Yelemiya 41
41
1Mu ngonda wa mutanu na zibili wa mwaka uyabene, Ishimaele mwana Netaniya ou wengile muzukulya Elishama, umo waku muhoko wawene na umo wa mukulwane ku babilolo wezile ku Mizipa na balume likumi, mu ku mona Ngendaliya mwana Ahikama. Oho balilenga byakulya hamo kuya ku Mizipa, 2Ishimaele mwana Netaniya na balume likumi baya ekalile nabo bazihile na mukwale Ngendaliya mwana Ahikama, ou wengile muzukulya Shafwani. Ngendaliya niye wengile kalela wa litunga lya Yunda ou mwene waku Mbambiloni ayakile. 3Ishimaele wazihile kami Bayunda nimwabo aba bekalile na Ngendaliya ku Mizipa na bakanzita ba Mbambiloni baya bekalilenga ku Mizipa. 4Oho kwashile, kuwana bantu nimwabo shilolo balimuke lufu lwa Ngendaliya, 5bantu 80 batewile milevu yabo, batabwile bivwalo byabo na kulibwekola nibo bamwine, bafuminenga ku Shekemu na Shilo na Shamaliya. Baletele ntupu ya mpeka na incence ku Litala lya Nyambi ya Ngula. 6Ishimaele mwana Netaniya wafumine ku Mizipa kuya na kubashimbawila oku halila. Oho akumine kukwabo wambile ngayi, “Tawee! Yinginenu mumone Ngendaliya mwana Ahikama.” 7Oho bezile mu lukena, Ishimaele mwana Netaniya na balume ekalile nabo bazihile kami baya bantu, niho bayumbilile mituntu yabo mu lishima. 8Ngoboni kwekalile balume likumi hakati kabo obo bambile kuli Ishimaele ngayi, “Hinga utuziha, ndaba tuli na loto na luku na mazi a olive na wushi, biya tunakoweze mu mafuba wetu.” Niho abashiyile kaliha wabazihile. 9Lishima liya Ishimaele mwana Netaniya ayumbilile mituntu ya bantu baya azihile hamo na Ngendaliya, lyengile lyalinene, liya mwene Asha akabile lya kukongela mema, oho amulwishilenga Mbaasha mwene wa Ishalela. Ishimaele wenzalishile liya lishima na mituntu. 10Ishimaele niho atwalile mu wuntapwa baya bekalile mu Mizipa, bana bamwene ba bambuyama na bantu nimwabo bashalile mu Mizipa, baya Nembuzalandani mukulwane wa bakanzita ashiyile mu ngovu za Ngendaliya mwana Ahikama. Ishimaele mwana Netaniya, wabatwalile mu wuntapwa, niho akatukile kuzabuka nabo ku litunga lya Baamoni. 11Ngoboni oho Yohanani mwana Kaleya na bakakutwaminina bakanzita baya bekalile nendi, oho bayuvwile wubi ou atendele Ishimaele mwana Netaniya, 12bashimbile bakanzita babo nimwabo, niho bakonkele Ishimaele mwana Netaniya ngayi bakamulwishe. Bamuwanine ku liziba lyalinene lya Ngimbiyoni. 13Oho bantu nimwabo baya akwatile Ishimaele bamonene Yohanani mwana Kaleya na bakakutwaminina bakanzita, baya bekalile nendi bawahililile. 14Niho bantu nimwabo baya akwatile Ishimaele ku Mizipa, babokele kuli Yohanani mwana Kaleya. 15Ngoboni Ishimaele mwana Netaniya na balume mutanu na bahatu bapanzile kuli Yohanani, niho betukilile ku Baamoni. 16Yohanani mwana Kaleya na bakakutwaminina bakanzita baya bekalile nendi, balamwinine bantu nimwabo baya atwalile Ishimaele mwana Netaniya mu wuntapwa, munyima ya kuziha Ngendaliya. Yohanani watwaminine bakanzita na balume na bambuyama na batwanuke na babilolo, bafumine ku Ngimbiyoni 17bakekalile ku Ngeluti Kimihami hahepi na Mbetelehema. Bahanganikile kuya ku Engepita ndaba ya kutina baka Mbambiloni. 18Bekalile na bowa, ndaba Ishimaele mwana Netaniya, wazihile Ngendaliya mwana Ahikama, uya ahatile mwene waku Mbambiloni ngayi enge kalela wa litunga lya Yunda.
Currently Selected:
Yelemiya 41: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
