Nyambi ya Ngula ambile kupitila muli Moshesha. 38Bana ba Ngeshona balabiwile mu mapashi na mu mavumo, 39Kwalabiwile balume ba myaka makumi ahatu kukuma naba myaka makumi mutanu aba batweshele kutenda mulimo wa muntanda ya shikungulukilo, 40bantu nimwabo mu mapashi na mu mavumo bengile 2,630. 41Aba nibo bantu ba mapashi na mavumo a Ngeshona aba batweshele kutenda mulimo wa muntanda ya shikungulukilo aba Moshesha na Aloni balabile ngonehe Nyambi ya Ngula abalayelele.
42Bantu nimwabo ba mapashi a bana ba Melali, balabiwile mu mapashi abo na mavumo wabo, 43kubalika bali na myaka makumi ahatu na myaka makumi mutanu, aba batweshele kutenda mulimo wa muntanda ya shikungulukilo, 44bantu nimwabo mu mapashi bengile 3,200. 45Aba nibo Moshesha na Aloni balabile ba mapashi na mavumo a Melali ngonehe Nyambi ya Ngula abalayelele.
46Balevi nimwabo balabiwile kuli ba Moshesha na Aloni naba bakakutwaminina ba Ishalela, balabiwile mu mapashi wabo na mu mavumo, 47kubalika ba myaka makumi ahatu kukuma ku ba myaka makumi mutanu, aba batweshele kutenda mulimo wa muntanda ya shikungulukilo, 48Obo balabiwile bengile 8,580.
49Ngonehe shiya Nyambi ya Ngula alayelele Moshesha, nisho abalabile, muntu na muntu kuya na mulimo wendi ou atweshele kutenda hinge waku kulika.
Currently Selected:
Kulaba 4: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.