Ezekiyele 39
39
Kukomiwa kwa Ngongi
1Mwana muntu, ambila Ngongi ngayi, “Nyambi ya Ngula ukwamba ngayi, nili na kukulwisha obe Ngongi, obe kalela waku Mesheki naku Tumbalu. 2Nika kuzingwilisha pe nika kukoka nika kufumisha kuya ku ncelele kwakutali na kukuleta ngayi wize na kulwisha mapili a Ishalela. 3Nikawisha shipando sha mivwi shili mu liboko lyobe lya shimoho na kukuyumbisha mivwi yili mu liboko lyobe lya shilyo. 4Ukafwila ha mapili a Ishalela na bakanzita bobe na bakakulwa baya uli nabo hamo. Nikamileha ngayi mukaliwe ku tuyoni nimwato twalyanga nyama naku tunzama nimwato twa mu lishaka. 5Mukafwila mu zimbuwa ngonehe ninamba. Eshe nisho ninamba ami Nyambi ya Ngula. 6Nikatuma mundilo mu litunga lya Mangongi naku baya nimwabo bazika ku shibumbo baya bali na kuyoya mu ku mwena. Pe bakalimuka ngayi Ami nili Nyambi ya Ngula. 7Ami nikengisha bantu bami baka Ishalela ngayi bakalimuke lizina lyami lya kuyela, pe kaliha nikabetabilisha kami ngayi mwanga bakahandule lizina lyami lya kuyela. Nohobene, mikoka yikalimuka ngayi ami Nyambi ya Ngula nili Nyambi wa Kuyela wa Ishalela.”
8“Mutena ukeza, mwa shikuma mutena ou ninatoyo byawo ukamoneka. 9Baya bazika muminzi ya Ishalela bakatutika, bakabangiza mundilo ha bilwisho pe bakabihokesha. Bakahokesha makebo amashe nanawa amanene na bipando hamo namivwi yabyo na miwana ya ngunga hamo na milinga. Bakabiyota mu myaka mutanu na yibili. 10Kaliha kami bakaya na kuchaba nkuni mu mafuba hinge kuya na kuzitema mu lishaka ndaba biya bilwisho nibyo bakenga nkuni. Bakapukula baya babapukwile pe bakabwesha byuma byabo kubifumisha ku baya babishimbile.” Eshe nisho anamba Nyambi ya Ngula.
Binzimbi bya Ngongi
11“Oho nimwabyo ebye bikatendiwa, nikapanika Ngongi mwanya wa kufunda mituntu mu Ishalela, nikamupanika Mukulo wa Bakakwenda uya uli ku mushamuko wa Liwate lya Mushele. Ngongi na likunge lyendi nimwalyo lya bakanzita bakafundiwa kuyo. Pe bakakwenda kukapita iya nzila kami bafwako. Nohobene uya mukulo ukatumbiwa ngayi Mukulo wa Bakanzita ba Ngongi. 12Baka Ishalela bakashimba zingonda mutanu na zibili hibafunda mituntu na kuyelesha litunga. 13Muntu nimwendi wamu litunga ukayavwa ha kufunda iya mituntu. Bantu nimwabo bamu Ishalela bakapanikiwa maleema ha mutena uya oho nikamonesha ngovu zami. Eshe nisho anamba Nyambi ya Ngula. 14Munyima ya zingonda mutanu na zibili, kukahatiwa bantu baya bakapita mu litunga kuya na ku mona mituntu iya yikashalila, ngayi mwanga bakayifunde, nohobene mwanga bakayeleshe litunga. 15Oho bakapita mu litunga, kuya nimwako bakawana shifupa, bakayakako shilimukisho ngayi mwanga bakakufunda bakashitwale ku Mukulo wa Bakanzita ba Ngongi na ku shifunda. 16(Kukekala munzi ukatumbiwa ngayi Hamona.) Pe munzila eye, bakayelesha litunga.”
17Nyambi ya Ngula wambile kukwami ngayi, “Mwana muntu, yihana tuyoni nimwato twa mu lishaka na tunzama nimwato twa mu lishaka ngayi balikungulule hamo kufuma kuzimbalila nimwazo mwanga balye ntupu yayingi eyi nili na ku bawahishila. Kukekala mayambwayambwa a zinkombela ha lipili lya Ishalela, kuya bakalya nyama na kunwa mukeza. 18Mukalya nyama ya balume ba kukanca na kunwa mukeza wa bana ba bamyene ba hanci. Nimwabo bakazihiwa ngo bikungwe bya bambelele na bana ba bambelele na bampongo na bankunzi na tuyamana nimwabo babawahe ba ku Mbashani 19Mukalya nyama yayiwahe kutwala noho mukekutila kami mukanwa mukeza kutwala noho mukakolwela, eye niyo kombela iya nikumiwahishila. 20Ku tebulu yami mukekuta ku bambishi naku bakakukandamaho, mukekuta ku balume ba kukanca naku bakanzita ba mishoboshobo.” Eshe nisho anamba Nyambi ya Ngula.
Ishalela Ukuboka mu Litunga Lyendi
21“Nikamonesha wuwahe wami ha matunga, kami matunga nimwao akamona eshi nika wa shushula na ngovu zami. 22Kufuma ha mutena uyo, bantu ba Ishalela bakalimuka ngayi Ami nili Nyambi ya Ngula Nyambi yabo. 23Kami bakamikoka bakalimuka ngayi bantu ba Ishalela bayile mu wuntapwa ndaba ya wubi wabo nibo bamwine, ndaba batendele byabibi kukwami. Niho nafumishile lupala lwami kukwabo nabayakile mu maboko a bakankole babo. Niho nimwabo bafwile mu nzita. 24Nabatendele kwezekesha na mazilo abo na wubi wabo nibo bamwine, pe niho nafumishile lupala lwami kukwabo.
25“Haya Nyambi ya Ngula ukwamba ngayi, nikabwesha baka Yakobo baya bali mu wuntapwa, nikayuvwila nceshe baka mukoka nimwawo wa Ishalela. Nikakinga lizina lyami lya kuyela. 26Bakavulama lisheni liya bali nalyo na byabibi nimwabyo biya batendele kukwami, oho bakekala mu litunga lyabo hinga mwamwena, mwakubula bya ku batinisha. 27Nikababwesha, pe nikabafumisha ku matunga a bakankole babo. Pe kupitila mumwabo nikamonesha matunga amengi ngayi nili wa kuyela. 28Pe bantu bami bakalimuka ngayi Ami Nyambi ya Ngula nili Nyambi yabo. Nabatumine mu wuntapwa mukati ka mikoka haya nababweshakale kami mu litunga lyabo, kami shilolo nishiye hinge tuhu muntu umo kunyima. 29Haya kukafumisha lupala lwami kukwabo nifwako, ndaba niketila Moyo wami ha mukoka wa Ishalela.” Eshe nisho ninamba ami Nyambi ya Ngula.
Currently Selected:
Ezekiyele 39: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
