Mika 7
7
Nyinkalo yayibi ya Baishalela
1Makando wami tawee, nafwekakale ngo mikabo iya ba kungulanga shikati sha mayinza. Nafweke ngo a mahozozo a mikabo ya shinyanca yinapulumuku. Ngoboni kowa mikabo yinatatiki kuhoka ku mitondo ya mikuyu, hinge ku mikolobozi ya shinyanca eyi nikutwesha kulya. 2Bantu bakwoloka nimwabo balobakale hano hanci, pe hikowa bakwoloka. Nimwabo bengakale bakakubelamina kuyita mukeza, bali na kulimanyika tunyanzi umo na wamina na tuntamba. 3Maboko wabo akulalabila kutenda byabibi. Babilolo na bakakuyata, bakushinga lizika kanwa. Bakulwane ba mpupo, bakwamba byabibi bili mu mitima yabo, nimwabo banaliwaniki hamo. 4Hinge aba ba ku moneka ngayi bakwoloka, bakufweka ngo mutondo wa mikona. Hinge kami bakwoloka banalyezeke kutwepa kwa muhongela wa mukona.
Mutena ou mwahanganikile ngayi mukashushuliwa, wakumakale. Haya mukekala mulumpa. 5Hinga mu kulupila bandambo benu aba mwazika nabo, hinga mukinka mutima muli bahoni benu. Lamenu nyambilo yenu, hinge ku mukazenu wamu litala. 6#Mat 10:35-36; Luka 12:53.Ha shikati eshe, mwana wa mulume kukapana maleema tatiyendi ufwako, mwana wa mbuyama, ukafutukila mandiyendi, mbuyama na mukowendi wa mbuyama, bakalifutukila na kulilwisha. Bamalamo ba muntu, bakenga ba lupashi lwendi.
7Ngoboni ami, nikazamwina meho kuli Nyambi ya Ngula, nikapenzelela kuli Nyambi mukakumpulwisha, Nyambi yami ukanyuvwa.
Nyambi ya Ngula niye Mukakupulwisha
8Enu bamalamo bami, hinga munkendula, hinge ngayi ninawu, nikapinduka. Hinge ngayi nili mu mincimpwe, Nyambi ya Ngula niye lumuni lwami. 9Nabipishi kuli Nyambi ya Ngula, nikatambula kashushwilo kendi, kutwala nanoho akanyuvwila nceshe na kunyatila, pe ukambweshela lumuni lwendi, kami nikamona kupulwisha kwendi. 10Oho bamalamo bami bakamona eshe, bakekala na lisheni aba bambilenga ngayi, “Kati Nyambi ya Ngula ou Nyambi yobe uli kuti?” Nikabamona hibawa na kulyatangiliwa hanci ngo lukungu lwa mu zinzila.
11Enu bantu ba mu Yelushalema, mutena wakutendulula twimbi twa lukena lwobe ukeza. Pe ukanenehesha zinginza zobe. 12Ha mutena uyo, bantu bobe bakafuma ku zimbalila nimwazo, ku Ashiliya naku Engepita na kuzimbalila za Yufuleti, bakafuma ku liwate, kukakuma kami ku liwate na kufuma ku lipili kukakuma kami naku lipili. 13Hanci hakafutuka kwinga libelelengwa, ndaba ya wubi wa naba bazikaho.
Nyambi ya Ngula uku haka Ishalela mwaya myaka
14Obe Nyambi ya Ngula, twaminina bantu bobe na muwana wobe ngonehe mulishani, bantu aba wahatile kwinga likona lyobe. Hinge ndi bekala ninkayabo mu lishaka, kwekala mabuyishilo a wilo. Balehe balyenga mu Mbashani namu Ngiliyande, ngonehe batendelenga mwaka. 15Tumoneshe bikomokesho, ngonehe ha shikati shiyo watufumishile mu Engepita. 16Matunga bakamonako, bakayuvwa lisheni, ndaba bakuliyemeza na ngovu zabo. Bakakwata maboko wabo ha tunwa twabo, pe matu wabo kukayuvwa afwako.
17Bakakubila lukungu ngonehe liyoka, hinge ngonehe bibumbwabumbwa bikakulikoka hanci. Bakalumputuka mu bipata na kukanka pe bakatinina kuli Nyambi ya Ngula ou Nyambi yetu.
18Obe Nyambi ya Ngula, kowa nyambi walifweka nobe. Mukakuyatila wubi na ku shambisha kuluwa kwa bantu bobe. Obe kaliha wapilamanga mwaya myaka, ngoboni wamoneshanga shishemo sha mwaya myaka. 19Haya kami, ukatuyuvwila nceshe, pe ukalyatangila wubi wetu ku nceto ya mawulu na kuyumbila wubi wetu nimwawo mu mampunga a liwate. 20Ukatenda kwoloka kuli Abulahama naku monesha shishemo shobe sha mwaya myaka kuli Yakobo, ngonehe wakulupishile kuli batatizetu ku mwaka.
Currently Selected:
Mika 7: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
