Yowele 1
1
1Elye nilyo lizu lya Nyambi ya Ngula lyezile kuli Yowele mwana Petuwelu.
Bantu ba kulila kuloba kwa byakulya
2Yuvwenu eshe, enu bakulwane,
tengekenu matu, enu mwazika mu litunga nimwenu!
Kati shuma shanehe shamonekele ha matena wenu,
hinge ha matena a batatizenu ndi?
3Tongwezenu bana benu haneshe shuma,
kami bana benu bakatongweze bana babo,
na bana babo bakatongweze ba ku mukoka wakulundaminako.
4Mbuto yinashala ku bana bamikumbi,
niyo banezi mu kulya bamikumbi.
Oyo banashiyi bamikumbi, niyo banezi mu kukenya tuhenya,
oyo bashiyile tuhenya, niyo banezi mu kulobesha bambimba.
5Pindukenu, enu bakakukolwa,
pwezumenu, kami lilenu, enu nimwenu bakakunwa waine,
mikabo ya shinyanca nimwayo yinabipi,
kami waine yenu yayitobe yinamana.
6 #
Kuh 9:8. Ndaba mukoka wangovu unezi mu kulwisha litunga lyami,
unengi mukoka wa bantu babengi bakubula kutwesheka kulabiwa,
mayewe wabo amatwe ngo mayewe a shimbwi,
bali na mimbanga ya kufweka ngo mukazi wa shimbwi.
7Babipishakale mikolobozi yami ya shinyanca,
na kupulula bitondo byami bya mikuyu,
Banakenye makombombo ayo na kuwapulumwina hanci,
myahi yayo yinashala nahiya,
ya kubula makombombo.
8Lilenu ngo kankanga nalimanga bicancolo,
ndaba ya kufwa kwa mukokwendi waha wunkanga wendi.
9Ntupu ya byakulya bya mpeka na ntupu ya waine
kutwaliwa mu Litala lya Nyambi ya Ngula bifwako.
Bakankombela ba kulila,
aba benga bakamulimo wa Nyambi ya Ngula.
10Mafuba analobeshiwi, limvu lili na kulila,
ndaba byakulya bya mpeka binalobeshiwi,
waine yakwanganakale na mazi kami hikowa.
11Enu bandimi, lihupwizenu,
tuwenu mbingo enu bakakulima shinyanca, na loto na luku,
ndaba bya kuteza mu mafuba binalobo.
12Mikolobozi ya shinyanca yinalebuku,
mitondo ya mikuyu yinayuminini, manzenze,
minkomona na mikabo ya ma apulu,
bitondo nimwabyo bya mu lishaka binalebuku,
na kutangala kwa mitima ya bantu kunamana.
13Enu bakankombela, limangenu bicancolo na kulila,
enu bakakukombelela ku tuula,
tuwenu mbingo.
Enu bakamilimo ba Nyambi,
yinginenu mulale hinga mwavwala bicancolo wushiku nimwawo.
Ndaba ntupu ya byakulya bya mpeka na ntupu ya waine,
kutwaliwa mu Litala lya Nyambi bifwako.
14Hatenu mutena wakuzila kulya,
yihanenu shikungulukilo sha bantu nimwabo,
kungulenu bakulwane, nanaba bazika mu litunga nimwabo,
mwize ku Litala lya Nyambi ya Ngula Nyambi yenu,
mwanga mulilile kuli Nyambi ya Ngula.
15 #
Isha 13:6. Makando tawee, ku wuyo mutena!
Ndaba mutena wa Nyambi ya Ngula uli hahepi,
ukenga mutena wakulobesha wa Mpandashilanga.
16Kati byakulya shilolo bilobe etu hitumonako,
ku wahilila na kutangala kwamu Litala lya Nyambi yetu niko bishili ndi?
17Mbuto yinabolele hanci, bishete binanyemuku,
byakulya binalobeshiwi,
ndaba bya kuteza hikowa.
18Bimuna bali na kukaloka,
matanga a zingombe ali mu makalikiza,
ndaba ya kubula mabuyilo wazo,
hinge matanga a bambelele anatampwa.
19Nikwihana kukwobe, obe Nyambi ya Ngula.
Ndaba mundilo unahokeshe mabuyishilo amu mbuwa.
Milangi ya mundilo yinahokeshe bitondo nimwabyo bya mu mafuba.
20Hinge tuyamana twa mu lishaka tukulilila kukwobe ndaba tunkonkolonga tunayumu nkwaa.
Mundilo unahokeshe zimbuwa za kubuyishila.
Currently Selected:
Yowele 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
