Hoshiya 2
2
1Amba ku kawushinda wobe ngayi, “Enu bantu bami,” pe kami amba kuli mpanzobe ngayi, “Unahakiwi.”
Kubula kwoloka kwa Ngomela na Kubula kwoloka kwa Ishalela
2“Bana bami lambililenu mandiyenu Ishalela, mulambililenu ndaba uli na kutenda ngo kaliha mukazami. Kumpanika maleema aku monesha ngayi nili mukokwendi ufwako. Mutongwezenu ashiye makaya a lwiholwiho na wumambe na bivwalo biku monesha muhelengwa wendi. 3Ndi kukayuvwa afwako pe nikamuvula bivwalo na kumushiya muhelengwa ngonehe mutena ahemuwile. Nikamwinga ngo libelelengwa na litunga lyanyuminine, pe ukafwa ku linyontwa. 4Nifwako kukayuvwila nceshe bana bendi, ndaba banengi bana ba walwiholwiho. 5Ndaba mandiyabo, unatende bya wumambe, niye ou wabemitile unatende bya lisheni. Wambile ngayi, ‘Nikakonkezeka ba kuhakiwa bami, pe bakampanika byakulya na mema na wushako wa bambelele na makwiza na mazi a olive na waine.’
6“Haya nikashaya nzila yendi na mikona na kuzika nzila yendi na kembi, ngayi akabule kwa kupitila. 7Hinge niye ukakonkezeka aba ahaka, kukaliyuvwa nabo kami ufwako. Hinge ndi ukabashingashinga, kuka bawana ufwako. Niho ukalihanganika na kwamba ngayi, ‘Nikaboka kuli mukokwami wakutatika, ndaba nekalilenga shiwahe, kupitakana eshe nili lelo.’
8“Niye ufwako ku yuvwishisha, ngayi ami namupanikilenga mpeka na waine na mazi na shiliva na ngolinde, ngoboni waliyavwishilengabyo kuli Mbaalu. 9Nohobene nikashimba byakulya byami oho byahokakale na kushimba waine na wushako waha bambelele bami na makwiza ami awa namupanikile, ngayi afwike muhelengwa wendi. 10Haya nikamuvula hakati kaba njenge zendi, pe kowa ou ukatwesha kumulamwina ku liboko lyami. 11Nikamanisha bimbo byendi bya ku wahilila nimwabyo, bimbo bya ha mwaka na bya kutelama kwa ngonda na bya ha kukatala na bimbo biya bya kuhatiwa nimwabyo. 12Nikalobesha mikolobozi ya shinyanca na mitondo ya mikabo ya nkuyu, eye ambile ngayi, ‘Yafumine ku banjenge zami.’ Nikafutula mafuba endi a shinyanca ngo lishaka. Tuyamana twa mu lishaka bakabilya. 13Nikamushushula, ndaba ya kukombelela incence na zinkombela ku banyambi bashenge ba Mbaalu, pe kami unavwala tumbalaminwe twendi na bya kuliyenga nabyo na kukonka banjenge zendi na kuvulama.”
Eshe nisho anamba Nyambi ya Ngula.
Shishemo sha Nyambi ya Ngula ha bantu bendi
14Eshe nisho nikatenda ha kumubweshela kukwami, nikamutwala mu libelelengwa, pe nikamubengezeka na mazu amawahe. 15Kuyo nikwo nikamupanika mafuba a mikolobozi ya shinyanca na kufutula Mukulo wa Makando#2:15 Makando: Mu Shihebelu ngayi, mukulo wa Akola. kwinga shipana sha kulumbeza. Pe kuyo, ukakumbula ngonehi ekalile ha shikati sha wanuke wendi, ngonehe ha shikati shiya afumine mu litunga lya Engepita. 16Nyambi ya Ngula ukwamba ngayi, “Ha mutena uyo, ukantoya ngayi, ‘Mukokwami’, ufwako kukantoya ngayi, ‘Hekulyami#2:16 Hekulyami: Shihebelu ngayi, Mbaalu..’” 17Ndaba nikafumisha mazina aba Mbaalu, mazina wabo kuka yuvwanika kami afwako.
18Ha mutena uyo, nikalimama na tuyamana twa mu lishaka na tuyoni nimwato na biya nimwabyo byalikokanga hanci, ngayi mwanga ukekale mu ku mwena. Nikafumisha shipando sha mukunzi na mukwale ngayi kukekale ku mwena.
19Nikakubwesha kukwami mwaya myaka.
Nikakubwesha kukwami mu kulunga na mu kupwisha,
nika kuholwela shishemo sha mwaya myaka na shikeketima.
20Nikakubwesha kukwami mu kukulupila,
pe ukalimuka Nyambi ya Ngula.
21Ha mutena uyo, nika kumbula malombelo wobe,
nikambila liyilu, pe liyilu likazabisha hanci.
Eshe nisho anamba Nyambi ya Ngula.
22Nohobene hanci hakaholola mbuto na waine na mazi a olive.
Yezilelu ukekala na mbuto yayingi.
23Nikekalika bantu bami mu litunga.
Aba batoyiwile ngayi, “Kaliha ba kuhakiwa,”
nikabatoya ngayi, “Bakakuhakiwa bami.”
Aba batoyiwile ngayi, “Kaliha bantu bami,”
nikabatoya ngayi, “Bantu bami.”
Pe bakamba ngayi, “Obe Nyambi yetu.”
Currently Selected:
Hoshiya 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
