Kulaba 34
34
Zingiza za litunga
1Nyambi ya Ngula wambile kuli Moshesha ngayi, 2“Tongweza bantu ba Ishalela ngayi, oho mukwingina mu litunga lya Kenaani, litunga elye nili na kumipana, zinginza za litunga lyenu zikenga nehe. 3Nginza yaku mabukubuku yikabalika ku Libelelengwa lya Zini na kupitakana nginza ya Endoma. Nginza yikatatikila ku mushamuko kunkumo yaku mabukubuku a Liwate lya Mushele.#34:3 Liwate lya Mushele: Hinge ngayi Liwate lya Kufwa. 4Niho yikapenzesha kulwa mabukubuku kutwala naku nzila ya Akilambimu, kami yikalulumana na kupita mu Zini, kukakuma naku mabukubuku aku Kandeshi Mbaneya. Niho yikalulumana kulwa ncelele yaku mponci kutwala ku Haza Anda kukakuma naku Azimoni, 5oku niko yikukontamina kupenza kulwa mukulo ku nginza ya Engepita na kumanina ku Liwate.
6“Nginza yaku mponci yikenga bene Liwate lya Menditaleniya.
7“Nginza yaku ncelele yikakonka luteta lwa kufuma ku Menditaleniya kukuma ku Lipili lya Hola, 8pe kubalika kuyo kukakuma ku nzila ya Hamati. Yikalulumana kuya ku Zendandi, 9Kukakuma naku Zifwiloni pe yikamanina ku Haza Enani.
10“Nginza yaku mushamuko yikakonka luteta lwa kubalika ku Haza Enani kukuma ku Shefwama. 11Niho yikapenza ku mabukubuku kufuma ku Shefwama ku Limbula, ku mushamuko wa Ayina, pe yikalulumana ku binkanda byaha shibumbo sha ku mushamuko wa Liziba lya Chineleti (Niyo Ngalileya lelo), 12niho yikapita ku mabukubuku ha Mushinzi wa Yondana kukuma naku Liwate lya Mushele.
“Eze zikenga zinginza zinaa za litunga lyenu.”
13 #
Yosh 14:1-5. Nohobene Moshesha wambile ku Baishalela ngayi, “Elye nilyo litunga liya mukatambula ha kukuna zinyela, litunga liya Nyambi ya Ngula aketwilile ku mishobo mutanu na yinaa na shitika. 14Mishobo ya Lubena na Ngandi na shitika sha mushobo wa Manashe ba ku mushamuko, banatambulu likona lyabo, lyatapiwile ngonehe mwaya lupashi lwa mavumo wabo, 15ku mbalila yaku mushamuko wa Yondana kuliyahikiza na Yeliko.”
Bakakutwaminina bekalile na mulimo wakutapishila litunga
16Nyambi ya Ngula wambile kuli Moshesha ngayi, 17“Mukankombela Eliza na Yoshuwa mwana Nune, nibo bakatapila bantu litunga. 18Pe kami ukashimbe ku mushobo na mushobo mukakutwaminina umo mu kubayavwa ha kutapa.” 19Bantu aba nibo ahatile Nyambi ya Ngula kwinga bakakutwaminina bengile Kalembu mwana Yefuna waku mushobo wa Yunda, 20na Shamwele mwana Amihundi wengile ntwamina waku mushobo wa Shimiyoni, 21na Elindandi mwana Kishiloni wengile ntwamina waku mushobo wa Mbenjamani, 22na Mbuki mwana Yongili wamulume ntwamina waku mushobo wa Ndani, 23na Haniyele mwana Efwondi, wengile ntwamina waku mushobo wa Manashe mwana Yoshefwa, 24na Kemuwele mwana Shifutani wengile ntwamina waku mushobo wa Efulemu, 25na Elizafwani mwana Panaki wengile ntwamina waku mushobo wa Zembuloni, 26na Palitiyelu mwana Azani wengile ntwamina waku mushobo wa Ishaka, 27na Ahihundi mwana Shelomi wengile ntwamina waku mushobo wa Asha, 28na Pendahela mwana Amihundi wengile ntwamina waku mushobo wa Nafwitali.
29Aba nibo bantu baya Nyambi ya Ngula apanikile kutapila likona lya bantu ba Ishalela mu litunga lya Kenaani.
Currently Selected:
Kulaba 34: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.