Yelemiya 43
43
Yelemiya ukutwaliwa ku Engepita
1Yelemiya wambile ku bantu mazu nimwawo a Nyambi ya Ngula, Nyambi wabo. Oho amanishile kubatongweza nimwabyo biya amutumine Nyambi ya Ngula ngayi ambe kukwabo, 2niho Azaliya mwana Hoshaya na Yohanani mwana Kaleya na bantu nimwabo bakakuliyemeza bakumbwile Yelemiya ngayi, “Unakwamba mahalo, Nyambi ya Ngula, Nyambi wetu, shilolo akutume kukwetu na kwamba ngayi, ‘Hinga muya ku Engepita na kwikalako.’ 3Ngoboni Mbaluki mwana Neliya niye unakutongweze ngayi wize na kwamba noho, mwanga Bakambambiloni beze na kutuziha, hinge kututwala mu wuntapwa ku Mbambiloni.” 4Nohobene Yohanani mwana Kaleya na bakakutwaminina bakanzita na bantu nimwabo babulile kwombatala ndayano za Nyambi ya Ngula, bakanine kwikala mu Yunda. 5Yohanani mwana Kaleya na bakakutwaminina bakanzita, batwalile bantu nimwabo baya bashalile mu Yunda ku Engepita. Bengile bantu nimwabo baya bezile mu Yunda, kufuma ku matunga nimwawo kuya bapanzaninine. 6Bayile, balume na bambuyama na batwanuke na bana ba mwene ba bambuyama baya ashiyile Nembuzalandani mukulwane wa bakanzita mu ngovu za Ngendaliya mwana Ahikama, muzukulya Shafwani. Na muluwe Yelemiya na Mbaluki mwana Neliya, nimwabo babatwalile ku Engepita. 7Bayile ku Engepita ndaba babulile kwombatala mazu a Nyambi ya Ngula, pe bakakumine mu munzi ukutumbiwa ngayi Tahipaneshi.
8Oho tuli mu Tahipaneshi, Nyambi ya Ngula wambile kuli Yelemiya ngayi, 9“Oho bantu ba Yunda hiba ku mona, shimba mamanya amanene mu maboko wobe pe uwaholeke mu liteke hahepi na menginino akuya ku musheke wa mwene Fwalo mu Tahipaneshi. 10Utongweze bantu ngayi, ‘Nyambi wa Makunge, Nyambi wa Ishalela, ukwamba ngayi mona, nina kuya na kuleta muka mulimo wami Nembukandineza wa Mbambiloni, ukayaka litanda lyendi ha waya mamanya naholekele na kuyakaho ntanda ya wene. 11Nembukandineza ukeza na kulwisha litunga lya Engepita. Bantu obo bayatiwilile kufwa ku wulweli bakafwa ku wulweli, obo bayatiwilile kutwaliwa mu wuntapwa ukabatwala mu wuntapwa nanobo bayatiwilile kuzihiwa ku mukwale bakazihiwa ku mukwale. 12Nikahokesha matala a banyambi ba Engepita na mundilo, kami mwene wa Mbambiloni ukahokesha banyambi babo hinge kubatwala mu wuntapwa, ukashimba litunga lya Engepita na kuliyelesha ngonehe mulishani atumbulanga ziina ha shivwalo shendi, kami ukaboka mu ku mwena. 13Ukahandola bifwekesha bya Mbeti shemeshi nyambi wa mutena mu Engepita. Pe ukahokesha matala a banyambi ku Engepita.”
Currently Selected:
Yelemiya 43: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
