Ezekiyele 47
47
Mushinzi ukukunkula kufuma mu Litala lya Nyambi
1Muntu wambweshele ku menginino a Litala lya Nyambi. Mema akunkulanga kufuma ku nceto na kukunkula ku mushamuko, oku lyapenzele Litala lya Nyambi. Mema akunkulanga kufuma ku mabukubuku a Litala lya Nyambi kupita ku mushamuko wa kaala. 2Niho ou muntu antutwishilile ha munkanda na nzila yaku ncelele na kuntwaminina kuzinguluka nzila ya kututikila ku lipangati lya ha munkanda, eye yapenzele ku mushamuko na mema akunkulanga kufuminina ku mbalila ya mabukubuku. 3Ou muntu na muwana wendi washondo wakufwanikizisha mu liboko lyendi wayile ku mushamuko, wafwanikizile zintambo za mamita 500 ku kunkwilisha mushinzi pe wancimbile kunzabwisha mushinzi kuyo. Mema akumine muzingongo zami. 4Niho kami afwanikizile zintambo za mamita 500, pe mema akumine mu manungo wami, pe wafwanikizile zintambo za mamita 500 mema akumine mu lukanda lwami. 5Wafwanikizile zintambo za mamita amina 500, pe uyo mushinzi wengile wakunonka shikuma kaliha natweshele kuzabukaho. Wengile wakunonka kuzabukaho ndele tuhu kuyowa. 6Pe wambile kukwami ngayi, “Mwana muntu, limukisha byuma ebye nimwabyo shiwahe.”
Niho uya muntu ambweshele ku shibumbo sha mushinzi, 7oho na kumine kuyo namonene mitondo yayingi shikuma ha shibumbo na shibumbo. 8Pe wambile kukwami ngayi, “Awa mema akukunkula kupita mu litunga kuya ku mushamuko na kunkulukila mu mukulo wa Yondana na ku Liwate lya Mushele. Oho akukunkulila mu Liwate lya Mushele niwo akutendesha mema amu liwate kwinga amawahe. 9Oku nimwako mushinzi akukunkulila, kukekala mishobo nimwayo ya tuyamana na zinci. Mushinzi ukatenda mema a liwate kwinga a kubombola, pe kami nimwako akakunkulila ukaleta wumi. 10Bakakushashila zinci bakemana ha bibumbo byawo, kufuma ku kaheloke ka Engendi nzila nimwayo kukuma ku tuheloke twa Eni Engilami, kami bakatandubula tunyanzi twabo kuyo mu kutuyanika. Kuyo kukekala zinci zazingi za kulishiyashiya ngonehe zili mu liwate lya Menditelenyani. 11Ngoboni mema amu makundu namu maziba aku shibumbo afwako kukenga amawahe. Niwo akekala ngo a mushitapo sha mushele. 12#Kuh 22:2.Ha shibumbo nimwasho sha mushinzi mishobo nimwayo ya mitondo yikamena ya kupanika byakulya. Mabizi wayo afwako kukalebuka, kami niyo yifwako kukaleha kuyima mikabo. Bikekala na mikabo ya kubombola mu ngonda nimwayo, ndaba yikuzabishiwa na mushinzi uya ukukuka kufuma ku Litala lya Nyambi. Mitondo yikapanikanga byakulya na mabizi wabyo akenga akunyongomanisha bantu.”
Zinginza za Litunga
13Nyambi ya Ngula wambile ngayi, “Eze nizo zinginza za litunga zikafwanina kutapila mishobo ya Ishalela likumi na babili, pe mushobo wa Yoshefwa ukatambula kabili kupitakana bamina. 14Mukafwanina kulitapila elye litunga kwezekela hamo, ndaba nalihahile ku bankakazenu ngayi nikabapanika elye litunga, haya linapanikiwi kwinga shitapilo shenu.
15“Eye niyo nginza ya litunga, kumbalila ya ku ncelele, kufuma ku liwate lya Menditelenyani na nzila ya kuya ku Hetiloni kuya ku menginino a Hamati naku Zendandi, 16kuya ku minzi ya Mbelota na Shimbulayimu, minzi yili mukati ka Ndamashika na Hamati naku munzi wa Haza Hatikoni unazikiwi ku nginza ya wene waku Haulani. 17Pe nginza ya ku ncelele yikufuma ku mushamuko ku liwate lya Menditelenyani yikuya ku munzi wa Haza Henoni, kulitapila nginza na matunga a Ndamashika na Hamati ku ncelele walyo.
18“Nginza yaku mushamuko yikululumana ku mabukubuku kufuma ku matunga a mukati ka Ndamashika na liya lya Haulani na mushinzi wa Yondana niwo watenda nginza mukati ka litunga lya Ishalela ku mponci na Ngiliyande ku mushamuko, kulumbalala naku Tamale ku Liwate lya Mushele.
19“Nginza yaku mabukubuku yikalulumana kufuma ku Tamale kuya ku mema a Melimba Kandeshi, niho kami ku ncelele kulwa mponci ha nginza ya baka Engepita ku liwate lya Menditilenyani.
20“Nginza yaku mponci yinatendiwili ku Menditelenyani na kululumana ku ncelele ku menginino a Hamati.
21“Pe litapilenu litunga mukatikenu Baishalela, 22nilyo likenga likona lya wuheti wenu. Bayeni bekala mukatikenu pe kami bali na bana banahemuwili muno bakatambula shitapilo sha litunga oho mukatapabyo. Nabo kami yikalenu nabo shiwahe ngonehe bawushindawenu Baishalela, bakatendanga nyela ha kutapa litunga ngayi nabo bakekale na shitapilo ngonehe Baishalela. 23Lipukwenda nimwendi oku ekala uku fwanina kutambula shitapilo shendi hamo na bantu baishalela.” Eshe nisho na kwamba Ami Nyambi ya Ngula.
Currently Selected:
Ezekiyele 47: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
