Balevi 8
8
Kwimikiwa kwa bakankombela
(Kututika 29:1-37)
1Nyambi ya Ngula wambile kuli Moshesha ngayi, 2“Twala Aloni na bana bendi ku menginino a Ntanda ya Shikungulukilo pe ulete bivwalo bya mukankombela na mazi akuwaba na nkunzi wamushe wa ntupu ya ha wubi na bikungwe babili ba bambelele na ntumba ya mankende a kubula mumena. 3Niho wihaneko likunge nimwalyo ku menginino a Ntanda ya Shikungulukilo.”
4Pe Moshesha watendele nehe amutongwezele Nyambi ya Ngula, oho likunge lya bantu lya kungulukile ku Ntanda, 5wambile kukwabo ngayi, “Eshe nikushinga kutenda haya shinengi eshe anamba Nyambi ya Ngula.”
6Pe Moshesha waletele Aloni na bana bendi kwiza mu kubayowesha na mema. 7Wavwalikile Aloni shikobelo na lyambangubo na kaponda mulukanda lwendi. Niho amuvwalikile kakobelo ka shizila, pe wakamangile na mukunzi wawuwahe waku shinta. 8Niho amuvwalikile kambandingwa kaha kapumpo na kuyakamo Ulimi na Tumimi.#8:8 Ulimi na tumimi: Bingwalingwali bibili bya bakankombela ha kushingishisha shifungo sha Nyambi ya Ngula. Nibyo kaliha byalimukiwa shiwahe eshe baliyavwishilengabyo. 9Pe wayakile kahoshi ka likwiza lya kuzenga ku mutwe wendi, kumbili wayakileko lipapi lya kance lya ngolinde, lya ku monesha ngayi Aloni unafungiliwili kuli Nyambi ya Ngula, ngonehe Nyambi ya Ngula atongwezele Moshesha. 10Niho Moshesha ashimbile mazi akuwaba, wawabishile ha Ntanda ya Shikungulukilo na byuma nimwabyo biya byekalilemo, pe mu ntendelo eye wafungwilile nibyo kuli Nyambi ya Ngula. 11Washimbileho mazi amo pe wawamyanzilile ha kaala bikati mutanu na bibili na byuma bya ku kaala nimwabyo, hamo na lizawo na kapona kalyo, ngayi mwanga bifunguliwile kuli Nyambi ya Ngula. 12Niho afungwilile Aloni ha kumuyitila mazi akuwaba ha mutwe wendi. 13Niho kami Moshesha aletele bana ba Aloni kumbili na kubavwalika bikobelo nakubamanga tuponda mu zinkanda zabo na kubazenga tuhoshi ku mitwe yabo, ngonehe eshe amutongwezele Nyambi ya Ngula.
14Niho Moshesha aletele nkunzi wa ntupu ya ha wubi, pe Aloni na bana bendi bakambikile maboko wabo ha mutwe wa uya nkunzi. 15Moshesha wamuzihile na kushimbako mukeza umo na munwe wendi, wawulambile ku ncengo za kaala, ngayi mwanga abayeleshe. Niho ayitilile mukeza ou washalileho ku nceto ya kaala. Mu ntendelo eye wakafungwile na kukakuliza. 16Moshesha washimbile mazi nimwawo akufwika bya mukati na mahaha bya mazi aku litima na mashiye abili hamo na mazi wawo na kubihokeshela ha kaala. 17Washimbile ebye byashalile ku nkunzi na shitembe shendi na mila na wutoko na kubihokeshela ha munkanda wa munkungwa, ngonehe eshe amutongwezele Nyambi ya Ngula.
18Niho kami Moshesha aletele shikungwe wa mbelele wa nkombela ya kuhokesha, pe Aloni na bana bendi bakambikile maboko wabo ha mutwe wa shikungwe. 19Moshesha wamuzihile pe wayitilile mukeza ha zimbalila nimwazo zinaa za kaala. 20Oho amanishile kuketozola shikungwe wa mbelele bituntula, Moshesha wahokeshele mutwe na bituntula na mazi. 21Pe oho bya mukati na bilama byayoweshiwile na mema, Moshesha wahokeshele shikungwe wa mbelele wa nzimba ha kaala, kwinga nkombela ya kuhokesha ya byakulya kuli Nyambi ya Ngula. Pe livumba lya nkombela eye likuwahilisha ku mutima, nkombela ya kukombelela na mundilo kuli Nyambi ya Ngula, ngonehe amutongwezele Nyambi ya Ngula.
