Kulaba 31
31
Nzita ya kulwisha Mindiyani
1Nyambi ya Ngula wambile kuli Moshesha ngayi, 2“Shushula Bamindiyani hanebye batendele ku bantu ba Ishalela. Oho wamanishakale kubashushula, nohoboni ukafwe.”
3Nohobene Moshesha wambile ku bantu ba Ishalela ngayi, “Lishakashakenu bya nzita, ngayi mukalwishe Mindiyani na kubashushula hanebye banatende kuli Nyambi ya Ngula. 4Ku mushobo na mushobo nimwawo wa Ishalela tuma balume likulukazi limo ku nzita.”
5Nohobene balume 1,000 bahatiwile ku mushobo na mushobo, bantu nimwabo bengile 12,000 balishakashakilile bya nzita. 6Moshesha wabatumine ku nzita mukwendeshiwa kwa Fwinihashi mwana mukankombela Eliza, ou washimbile wukulwane wa byuma bya shizila na zimpandula za kupanikanga bilimukisho. 7Balwishile Mindiyani ngonehe ambile Nyambi ya Ngula, kuli Moshesha pe bazihile balume nimwabo. 8Bazihilile kumo na bamyene mutanu ba Mindiyani, ba Evi na Lekema na Zuli na Hula na Leba. Bazihile kami na Mbalaamu mwana Mbeyola.
9Bantu ba Ishalela bakwatile bantapwa babakazi na batwanuke ba Bamindiyani, bashimbile zingombe zabo na matanga a bambelele. Bapukwile wuheti wabo nimwawo, 10pe bahokeshele minzi yabo nimwayo na minkungwa yabo nimwayo. 11Bashimbile lipuku nimwalyo liya bapukwile, lya bantapwa na bimuna, 12babiletele kuli Moshesha na mukankombela Eliza naku likunge nimwalyo lya bantu ba Ishalela, aba bekalile ku munkungwa ha zimbuwa za Mowambi mu nciza ya Yondana kuliyahikiza na Yeliko.
Bakanzita ba kuboka
13Moshesha na mukankombela Eliza na bakakutwaminina nimwabo ba likunge bafumine ku munkungwa mu ku shimbawila bakanzita. 14Moshesha wakalihilile babilolo na bakulwane ba mihoko ya banzita na matanga anaba bafumine ku nzita. 15Wabepwile ngayi, “Kati shumangani eshe munatentekele aba bambuyama ngayi bayoye? 16#Kul 25:1-9.Anukenu ngayi mbuyama nibo bakonkelenga kufundiziza kwa Mbalaamu pe batwamininine bantu ba Ishalela kwinga ba kulungwa kuli Nyambi ya Ngula ku Peyola. Biyo nibyo byaletele wulweli wakubula kutwesha kupangiwa. 17Nohobene haya zihenu batwanuke nimwabo babalume, kami zihenu bambuyama nimwabo balala na balume. 18Ngoboni yoyeshenu na kulikowezela bashimbi na bambuyama nimwabo batunkanga. 19Haya nimwenu enu munazihi muntu hinge munakwata ha mutuntu wa muntu mu ku fwanina kwikala ha munkanda wa munkungwa ku matena mutanu na abili. Ha mutena wawuhatu na mutena wa mutanu na abili liyeleshenu nimwenu na bambuyama aba munapukulu. 20Mu ku fwanina kami kuyelesha kantabwila ka likwiza na byuma nimwabyo byatendiwa na shitembe sha kunyuka na bya wushako wa mpongo, hinge bya shitondo.”
21Mukankombela Eliza wambile ku balume aba bafumine ku nzita ngayi, “Eze nizo ndayano ziya Nyambi ya Ngula anapaniki kuli Moshesha. 22Byuma nimwabyo biya bya kubula kuhoka, bya kwinga ngonehe, ngolinde na shiliva na lubemba, shondo na shiwalawala, hinge shondo sha loto, 23bikwinga bya kuyeleshiwa na kubipitisha ha mundilo. Byuma nimwabyo byamina bikayeleshiwa na mema akuyelulwisha. 24Ha mutena wa mutanu na abili mu ku fwanina kuyowesha bivwalo byenu, niho mukenge ba kuyela pe niho muketabilishiwe kwingina mu munkungwa.”
