Kulaba 26
26
Kulabiwa kwa kabili
1Oho wulweli wakubula kutwesha kupangiwa wapitakale, Nyambi ya Ngula wambile kuli Moshesha na Eliza mwana mukankombela Aloni ngayi, 2“Labulula ba lupashi ba likunge nimwalyo lya Ishalela, nimwabo obo bali na myaka makumi abili hinge ba kukula kupitakana, aba banakumu ha kulwa nzita.” 3Moshesha na mukankombela Eliza bombatalile na kwihana bantu nimwabo aba bengile ba myaka yiya ya kukula. Wambile kukwabo mu zimbuwa ku Yondana kufuma mu Yeliko. 4Bakungulukilile mu zimbuwa za ku Mowambi mu nciza ya mushinzi wa Yondana kuliyahikiza na Yeliko. Aba nibo Baishalela baya bafumine ku Engepita. 5Bazukulya lya Lubena, mwana Ishalela wa mweli, niwo engile mavumo a Hanoki na Palu, 6na Heziloni na Kalimi. 7Mavumo a Lubena awa alabiwile engile bantu 43,730. 8Bazukulya Palu bengile Eliyambi, 9na bana ba Eliyambi ba Nemuwele na Ndatani na Ambilamu. (Aba ba Ndatani na Ambilamu bahatiwile ku likunge. Bafutulukilile Moshesha na Aloni pe balihongele na bakakukonka Kola, oho bafutulukilile Nyambi ya Ngula. 10Limvu lya shinkulukile na ku bamina, pe bafwile hamo na Kola na bakakumukonka, oho mundilo walobeshele bantu 250, pe bafutukile kwinga ba kushuzisha bantu. 11Ngoboni bana ba Kola kaliha bazihiwile.)
12Bazukulya Shimiyoni wekalile na mavumo a Nemuwele na Yamini, Yakini 13na Zela na Shaulu. 14Awa mavumo alabiwile engile bantu 22,200.
15Baku mushobo wa Ngandi wekalile na mavumo aba Zefwoni na Hangi na Shuni, 16na Baozini na Eli, 17na Alondi na Aleli. 18Mavumo awa a Ngandi alabiwile engile bantu 40,500.
19Bana ba Yunda bengile Ela na Onani, pe Onani wakafwilile ku litunga lya Kenaani. 20Bazukulya Yunda wekalile na mavumo aba Shila na Pelizi na zela, 21Bazukulya Pelizi bengile Heziloni, wakulivumo lya Heziloni, kwafumina ba Hamula. 22Mavumo awa a Yunda alabiwile engile bantu 76,500.
23Bazukulya Ishaka wekalile na mavumo a Tola na Puwa, 24na Yashuba na Shimiloni. 25Mavumo awa alabiwile engile bantu 64,300.
26Bazukulya Zembuloni wekalile na mavumo a Shelendi na Eloni na Yalelu. 27Mavumo awa a Bazembuloni alabiwile engile bantu 60,500.
28Bazukulya Yoshefwa, kuya na mavumo wabo wabelekele bana babili, Manashe na Efulemu.
29Bazukulya Manashe bengile aba, Makiya mwanendi, ou wengile tata Ngiliyande. Pe mavumo atutikile ku bankakazabo kuli Ngiliyande, 30engile mavumo aba Iyeza na Heleki, 31na Ashiliyele na Shekemu, 32na Sheminda na Hefwa. 33Zelofwehandi mwana Hefwa, kaliha wekalile na bana babalume, ndele tuhu babambuyama. Mazina wabo bengile ba Mahila na Nowa na Hongila na Milika na Tiliza. 34Mavumo a Manashe awa alabiwile engile bantu 52,700.
35Bazukulya Efulemu wekalile na mavumo aba Shutela na Mbeka na Tahani. 36Mavumo a Elani bengile bazukulu batutika kuli Shutela. 37Mavumo a Efulemu awa alabiwile engile bantu 32,500. Bengile bazukulya Yoshefwa.
38Bazukulya Mbenjamani wekalile na mavumo a Bambela na Ashembela na Ahilama, 39na Shefufwama na Hufwama. 40Mavumo a Andi na Naamani bengile bazukulu batutika kuli Mbela. 41Mavumo awa a Mbenjamani alabiwile engile bantu 45,600.
42Bazukulya lya Ndani wekalile na livumo lya Shuhami, 43aba balabiwile bengile bantu 64,400 44Bazukulya Asha wekalile na mavumo a Imina na Ishivi na Mbeliya. 45Mavumo aba Hemba na Malikela bengile bazukulu ba Mbeliya. 46Asha wekalile na mwana wa mbuyama lizina lyendi Shela. 47Mavumo a Asha awa alabiwile engile bantu 53,400.
48Bazukulya lya Nafwitali wekalile na mavumo aba Yazilu na Nguni, 49na Yeza na Shilema. 50Mavumo a Nafwitali awa alabiwile engile bantu 45,400.
51Bantu ba Ishalela nimwabo balabiwile bengile 601,730.
52Nyambi ya Ngula wambile kuli Moshesha ngayi, 53“Tapishila litunga mukati ka mishobo kwinga likona ngonehe ku wingi wabo. 54Ku mushobo uya uli na bantu babengi, ukabapanike litunga lyalinene kwinga likona lyabo na ku bantu babashe ukabapana litunga lyalishe kwinga likona lyabo. Mushobo na mushobo ukapanikiwa litunga kwezekela na bantu aba balimo. 55Ngoboni litunga mukalipana ha kukuna nyela, kwezekesha na mazina a bankakazabo kuya kuwingi wabo. 56Pe likona lyabo ukalitapa ha kutenda nyela, mukati ka bantu babengi naba babashe.”
57 #
Kul 1:47-49. Bazukulya Levi wekalile na mavumo aba Ngeshona na Kohati na Melali. 58Bazukulyabo kuyakako na mavumo amashe aba Limbini na Hembuloni na Mahili na Mushi na Kola. Kohati wengile tata Amalama. 59Lizina lya mukaza Amalama lyengile Yokibendi ou wahemuwilile mu Engepita. Wabelekelele Amalama bana babili babalume, Aloni na Moshesha na wa mbuyama Miliyamu. 60Aloni wekalile na bana banaa babalume, ba Nandabi na Ambihu na Eliza na Itama. 61Nandabi na Ambihu bafwile oho bakombelelele mundilo wakubula ku fwanina kuli Nyambi ya Ngula. 62Balevi balabiwile bengile 23,000, bengile ba ngonda yimo kutwala ku ba kukula. Kaliha balabiwile hamo na Baishalela bamina nimwabo, ndaba kaliha bapanikiwile likona limo mu Ishalela.
63Awa mavumo nimwawo alabiwile kuli Moshesha na mukankombela Eliza oho balabilenga Baishalela mu zimbuwa za Mowambi mu nciza ya Mushinzi wa Yondana kuliyahikiza na Yeliko. 64Kuyo kaliha kwekalile muntu hinge umo washalileho ou wabulile kulabiwa mukati kabo obo balabile ba Moshesha na mukankombela Aloni ha kutatika mukati ka Libelelengwa lya Shinayi. 65#Kul 14:26-35. Ngonehe ambile Nyambi ya Ngula ngayi nimwabo bakafwile mu libelelengwa, pe nimwabo bafwilililemo ndele tuhu Kalembu mwana Yefuna wamulume na Yoshuwa mwana Nune.
Currently Selected:
Kulaba 26: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.