22Niho Moshesha aletele shikungwe wa mbelele wakufungwila, ou wengile shikungwe watendishiwile ha kubawabisha, kami Aloni na bana bendi bakambikile maboko wabo ha mutwe wa shikungwe. 23Moshesha wamuzihile pe washimbileho mukeza umo na kuwulamba kunkumo ya litu lya Aloni lya shilyo naha munwe wa shala waku liboko lyendi lya shilyo naha linyenca lyendi lyalinene lya ku liwulu lyendi lya shilyo. 24Niho aletele bana ba Aloni kumbili, pe wayakile mukeza umo ku zinkumo za matu wabo a shilyo naha minwe yabo na byaala bya ku maboko wabo a shilyo naha manyenca aku mawulu wabo a shilyo. Niho Moshesha ayitilile wingi wa mukeza ha zimbalila za kaala nimwazo zinaa. 25Washimbile mazi a shikungwe wa mbelele na mushila na mazi wawo na mazi nimwawo akufwika bya mukati na bihaha bya mazi aku litima na mashiye abili na mazi wawo na shilama sha shilyo. 26Niho ashimbile mupumpa umo wa mankende amu ntanda a kubula mumena afunguliwile kuli Nyambi ya Ngula na mupumpa umo wa kuvuba na mazi na linkende limo lyalihehu, pe wabiyakile hayilu ya mazi na shilama sha ku shilyo. 27Wayakile ebye byakulya nimwabyo mu maboko a Aloni na bana bendi, pe babiyengayengeshele kwinga nkombela ya kuyengayengesha kuli Nyambi ya Ngula. 28Niho Moshesha afumishile byakulya ku maboko wabo na kubihokeshela ha kaala hayilu ya nkombela ya kuhokesha, kwinga nkombela ya ha kuwabisha. Eye yengile nkombela yakuhokesha ya byakulya kuli Nyambi ya Ngula. Livumba lya nkombela eye likuwahililisha Nyambi ya Ngula. Nkombela ya kukombelela ha mundilo kuli Nyambi ya Ngula. 29Niho Moshesha ashimbile kapumpo pe wakayengayengeshele kwinga nkombela yaku yengayengesha kuli Nyambi ya Ngula. Nisho shengile shitapilo sha Moshesha sha shikungwe wa mbelele kubafungwila kuli Nyambi ya Ngula. Moshesha watendele byuma nimwabyo ngonehe amutongwezele Nyambi ya Ngula.
30Moshesha washimbile mazi amo akuwaba na mukeza umo uya wekalile ha kaala, wawumyanzilile hali Aloni naha bivwalo byendi naha bana bendi naha bivwalo byabo. Mu ntendelo eye wafungwilile Aloni na bivwalo byendi na bana bendi na bivwalo byabo kuli Nyambi ya Ngula.
31Niho Moshesha atongwezele Aloni na bana bendi ngayi, “Twalenu nyama ku menginino a Ntanda ya Shikungulukilo, mukayiteleke, pe mukayilileko na mankende aya ali mu ntumba ya nkombela ya ha kuwabisha, ngonehe alayelele Nyambi ya Ngula. 32Mukahokesha nyama na mankende aya anashalaho. 33Enu kukafuma ku menginino a Ntanda ya Shikungulukilo matena mutanu na abili mufwako hantu matena akumikundika anamana. 34Nyambi ya Ngula wantongwezele kutenda ebye ngonehe eshe twatendakale lelo, ngayi mwanga nikamikulize mu kufumisha wubi wenu. 35Munafwanini kwikala ku menginino a Ntanda ya shikungulukilo mwaana na wushiku matena mutanu na abili. Ngayi mukatendenga ebye Nyambi ya Ngula anamba mwanga mukabule kufwa. Ebye nibyo Nyambi ya Ngula antongwezele.” 36Nohobene Aloni na bana bendi batendele byuma nimwabyo biya alayelele Nyambi ya Ngula kuli Moshesha.
Currently Selected:
Balevi 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
