Ishaya 3
3
Kuyata ha Yelushalema na Yunda
1Monenu taha, Mwene, Nyambi wa Makunge, wuluno ukafumisha mu Yelushalema namu Yunda nimwabyo biya binakinki mitima ha bantu. Ukafumisha byakulya nimwabyo na mema, 2na balume bangovu na bakanzita na bakakuyata na bamiluwe na bakakubuka na bantwamina, 3na bankongo ba bakanzita ba kutwaminina litanga lya bakanzita makumi mutanu na bantu babalemu, bankongo na bakakulimuka malele na bakakwawula. 4Nyambi ya Ngula uketabila bandumbana kwinga bantwamina babo, pe bambututu bakabalela. 5Bantu bakaliyandisha umo na wamina, muntu na minendi na muntu na ndambo yendi. Bandumbana bakahandula bakulwane babo na batunkutala kukalemeeka babalemu bafwako.
6Muntu ukemika umo ha bawushinda wendi wamu litala lya tatiyendi na kumutongweza ngayi, “Hano uli na lyambangubo, ukenga mukakututwaminina na nou mushiinzi wa mapembe ukekala mu kulela kwobe.”
7Ha mutena uyo ukakumbula ngayi, “Kutwesha kumiyavwa nifwako. Mu litala lyami na byakulya bene na lyambangubo nimwabyo mowa. Hinga mu nyaka ngayi ninge mukakutwaminina bantu.”
8Yelushalema unapukazala na Yunda kami nawu hanci. Nyambilo yabo na ntendelo yabo binengi bya kulwisha Nyambi ya Ngula na kuhandula wuwahe wendi. 9Zimpala zabo zikenga wupaki wakubalwisha. ba Kubipisha mwaanancanana ngonehe baka Shondoma, kuholeka wubi wabo bafwako. Makando wabo tawee. Ndaba banaliletele wukalu hahabo nibo bamwine.
10Tongwezenu bakulunga ngayi, byuma bikekala shiwahe kukwabo. Bakawahilila mikabo yaku milimo yabo. 11Makando wabo tawee bakuluwa. Shikenga shashikalu kukwabo. Ebye atendele maboko wabo, bikatendiwa kukwabo kami.
12Batwanuke bakulyatilila bantu bami, kami bambuyama bali na ku balela. Bakakumitwaminina bali na kumishanwisha na kuvulanganya nzila mu ku fwanina kuya nayo.
13Nyambi ya Ngula waliwahishilakale mu kutumpula shambo shendi, unaliwahishili mu kuyata bantu bendi. 14Nyambi ya Ngula ukuyata bakulwane na batulela ba bantu bendi. Ukwamba ngayi, “Enu munabipishi mfuba yami ya shinyanca, byuma bya bakakushepwa bili mumatala wenu. 15Haya bihi munalyatilili bantu bami naku kanyananisha zimpala za bakakushepwa?” Eshe nisho anamba Mwene, Nyambi wa Makunge.
Kukeyesha bana ba bambuyama bamu Ziyoni
16Nyambi ya Ngula ukwamba ngayi, “Bana ba bambuyama bamu Ziyoni bali na kulilundumika. Bakwenda hinga bemika mikoshi na kulelula meho. Bakwenda zintambo zazishe oku hibavumisha mankunda banavwala mu zingongo zabo.” 17Haya Mwene ukaleta bitombo mu mitwe ya bana ba bambuyama bamu Ziyoni, Nyambi ya Ngula ukasheha mitwe yabo na kuyifutula zintenda.
18Ha mutena uyo, Mwene ukabayangula byuma byabo byankwela, mankunda amuzingongo na bitambala bya ku mitwe na mikali ya mu ncingo, 19na tupata matu na makaya aku maboko na makwiza akufwika mu ncingo, 20na tushoti na mikalo na tuponda na mishashi ya mazi akunuka shiwahe na manga, 21na tumbalaminwe twatunene twa ndando yayinene shikuma na tunkunda twa ku muzulu, 22na bivwalo byabiwahe na lyambangubo na zibaki na bikwama, 23na biponi na bivwalo bya kulelema na tukwiza twa kuzenga ku mitwe na makwiza akulikoleka ha bifuzi.
24Mazi a lukumba akunuka shiwahe, kukayuvwanika afwako, ngoboni kukafushoka bya ku bola. Kukalimanga mikunzi bafwako, ngoboni bakalimanga nyimbwa za kupohela. Bafwako kukekala na huki zaziwahe, ngoboni bakekala na zintenda. Kukavwala bivwalo bya ndando yayinene bafwako, ngoboni bakavwala mashaka. Wuwahe wabo, ukafutuka lisheni.
25Balume bakawa na mukwale, balume ba kukanca, bakafwa mu nzita. 26Mapangati a Ziyoni, akalila na kutuwa mbingo. Lukena lukafutuka mapembe, lukafweka ngonehe mbuyama unalihubili hanci.
Currently Selected:
Ishaya 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.