Kulaba 32
32
Mishobo ya bantu bali ku mushamuko wa Yondana
(Ndayano 3:12-22)
1Mishobo ya Lubena na Ngandi bekalile na matanga amanene a zingombe. Oho bamonene eshe lyafwanina litunga lya Yaza na Ngiliyande ku zingombe, 2pe bana ba Ngandi bayile kuli Moshesha na mukankombela Eliza na bakakutwaminina bamina ba likunge, niho bambile ngayi, 3“Litunga elye Nyambi ya Ngula anayavwa Baishalela kulikoma mwekala minzi ya Ataloti na Ndimboni na Yaza na Nimila na Heshimboni na Eliyale na Shibamu na Nembo na Mbeyoni, 4linengi litunga lyaliwahe ku zingombe, pe kami bakamilimo bobe bali na zingombe zazingi. 5Hekulu tukulomba ngayi ndi unawahilili nanetu pe tupanike litunga elye kwinga likona lyetu, kami hinga tuzabuka Mushinzi wa Yondana ngayi tukazikemo.”
6Moshesha wakumbwile bana ba Ngandi na bana ba Lubena ngayi, “Kati mukushinga kwikala kuno aha baminenu Baishalela bakuya ku nzita ndi? 7Haya shumangani mukushinga kukwangisha bantu ba Ishalela kuzabuka Yondana kuya mu litunga elye abapanikile Nyambi ya Ngula? 8#Kul 13:17-33.Shiya nisho batendele batatizenu oho nabatumine ku Kandeshi Mbaneya mu kuhokela litunga. 9Bayile, bakakuminine ku Mukulo wa Eshikolu, pe bamonene litunga ngoboni oho babokele bakwangishile bantu kwingina mu litunga elye abapanikile Nyambi ya Ngula. 10#Kul 14:26-35.Nyambi ya Ngula wakalihilile uya mutena pe wabezele ngayi, 11‘Nikubeza ngayi ndaba aba bantu kaliha bekalile bakulunga kukwami, pe kowa hakati kabo uli na myaka makumi abili hinge kupitakana, aba bafumine ku Engepita bakengina mu litunga liya na kulupishile kuli Abulahama na Ishaki na Yakobo. 12Eshi shakundamine ku bantu nimwabo, ndele Kalembu mwana Yefuna Kakenezi na Yoshuwa mwana Nune, ndaba bengile bakulunga kuli Nyambi ya Ngula.’ 13Nyambi ya Ngula wapilamine na bantu ba Ishalela, pe waba yambanganishile mu libelelengwa myaka makumi anaa, hantu shihemunwino nimwasho shiya shamanine kufwa, shabulile kumuwahililisha. 14Pe haya enu munashimbi mwanya wa batatizenu, shihemunwino shashipya sha bantu bababi banaliwahishi kuleta wukali wakubamba kami wa Nyambi ya Ngula ha Baishalela. 15Ndi enu kami Bakalubena na Bakangandi mu kukana kumukonka hano, pe Nyambi ya Ngula ukashiya bantu aba nimwabo mu libelelengwa, pe mukekala na shihepwa ha kuloba kwabo.”
16Bahenyenene kuli Moshesha pe bambile ngayi, “Twitabilishenu taha, tutende bipata bya mamanya bya kushinkila bambelele betu na minzi ya bipata ya lupashi lwetu. 17Niho tukalishakashaka kuya ku ngunga hamo na baminetu Baishalela na kutwaminina nzita hantu tunaba kumishi na kubazikisha mu litunga liya likenga lyabo. Mu shikati osho lupashi lwetu bakatwesha kwikala kuno mu minzi ya twimbi, ku balamwina ku bantu ba litunga lino. 18Kuboka ku minzi yetu tufwako hantu Baishalela nimwabo bamina banatambulu likona lya litunga ngonehi babenikilalyo. 19Kukatambula likona lya wuheti wa mukati kabo hambalila yamina ya mu nciza ya Yondana tufwako, ndaba tunatambulu shitapilo shetu kuno ku mushamuko wa Yondana.”
