Balevi 6
6
1 #
Kul 5:5-8. Nyambi ya Ngula wambile kuli Moshesha, 2“Nkombela yikakombeleliwa ku muntu nimwendi ukubipishila Nyambi ya Ngula ha kukana kubwesha kuli minendi wa Kaishalela shuma shiya ashiyile ku ndando kwinga ya sha kumwimaninaho, hinge kumuyibila shuma shimo hinge ku mukeyela 3hinge ndi ku mwongeza shuma shimo shiya ayongeshele pe ha kulibeza ngayi, niye kushiwana ufwako. 4Oho muntu unabipishi na kuwana mulandu, uku fwanina kuhingisha ebye nimwabyo ayibile hinge ebye ashimbile na kukeyela, hinge kuholeka shuma bamupanine ngayi akoweze, hinge shuma shiya shayongele, 5hinge ndi shengile shumangani akuhaha ngayi ku shilimuka ufwako. Uku fwanina kuhingishila mwine wabyo na kumuyakilaho nkambiko makumi abili ha mwanda na mwanda, ha mutena uya akaleta nkombela ya ha mulandu wendi. 6Ukaleta kuli mukankombela ntupu yendi ya kukuliza ya shikungwe wa mbelele hinge ndi mpongo wakubula muhendo. Pe ndando yendi yiku fwanina kwinga ndando ngo ndando iya ya toyiwa ha kulanda. 7Mukankombela uka kombelela nkombela ya kukuliza kuli Nyambi ya Ngula, ha wubi wa muntu, pe ukayatiliwa ha byuma biya atendele ngayi bimuletele mulandu.”
Kufundiziza kumina kwa bakankombela
8Nyambi ya Ngula wambile kuli Moshesha ngayi, 9“Tongweza Aloni na bana bendi ha ndayano eze za zinkombela za kuhokesha. Nkombela ya kuhokesha yikalala ha kaala wushiku nimwawo, yikonzelaho na mundilo kami ukonzela kubanga kukuma na kulumenemene. 10Pe mukankombela, hinga avwala lyambangubo lyendi lya likwiza lya kulelema na tuputula twa likwiza lya kulelema, ukafumisha mutoko ukashala ha kaala na ku wu kombela ku nkumo ya kaala. 11Niho akatambashana bivwalo byendi na kutwala mutoko ha munkanda wa munkungwa ku lilala ku mwanya wa kuyela. 12Mundilo wa kaala ukafwanina kubanga, kami hinga mwaka ukatanga kwitabilisha ngayi uzime. Lumenemene na lumenemene ukayakangaho nkuni na kuyakaho nkombela ya kuhokesha. Nakuhokesha mazi a nkombela ya kulilumikila. 13Mundilo uku fwanina kubanganga shikati nimwasho ha kaala, kami hinga uketabilishiwa ngayi uzime.”
Zintupu za ha mpeka
14“Ndayano eze zinengi zaha zintupu za ha mpeka. Mukankombela waku bana ba Aloni ukaleta ntupu ya mpeka kuli Nyambi ya Ngula kumbili ya kaala. 15Pe ukashimba liboko lya kwinzala lya muhunga hamo na mazi na incence ha ntupu ya kuhokesha ya byakulya na kubihokeshela ha kaala kwinga shanukisho ngayi nimwabyo binapanikiwi kuli Nyambi ya Ngula. Livumba lya neye ntupu linengi lya kuwahililisha Nyambi ya Ngula. 16Bakankombela bakalya bya ku shalaho, ngoboni bakalya bya kubula mumena, ku mwanya umo wa kuyela ku shipango sha Ntanda ya Shikungulukilo. 17Nyambi ya Ngula wabipanine ku bakankombela kwinga shitapilo shabo, sha ntupu ya byakulya ya kuhokesha ya ha mundilo niyo yinengi ya kuyela shikuma ngonehe zintupu za ha wubi na zintupu za kukuliza. 18Ha shikati nimwasho sha kumbili, bazukulya Aloni bakalyangayo kwinga shitapilo shabo sha kubula kumana ku bihemunwino byabo nimwabyo sha ntupu ya byakulya ya kuhokesha kuli Nyambi ya Ngula. Muntu nimwendi washenge waku kwatako hinge shuma shimo shiya shikukwata ntupu ya byakulya nafwanini kwinga wa kuyela.”
19Nyambi ya Ngula wambile kuli Moshesha ngayi, 20“Eye niyo ntupu ya kwimika mukankombela waku bana ba Aloni ha mutena uya akawabishiwa ukaleta ntupu ya muhunga kuli Nyambi ya Ngula. Pe muntendelo eye ukaletanga muhunga wakulembuka wa kilo imo kwinga ntupu ya mpeka ya ha mutena ha mutena, shitika ku lumenemene na shitika ku mazolo ngonehe shatendiwanga ku zinkombela za kuhokesha. 21Yikavweliwa na mazi kami yikayohiwa ha shinzoyo pe niho yikashanyozoliwa na kuyileta kwinga ntupu ya mpeka yikwinga livumba lya kuwahililisha Nyambi ya Ngula. 22Ha shikati nimwasho sha kumbili eye nkombela yikuwahishiwa ku muzukulya Aloni ou ukatendenga mulimo kwinga mukulwane wa bakankombela nimwabo, yikenga nkombela ya kuhokesha ya nzimba kuli Nyambi ya Ngula. 23Kowa shitapilo sha nkombela ya ntupu ya mukankombela yikafwanina kuliwa nimwayo yikafwanina kuhokeshiwa.”
24Nyambi ya Ngula wambile kuli Moshesha ngayi, 25“Tongweza Aloni na bana bendi ndayano za ha zintupu za ha wubi. Shimuna sha ntupu ya ha wubi akazihiwile ku mbalila ya ku ncelele ya kaala, oku bazihilanga kuli Nyambi ya Ngula babimuna ba zinkombela ba kuhokesha. Eze zinengi zinkombela za kuyela. 26#Shit 9:4; Bal 17:10-14; 19:26; Nday 12:16, 23; 15:23. Mukankombela ou ukatupula ha wubi shimuna ukamulila mu mwanya wa kuyela ku shipango sha ntanda ya shikungulukilo. 27Muntu nimwendi waku kwatako nafwanini kwinga wa kuyela, ndi shuma hinge shivwalo ha ku shabukila mukeza wa shimuna shiku fwanina kuyoweshiwa mu mwanya wa kuyela. 28Nyungu ya lima nimwayo eye yina telekiwi nyama yiku fwanina kuyi cancola ngoboni ndi yinengi nyungu ya shondo, yiku fwanina kupaliwa na kuyiyowesha na mema. 29Balume ba ku lupashi lwa bakankombela ba ku fwanina kulya eye nkombela niyo yinengi ya kuyela. 30Ngoboni ntupu ya ha wubi, mukeza unaletiwi mu Ntanda ya Shikungulukilo na ku wu tendesha kwinga wakulyambwililisha ha wubi, shimuna kaliha wafwanina kuliwa, uku fwanina kuhokeshiwa.”
Currently Selected:
Balevi 6: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
