Mika 3
3
Mika ukwambila bantwamina ba baishalela
1Niho nambile ngayi, “Yuvwililenu, enu bantwamina ba Ishalela, kati kaliha munafwanina kuyata byambo na kubiketula mu kupwisha ndi?” 2Enu mwazimba byabiwahe na ku haka byabibi, mwayubanga shikonde sha bantu bami na ku sheka nyama ku bifupa byabo. 3Mwalyanga bantu bami, mwayubanga bikonde byabo na kucancola bifupa byabo na kubaketozola bituntula ngo bakuya mu kuyiteleka mu nyungu. 4Mukabilikiza kuli Nyambi ya Ngula, ngoboni kukamikumbula wufwako, ha shikati shiyo ukaholeka lupala lwendi kukwenu, ndaba munabipishi.
5Nyambi ya Ngula ukwamba ngayi, “Neheboni bya bamiluwe aba ba kushanwisha bantu bami, oho muntu umo nabayumbulu pe hiba kumulubulwila ngayi kuli ku mwena, ngoboni ndi ku bayumbula wufwako, pe ba kumulobela nzita.”
6Nyambi ya Ngula ukwamba ngayi, “Nohobene enu bamiluwe shikati sha wushiku mufwako kukekala na bimono na mincimpwe yikamizilila ya kumi kwangisha kulubulula. Mutena ukalelela ha bamiluwe, pe mutena ukashipila hahabo.”
7Bakabimono na bambuki bakashampuliwa kami bakayeneshiwa, nimwabo bakafwika zimpala zabo, ndaba Nyambi ku ba kumbula wufwako.
8Ngoboni ami Mika, nenzala na ngovu na Moyo wa Nyambi ya Ngula, pe kami nenzala na kuyata shiwahe na kukanca, kwa kutongweza bazukulya Yakobo kuluwa kwabo na bazukulya Ishalela wubi wabo. 9Yuvwililenu enu bantwamina ba Ishalela, enu mu kukana kupwisha. Mukutengamisha kuyata nimwako kwakuwahe. 10Mu kuzika lukena lwa Ziyoni niyebene Yelushalema mu nzila yayibi ya kuyita mukeza. 11Batulela bekalamo ba kuyata na kutambula mazika kanwa. Bakankombela bekalamo ba kulandiwa na mali ngayi balongeshe bantu ebye bikubawahilisha. Bamiluwe bekalamo ba kulandiwa na mali ngayi balubulwile bantu ebye bikubawahilisha. Hinge niho bakukulupila kuli Nyambi ya Ngula bakwamba ngayi, “Kowa malwa akatwalilila ndaba Nyambi ya Ngula uli mukatiketu?”
12 #
Yel 26:18. Nohobene ndaba yanenu, Ziyoni ukalimiwa ngo mfuba, Yelushalema ukafutuka mushiinzi wa mamanya, na lipili lya zikiwa Litala lya Nyambi likafutuka lipumbu lya kuzika.
Currently Selected:
Mika 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
