Ezekiyele 8
8
Bya kulemesha tunankishi mu Yelushalema
1Ha mutena wa mutanu ku ngonda wa mutanu na yimo ku mwaka wa mutanu na umo wakutandiwa kwetu. Nekalile mu litala lyami na bakulwane ba Bayunda, hohobene nayuvwile ngovu za Nyambi ya Ngula. 2Niho namonene shuma shamonekele ngo shifwekesha sha muntu, kufuma mulukanda kutwala ku mawulu wendi, lutu lwendi lwafwekele ngo mundilo, pe kufuma mulukanda kutwala ku mutwe wendi wabyaziminenga ngonehe lubemba lwa kulomba. 3Niye watandubwile eshe shamonekele ngo liboko pe shankwatile ku huki. Niho mushimono eshe moyo wa Nyambi wankatwile mu mbimbayilu na kuntwala ku Yelushalema. Niye wantwalile ku menginino a hakati ka ku lipangati lya ku ncelele ya Litala lya Nyambi ya Ngula, oku kwekalilenga kanankishi ka kumengenyesha ku meho a Nyambi.
4Kuyo namonene wuwahe wa Nyambi wa Ishalela, ngonehe namonene wuwahe wendi mu bimono byami mu mukulo wa Kemba. 5Nyambi wambile kukwami ngayi, “Mwana muntu, tilamina ku ncelele.” Niho natilaminineko pe kuya kwakwipi na kaala ku menginino a lipangati namonene kanankishi kaya kabulile kuwahilisha Nyambi.
6Nyambi wambile kukwami ngayi, “Mwana muntu, kati obe hi umona ebye bya wunyengwe ebye bantu Baishalela bali na kutenda ndi? Bali na kuntandila kwakutali shikuma kufuma ku mwanya wa kuyela. Obe ukamona byuma byabingi bya ku yenesha kupitakana biya.”
7Niho antwalile ku menginino a shipango pe wamoneshele litubwa ha kembi. 8Niho ambile ngayi, “Mwana muntu, tubula kembi.” Natubwile kembi pe nawanine shipana. 9Wantongwezele ngayi, “Ingina mukati ukamone wubi na byuma byawunyengwe bali na kutenda kuyo.” 10Nohobene ami nenginine na kutilaminamo namonene kembi nimwako kanafwikiwi na bifwekesha bya mayoka na batuyamana bamina ba mazilo na byuma byamina ebye balemeshelenga Baishalela. 11Bantwamina ba baishalela ba makumi mutanu na abili niko bekalile kuyo na Yazaniya mwana Shafwani naye niko ekalile. Muntu na muntu hinga akwatilila lulonga lwa kuhokeshela incence, wishe watutuminenga kufuma ha incence. 12Pe Nyambi wanyipwile ngayi, “Mwana muntu, pe umona ebye bali na kutenda bantwamina ba baishalela kuwi ndi? Muntu na muntu uli na kulemeshela ku kampenci kendi kanenzala na bifwekesha. Kulibibiza kwabo ngayi, ‘Nyambi ya Ngula kutumona wufwako. Unakana litunga.’”
13Niho Nyambi ya Ngula ambile kukwami kami ngayi, “Ukamona byuma byabinene byawunyengwe bakatenda kupikatana biyo.” 14Pe wantwalile ku lipangati lya ku ncelele lya ku Litala lya Nyambi ya Ngula pe wamoneshele bakazi balililenga ha lufu lwa nyambi Tamuzi.
15Niye wanyipwile ngayi, “Mwana muntu, pe umona ebye bali na kutenda? Ukamona byuma byabinene byawunyengwe kupitakana ebye.” 16Nohobene wantwalile mukati ka Litala lya Nyambi kuyo kwakwipi ku menginino aku mwanya wa kuyela, mukati ka kaala na mbanza, kwekalile balume makumi abili na mutanu. Bafutaminine myongo yabo ku Litala lya Nyambi ya Ngula, pe bashinkamine hanci na zimpala zabo hinga za penza ku mushamuko, balemeshelenga mutena oho watutikilenga.
17Nyambi ya Ngula wambile kukwami ngayi, “Mwana muntu, pe unamono biyo ndi? Aba bantu bamu Yunda bafwako kukwanga kutenda byuma nimwabyo bya wunyengwe ebye unamono kuno. Ndaba ya nibo kuli mushunga kuti na kuti mu litunga nimwamo. Kami bakwiza kuno mu kumpilamisha shikuma. Mona eshe bakuhandula mu nzila ya Kubipisha ya kubula ku fwanina. 18Nohobene ba kuyuvwa wukali wami. Nifwako kuka baleha hinge kubayuvwila nceshe, oho bakabilikiza kulombela kutenda miyoyo, ngoboni Ami nifwako kuka bayuvwililila.”
Currently Selected:
Ezekiyele 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