20Moshesha wakumbwile ngayi, “Ndi mwa shikuma ebye munamba nibyo, pe haya kuno ku meho a Nyambi ya Ngula lishakashakenu kuya ku ngunga. 21Balume benu nimwabo bakakupakata bilwisho bakazabuka Yondana, mukwendeshiwa kwa Nyambi ya Ngula, bakatanda bamalamo betu hantu nabapitakana, 22na kutambula likona lya litunga. Nohoboni mukatweshe kuboka ndaba munashoboloko kuli Nyambi ya Ngula nakubaminenu Baishalela. Niho Nyambi ya Ngula ukamitongweza ngayi litunga elye lya ku mushamuko wa Yondana lyengakale lyenu. 23Ngoboni ndi kulama shikulupisho shenu mufwako, monenu mukenga baka kubipishila Nyambi ya Ngula. Hinga mu pocakana ha shuma eshe, muka shushuliwa ha wubi wenu. Pe anukenu ngayi wubi wenu ukamiwana. 24Nohobene tendenu minzi na bipata bya bambelele benu, pe kami mutende ebye mwakulupishile!”
25Bantu ba ku Ngandi na Lubena bambile kuli Moshesha ngayi, “Hekulu, tukutenda ngonehe eshe ukwamba. 26Bakazetu na banabetu na bimuna byetu na zingombe zetu na bambelele betu, bikashala kuno mu minzi ya Ngiliyande. 27Ngoboni etu nimwetu bakamilimo bobe tunalishakashakili kuya ku nzita mukwendeshiwa kwa Nyambi ya Ngula. Tukazabuka Yondana na kulwa ngonehe eshe munamba hekulu.”
28 #
Yosh 1:12-15. Nohobene Moshesha wapanikile ndayano eze kuli mukankombela Eliza na kuli Yoshuwa naku bakakutwaminina bamina ba Ishalela ngayi, 29“Ndi bantu ba Ngandi na Lubena bakazabuka Yondana na kulishakashaka ha bya ngunga ngonehe ku ndayano za Nyambi ya Ngula, kami ndi hamo na kuyavwa kwabo, himukutwesha kukoma litunga, niho bapanikenu litunga lya Ngiliyande kwinga likona lyabo. 30Ngoboni ndi kuzabuka Yondana na kuya mukati ka ngunga hamo nanenu bafwako, pe bakatambula shitapilo shabo sha likona mu litunga lya Kenaani ngonehe mukutenda enu.”
31Bantu ba Ngandi na Lubena bakumbwile ngayi, “Hekulu, tukatenda ngonehe anamba Nyambi ya Ngula. 32Tukazabukila mu nciza ya litunga lya Kenaani na kuya ku ngunga mukwendesha kwendi ngayi tukatweshe kutambula likona lyetu kuno ku mushamuko wa Yondana.”
33Nohobene Moshesha waketwililile ku mishobo ya Ngandi na Lubena na shitika sha mushobo wa Manashe mwana Yoshefwa litunga nimwalyo lya Mwene Shihoni wa Baamoli na Mwene Ongi waku Mbashani, kuyakako na minzi na litunga lina bazinguluku. 34Bazukulya Ngandi banatendululu minzi ya bipata yaku Ndimboni na Ataloti na Aloya, 35na Atiloti Shofwani na Yaza na Yongimbeha, 36na Mbeti Nimila na Mbeti Halani minzi yamu bipata batendele milaka ya bambelele babo. 37Bazukulya Lubena nibo batendulwile Heshimboni na Eliyale na Kiliyatayimu, 38na Nembo na Mbaalu Meyoni (awa mazina bawafutwile) na Shimbima. Batumbile awa mazina amapya ku minzi batendulwile.
39Livumo lya Makiya mwana Manashe lyakatukilile litunga lya Ngiliyande na kulitambula, pe batandilemo Baamoli aba bekalilemo. 40Nohobene Moshesha wapanikile Ngiliyande ku livumo lya Makiya, bazukulya Manashe pe nibo bazikilemo. 41Yayila, wa mushobo wa Manashe, walwile na kukwata minzi yimo pe wayitumbile ngayi, “Minzi ya Yayila.” 42Nombahi walwile pe wapukwile Kenati na minzi yawo, pe wawutumbile kami Nombahi nehe niyemwine.
Currently Selected:
Kulaba 32: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.