Kulaba 28
28
Ntupu ya ha Mutena ha Mutena
(Kututika 29:38-46)
1Nyambi ya Ngula watongwezele Moshesha ngayi, 2“Ambila Baishalela, pe ubatongweze ngayi, ‘Bakombelele zintupu zami za byakulya byami bya kutupula ha mundilo. Livumba lya ku zintupu eze likungwahililisha shikuma, kakeyenu ngayi mukazitupule kukwami ha bikati byabyo.”
3“Pe zinkombela eze za byakulya ziya zikakombeleliwa kuli Nyambi ya Ngula, ya kukombelela na mundilo yaha mutena ha mutena, zikenga bana babikungwe ba bambelele babili ba mwaka umo bakubula nyanco, kwinga nkombela yaha mutena ha mutena ya kubula kukatala. 4Kakombelele mbelele wakutatika ku lumenemene na wawubili ku mazolo, 5ku umo na umo kombelela hamo na ntupu ya mpeka ya muhunga wa kilo imo wakuvuba na lita imo ya mazi a olive akuyengula. 6Eye niyo nkombela yakuhokesha yiya yaha mutena ha mutena, ya kubula kukatala yiya yatatikile kukombeleliwa ku Lipili lya Shinayi, kwinga nkombela ya byakulya ya kukombelela na mundilo kuli Nyambi ya Ngula. Livumba lya nkombela eye yikungwahililisha. 7Nehe boni nkombela ya waine hamo na mbelele wakutatika, yitila lita imo ya waine. 8Ku mazolo kombelela mbelele wawubili mu nzila yimo nehe nkombela ya lumenemene hamo na ntupu ya waine. Niyo kami yinengi ntupu ya byakulya. Livumba lya neye nkombela likuwahililisha Nyambi ya Ngula.”
Nkombela ya Mutena Wakukatala
9Ha Mutena Wakukatala kombelela bambelele babili ba mwaka umo bakubula nyanco, hamo na makilongilamu abili a muhunga wakuvuba na mazi a olive kwinga ntupu ya mpeka na nkombela ya waine. 10Eye nkombela yakuhokesha yikwinga yakukombeleliwa ha matena aku katala, mu kufungila na nkombela yaha mutena ha mutena, hamo na nkombela yayo ya waine.
Nkombela yaha Mutena Wakutatika wa Ngonda
11Leta nkombela ya kuhokesha kuli Nyambi ya Ngula ha kutatika kwa ngonda na ngonda. Nkombela eye yikwinga bana ba bankunzi babili na shikungwe umo wambelele na babikungwe ba bambelele mutanu na babili ba mwaka umo, nimwabo bakubula nyanco. 12Nkombela ya mpeka, nkombela ya muhunga wakuvuba na mazi a olive kwinga ntupu ya mpeka. Ha nkunzi na nkunzi, kombelela muhunga wa makilongilamu ahatu a muhunga, kami hamo na shikungwe wambelele, kombelela muhunga wa makilo abili. 13Hamo mwanambelele na mwanambelele, tupula muhunga wa kilo imo. Eze zinkombela za kuhokesha zinengi zinkombela za byakulya zalivumba lya kuwahililisha Nyambi ya Ngula. 14Nkombela ya kufwaninina ya malita abili a waine hamo na nkunzi na nkunzi na lita imo na shitika, hamo na shikungwe wa mbelele na lita imo ha mbelele na mbelele. Eze zinengi ndayano za nkombela yakuhokesha za mutena wakutatika wa ngonda na ngonda mukati ka mwaka. 15Kami kufungilako ku nkombela yakuhokesha hamo na nkombela yayo ya waine, yaha mutena ha mutena kombelela shikungwe wa mpongo umo kwinga ntupu ya ha wubi.
Zinkombela za ku Shimbo sha Mankende A kubula Mumena
(Balevi 23:5-14)
16 #
Kut 12:1-13; Nday 16:1-2. Shimbo sha kupitilila sha kulemeeka Nyambi ya Ngula shikatendiwenga ha mutena wa likumi na kanaa wa ngonda wakutatika. 17#Kut 12:14-20; 23:15; 34:18; Nday 16:3-8. Ha mutena wawulikumi na mutanu mukapinga shimbo sha matena mutanu na abili. Pe mukalya tuhu mankende akuvuba a kubula mumena. 18Ha mutena wakutatika wa shimbo eshe mukekala na shikungulukilo sha kuliyelesha kami kowa mulimo ukatendiwa. 19Mukakombelela nkombela ya kuhokesha na mundilo kwinga nkombela ya byakulya kuli Nyambi ya Ngula. Nkombela eye yikwinga bana ba bankunzi babili na shikungwe umo wa mbelele na bana babikungwe ba bambelele mutanu na babili ba mwaka umo, benge bakubula nyanco. 20Mukatupula zinkombela za mpeka hamo na zintupu eze nimwazo, muhunga wa ngongo wakuvuba hamo na mazi a olive. Tupulenu muhunga wa makilongilamu ahatu hamo nkunzi na nkunzi na muhunga wa makilongilamu abili hamo na shikungwe wa mbelele, 21Mukakombelela nkombela wa kilo imo ha mbelele na mbelele. 22Mukakombelela kami shikungwe wa mpongo umo kwinga ntupu ya ha wubi, pe mu nzila eye tendenu shimbo sha kwambwililisha bantu ku wubi wabo. 23Mukakombelela ebye mu kufungila ku nkombela yakuhokesha ya kubula kukatala yaha lumenemene na lumenemene. 24Mu nzila yimo, ku matena mutanu na abili mukakombelela kuli Nyambi ya Ngula nkombela ya byakulya yakuhokesha na mundilo. Livumba lyaliwahe lya nkombela eye likawahililisha Nyambi ya Ngula. Mukakombelela eye mu kufungila ku nkombela ya kuhokesha yaha mutena ha mutena na nkombela yayo ya waine. 25Pe ha mutena wa mutanu na abili mukekala na shikungulukilo sha kuyela sha kuliyelesha, kami kowa mulimo mu ku fwanina kutenda.
Zinkombela zaha Shimbo sha Kuteza
(Balevi 23:15-22)
26 #
Kut 23:16; 34:22; Nday 16:9-12. Ha mutena wakutatika wa Shimbo sha kutatika kuteza, oho mukaleta ntupu ya byakulya byabipya kuli Nyambi ya Ngula, mukakunguluka mu kulemesha kami kowa mulimo mu ku fwanina kutenda. 27Kombelelenu nkombela yakuhokesha ya livumba lya kuwahililisha Nyambi ya Ngula. Nkombela eyi yikwinga bana ba bankunzi babili na shikungwe umo wa mbelele na babikungwe ba bambelele mutanu na babili ba mwaka umo, nimwabo bakubula nyanco. 28Tupulenu ntupu yayiwahe ya mpeka, ya muhunga wakuvuba na mazi a olive. Tupulenu muhunga wa makilongilamu ahatu hamo na nkunzi na muhunga wa makilongilamu abili hamo na shikungwe wa mbelele, 29kami muhunga wa kilo yimo ha mbelele na mbelele. 30Kami kombelelenu shikungwe sha mpongo umo kwinga ntupu ya ha wubi, pe mu nzila eye tendenu shiheka sha kwambwililisha bantu. 31Kombelelenu ebye na nkombela ya waine mu kufungila ku ntupu ya mpeka yaha mutena ha mutena.
Currently Selected:
Kulaba 28: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.