Hambakuki 2
2
1Nikemana mu mwanya wami wakulama, pe nikakandama na kwikala ha kapeshi na kupenzelela ngayi nimone ebye ukamba kukwami nanebye afwanina kukumbula ku manyengo wami.
Nyambi ya Ngula ukukumbula Hambakuki
2Nyambi ya Ngula wankumbwile ngayi, “Tikita eshe shimono, shilubulule na ku shitikita ha matapa a lima ngayi ou ukalabaho aketuke. 3#Bah 10:37. Ndaba shimono shishili kutatilila kukuma ha shikati shasho shikwinika kutwala ku kukotoka, kukongeza shifwako. Ndi shiku moneka kwinga ngo shikwihala, shitatilile. Mwa shikuma bene shikeza, kukehala shifwako. 4#Lom 1:17; Nga 3:11; Bah 10:38. Mona, muka kutenda byabibi ukakwanga, ngoboni mukakwoloka ukayoya na kukulupila.”
5Waine yenga yikakubeba. Waine yabebanga mukakuliyemeza na muvwa, milibu yendi ngonehe shinzimbi, kami nafweke ngonehe lufu, hinga lwatanga kwikuta. Ukulikungwila matunga nimwawo, kami ukukwata bantu kwinga bendi matunga nimwawo.
Kushushula kwa bakakubula kwoloka
6Kati bantu nimwabo bafwako kuka mushilawiza naku muhengamina naku mukendula na kwamba ngayi, “Makando wendi ukulibungikila byuma bya kubula kwinga byendi na kulihetesha niye mwine na mali a mukwatila. Eshe shikatwalililaho shikati sha kukuma hati?”
7Baka mikuli yenu bakamikatukila mutakwe na kumi bazumuna, kati baya ba kubazumwine kaliha bakeza naku kukankisha ndi? Niho ukenga lipuku lyabo. 8Ndaba unapukulu matunga amengi, mashaliza a bantu ba matunga bakakupukula na nobe kami, ndaba unayiti mukeza wa bantu na kuleta mushunga hano hanci naku minzi naku bantu nimwabo bekalamo.
9Makando kukwendi ukuleta na kwingiza mu litala lyendi wuheti anawana mu nzila yayibi, ngayi akatendele lihwa lyendi hayilu, kutinisha kumwizilila byabikalu. 10Unakokele ku litala lyobe bya lisheni ndaba yakumanisha bantu babengi, unakana wumi obemwine. 11Ndaba limanya lili mu limota likalila, pe mukambo mukati ka honto ukakumbula.
12Makando kukwendi! Ou ukuzika munzi ha kuyita mukeza na wubi. 13Monenu, kati kaliha shinafumu kuli Nyambi wa Makunge ngayi milimo ba kutenda bantu yinengi nkuni za ku bangizisha mundilo, kami matunga akulikwangisha niwo amwine ha byowa. 14#Isha 11:9. Ndaba hano hanci hakenzala kalimukisho ka maleema a Nyambi ya Ngula, ngonehe mema enzala mu liwate.
15Makando kukwendi ukunwisha ndambo yendi malovu, ukumunwishilawo mu mbokoshi hantu nakolwo ngayi bamone muhelengwa wendi. 16Mukekala na lisheni kupitakana maleema. Haya nobemwine, nwamo nobe utalangile. Nkomoki yili mu liboko lya Nyambi lya shilyo yikapita na kukuma kukwenu. Pe lisheni likahinga ha maleema wenu. 17Mushunga wekalile ku Lembanoni ukakwizilila na nobe kami, kulobeshiwa kwa tunzama kuka kutinisha, ndaba unayiti mukeza wa bantu na kuleta mushunga hano hanci naku minzi naku bantu nimwabo bekalamo.
18Kati tukuwana bishini ku kanankishi, oho mukakukabaza wakabazakale shifwekesha sha kanankishi kakuyungulula, uku longesha bya mahalo. Ndaba ou wakabazile unakulupili muneshe atenda niyemwine mu kaya kanankishi ka shimumu. 19Makando nimwendi ukwambila shuma sha kubaza ngayi, “Tona,” Hinge ku limanya lya shimumu ngayi, “Katuka.” Kati ebye bikutwesha kuholola byuma ndi? Monenu, kanafwikiwi na ngolinde na shiliva, kami mukati kako mowa kwoya.
20Ngoboni Nyambi ukwikala mu litala lyendi lya kuyela, bantu nimwabo hano hanci bamwene nee ku meho wendi.
Currently Selected:
Hambakuki 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