Bitapilo bya lipuku
25Nyambi ya Ngula wambile kuli Moshesha ngayi, 26“Obe na mukankombela Eliza, hamo na bakakutwaminina bamina ba ku likunge balabe byuma nimwabyo biya bya pukuliwa, ku yakaho na bantapwa na bimuna. 27Tapa ebye byakashimbiwa mulwapanda lwa kwezekela hamo, shimo ku banzita pe shimina ku bantu nimwabo. 28Ku shitapilo shiya shikwinga sha bakanzita, tolenuho umo ku bantapwa ba myanda mutanu kwinga mutelo wakuli Nyambi ya Ngula, tolenuho kami naku zingombe na bambongolo naku bambelele naku bampongo. 29Bipanenu kuli mukankombela Eliza kwinga shitapilo sha mukungwila kuli Nyambi ya Ngula. 30Ku shitapilo shinapanikiwi ku wingi wa bantu ba Ishalela, shimbaho umo ha bantapwa makumi mutanu, pe tolenu noho kami na shitapilo shimo sha zingombe na sha bambongolo na bambelele na bampongo. Bipanikenu kuli Balevi aba bali na kulama ntanda ya shikungulukilo.” 31Moshesha na mukankombela Eliza batendele ebye Nyambi ya Ngula abatongwezele.
32Owe niwo muhoko wa byuma biya byashalileko kubiya bapukwile na bakanzita, mu kufungila kunebye balikowezelele nibo bamwine bengile 675,000 bambelele na bampongo, 33kami zingombe zengile 72,000, 34bambongolo bengile 61,000. 35Batunkanga bengile 32,000 aba babula kulangana na mulume. 36Shitapilo sha bakanzita shengile 337,500 bambelele naba mpongo, 37kami mutelo wakuli Nyambi ya Ngula wengile 675 bambelele na bampongo, 38shitapilo sha bakanzita shengile 36,000 zingombe, kami mutelo wakuli Nyambi ya Ngula wengile zingombe 72. 39Shitapilo sha bakanzita sha bambongolo bengile 30, 500 kami mutelo wakuli Nyambi ya Ngula shengile bambishi 61 40na batunkanga baya babulile kulala na balume bengile 16,000, kami mutelo wakuli Nyambi ya Ngula bengile batunkanga 32. 41Nohobene Moshesha wa panikile mukankombela Eliza owe mutelo kwinga mukungwila wawunene kuli Nyambi ya Ngula, ngonehe amutongwezele.
42Shitapilo sha bantu ba Ishalela shengile ngo kami nehi shiya sha bakanzita. 43Shitapilo sha likunge shengile bakanzita, 337,500, bambelele na bampongo, 44pe shitapilo sha zingombe shengile 36,000, 45na bambongolo bengile 30,500, 46na batunkanga bengile 16,000. 47Kufuma ku shitapilo eshe Moshesha washimbile umo ku bantapwa ba makumi mutanu na bimuna kami, ngonehe amutongwezele Nyambi ya Ngula ngayi ukabipanike ku Balevi, aba bekala na kulama ku Ntanda ya Shikungulukilo.
48Niho babilolo aba bendeshelenga bakanzita bayile kuli Moshesha, 49pe bashimikile ngayi, “Hekulu, tunalaba bakanzita bali mu maboko wetu pe kowa umo kukwabo unabuluho. 50Nohobene tuli na kuleta ntupu ya bya kuyenga bya ngolinde na makaya aha mikoko na makaya aku maboko na tumbalaminwe na tunkunda twa ku matu na mikali yiya twashimba nimwetu. Tukupanika kuli Nyambi ya Ngula kwinga bya kuyumba ha wumi wetu.” 51Moshesha na mukankombela Eliza batambwile ngolinde, wingi wabyo byengile bya kuliyenga. 52Mukungwila nimwawo wa babilolo wengile makilongilamu 200. 53Obo babulile kwinga babilolo balamine bya lipuku ebye bashimbile. 54Nohobene Moshesha na mukankombela Eliza batwalile ngolinde ku Ntanda ya Shikungulukilo, nohobene mwanga alame bantu ba Ishalela.
Libuka Lya Kuyela © Bible Society of Zambia, 2020.